《台灣個表妹嚟咗我屋企住》【完】: (一百一十九)情侶樂

八月二十三日 星期五 晴

呢日，好簡單。

同小南好簡單咁拍咗一整日拖。

由朝早去睇戲，睇咗早場可以平啲，所以睇咗套卡通片，最啱就係小南呢種咁低B嘅女仔。

晏晝去行街食嘢，我哋去咗旺角，行下商場又行下好多人嘅街道，小南成日都驚我會病發，拖得我好緊。





到夜晚就一齊食譚仔，我今次叫咗小辣，但都食到出晒汗，小南又食最辣，又係食到面不改容。

今次，我係用男朋友嘅身份去做呢啲事情。

如果可以⋯⋯

我真係好想將呢本日記寫長啲⋯⋯

將我同小南嘅未來都記錄低⋯⋯





又一頁。

日子，又少一日。