《台灣個表妹嚟咗我屋企住》【完】: (八十九)有親戚嚟
瞓醒，又要漫無止境咁補課。
如果每個朝早都可以瞓到自然醒就好啦⋯⋯
我走出客廳，今次聞唔到嗰陣可怕嘅燶味，亦見唔到有早餐放喺枱面。
小南係咪已經放棄咗煮早餐畀我食⋯⋯
我係咪想虐待自己呢？點會咁想食小南嘅早餐㗎？
小南嘅房門仍然閂埋，應該仲未瞓醒，既然係咁就唔好打擾佢啦。
換上校服，又踏上旅途。
完成一段路程後，我再次返去呢個溫馨嘅屋企。
到咗晏就，小南好似仲喺間房入邊瞓緊⋯⋯
學業同愛情都要兼顧先得，我應該帶多啲小南出街拍拖先啱。
「喂⋯傻豬！」我敲敲房門，希望喚醒小南。
「起身未呀？」
過咗一陣都冇咩反應。
唔會係嬲咗我啩？嬲我尋晚冇擒窗過去搵佢？定係佢又夢遊走咗呀？
出於擔心，我就開門入去一窺究竟。
咦⋯⋯
我見到小南攬住隻Hello Kitty瞓喺床上熟睡中，但眉頭緊皺，好似好辛苦咁嘅樣。
「喂⋯豬！」我上前搖一搖佢嘅身體。
「做⋯咩⋯呀⋯」小南迷迷糊糊咁醒咗。
「我哋今日去拍拖喇。」我繼續搖佢。
「唔去呀！！」小南突然間發好大脾氣，仲起身將我推出去。「你走呀！走呀！」
「喂⋯」
碰！
小南好大力咁閂埋道門。
點解小南今日咁反常嘅？平時都唔係咁㗎，更加冇試過發我脾氣，但我諗佢應該唔係嬲咗我，因為以我所知所有女仔每個月總有幾日特別反常，特別情緒化。
簡單啲嚟講即係小南有個親戚嚟咗我屋企。
呢位親戚真係好難搞，雖然一定會早走過表妹，但保守估計佢唔住返幾日都唔會走。
只係⋯佢折磨小南嘅同時折磨埋我。
例如話一但步近佢視線範圍之內，就會畀佢鬧。
「衰人！快啲走開呀！」
「我望都冇望你喎⋯⋯」
或者係睇住電視想轉台，唔想睇啲低能節目。
「喂呀！唔準轉台呀！」
「得得得！唔轉唔轉⋯⋯」
甚至就算乜都唔講，佢都要無啦啦發我脾氣。
「我想打你！」小南喺張梳化拎起個遙控器作勢要打我。
「吓？」我呆咗。「做咩要打我？」
「唔知呀⋯⋯總之想搵嘢發洩下，我好想打你呀！」小南想我同佢一樣咁痛而要虐待我。
「唔打得唔得呀？」
「咁我咬啦。」說罷，小南捉住我隻手臂，一口咬咗落去。
「呀！！！！！！！」
我嘅悲鳴聲瞬間傳到屋企每一個角落，聲浪嘅震撼足以連門窗都震碎。
嗰種痛楚就好似打針一樣，唔見血都見眼淚，係我嘅眼淚。
話說以前同阿琪拍拖都冇試過搞埋呢啲嘢⋯⋯
見佢痛到郁唔到咁滯，而且又面青口唇白⋯⋯
我要幫佢買M巾，又要將我嘅肉體畀佢攞嚟出氣。
因為小南話喺佢唔開心嘅時候，做佢嘅出氣袋係我作為男朋友嘅義務，如是者我就畀佢折磨咗整整一日，手臂上嘅深深嘅牙齒印都多咗幾個。
估唔到現代社會，男朋友都有義務同權利。
咁搞搞下，夜晚嗰餐皆因廚師唔舒服而買咗幾盒發泡膠。
其實女仔嚟M究竟有幾痛苦？我作為男仔冇辦法感受得到。
小南痛到死下死下，我就只可以陪伴喺佢身邊。嘗試分擔佢嘅痛苦。
有冇方法可以幫佢減輕痛楚呢？
