《台灣個表妹嚟咗我屋企住》【完】: (一百一十七)家庭樂

八月二十一日 星期三 晴

一大清早，我就同埋小南仲有阿爸一家三口揸車去咗⋯⋯

周圍去。

係，你冇睇錯，係漫無目的咁周圍遊車河。

因為阿爸話要畀佢個新抱仔睇下香港唔同嘅地方，車路。





從另一個角度欣賞下香港，例如永遠擠塞嘅紅隧，感受下香港嘅交通問題幾嚴重。

嗯⋯⋯好似講遠咗。

不過阿爸唔知幾時連小南都唔叫，直接改口叫新抱仔，咁即係間接暗示我一定要娶小南為妻啦。

而小南又唔再叫姨丈，跟埋我叫阿爸，人哋聽到唔知，仲以為我哋結咗婚添呀！

呢一日，我哋參觀咗一下北區，視察完水貨問題，又去咗銅鑼灣食午餐，又去埋赤柱行街，行到夜晚就返去荃灣一間餐廳食晚餐。





返到屋企，我又心郁郁想同小南同床共枕。

但驚啲老人家接受唔到，於是趁阿爸返咗房瞓，我先化身採花賊潛入小南間房。

最後，花就冇採，我只係喺床上攬住小南，聞下佢帶有甜味嘅髮香，漸漸進入夢鄉。

呢日嘅家庭樂，就係咁完結。