呢方面知識相當貧乏嘅我就開電腦上連登，諗住開post問巴打，向佢哋請教一下女朋友月經來潮可以點做，點知⋯⋯
「幫佢奶哂啲M血:P 」
「試下衝紅燈啦[bomb] 」
「買定保險，我指樓主你」
屌⋯⋯咁撚無聊㗎，一啲實用性都冇。
以我所知小南應該有排痛落去，我確實諗唔到咩方法可以幫到佢。
咦！如果同樣係女仔應該會知㗎喎⋯⋯
於是第二日返到學校補課，我就向我嗰位死黨討教一下。
喺課室一見到阿yo，我就立即上前去問佢⋯⋯
「阿yo！我想問你平時M到嗰陣做咩先冇咁痛㗎？」我直接開門見山咁問。
「吓⋯⋯」阿yo畀我咁唐突嘅問題嚇到好尷尬。「你痴線㗎咩？無啦啦問我啲咁嘅問題⋯唔通你嚟M呀？」
「我點會嚟M㗎⋯⋯」我都唔知畀咩反應佢好，但有求於佢又要表現得謙厚啲。「係我女朋友啫。」
既然屋企嗰個女仔有兩個身份，我都開始習慣叫佢貼切嘅身份，費事一啲唔熟嘅人聽起嚟怪怪地啦，又表妹又女友咁⋯⋯
「哦，咁咋，好簡單啫。」阿yo露出一副高手嘅模樣，亦證明咗我冇搵錯人幫手。
「咁靠你教下我啦！」我好有誠意咁討教。
「嗱！煲薑茶畀佢飲啦，暖暖地對女仔好好㗎，舒服好多。」跟住阿yo仲好細心咁講埋有啲咩細節要注意：「仲有呢你要⋯⋯」
但後面嘅說話我就冇留心聽到了，只就記住煲薑茶呢三個字，不過⋯⋯
薑茶點煲㗎？斟茶我就叻啫！
聽完阿yo悉心教導，返到屋企我就喺廚房開始發呆。
算啦，唔識煲呀，斟杯熱水畀佢飲算。
都係唔好喎，一陣如果又唔啱佢心意，又畀佢虐打我咁點算？
所以為咗保障自己生命安全，我就落街買咗啲嘢食，順便買一杯熱烘烘嘅朱古力奶畀小南飲。
而小南飲過之後，臉色亦好返啲啲，冇對我發嬲。
「唔該表哥⋯」
「你再抖下先啦。」
「嗯⋯」
似乎只係好咗啲啲咋喎，我再上連登睇返尋日我開嘅個post，終於發現有個實用性嘅建議。
BBG絲打：「黑糖薑茶暖水袋依啲應該係基本野」
黑糖薑茶？最衰我唔識煲啦⋯⋯
暖水袋？屋企邊有啲咁嘅嘢㗎⋯⋯
人肉出氣袋就有一個！
無辦法啦，唯有出此下策。
我行到小南，然後慰問一下佢：「有冇事呀？」
「有呀⋯⋯好痛呀。」小南嘟起個嘴望住我。
我完全唔忍心見到佢咁慘⋯⋯
只好鼓起勇氣伸出我唔強又冇力嘅手臂，作為小南發洩嘅工具。
冇暖水袋，就做出氣袋囉。
我唔會畀自己深愛嘅女仔獨自承受呢啲痛㗎！
「我準備好㗎喇！你嚟啦！」我閉上雙眼，祈求佢快啲完事。
「表哥⋯⋯」小南對於我嘅犧牲好驚喜，又好感動。「我愛你呀⋯⋯」
說罷，佢又咬落嚟我隻手。
雖則我係自願，但我都係人，有血肉之軀就難免感覺唔到痛楚。
「嗚呀！！！！！」
我諗呢下嘅慘叫聲，就連樓下看更陳伯都聽得到。
而淒慘嘅程度，我估同去廁所冇廁紙無異。
係就係幾白痴，我嘅肉身畀小南摧殘咗足足一日，但見佢發洩完真係舒服咗好多，我就知道我隻手臂冇白白犧牲。
終於完成咗男朋友嘅義務啦。