《台灣個表妹嚟咗我屋企住》【完】: (九十)懲罰

又到咗唔需要補課嘅日子，我就留守喺屋企陪伴嗰位連街都出唔到嘅白痴。

喺佢身邊照顧住佢，見到佢識笑，我就開心。

「表哥我要飲水！」

「係⋯⋯」

好簡單，愛一個人就係咁簡單。





斟杯水畀佢，已經可以表達得到簡單嘅愛意。

小南瞓喺張床上面，而我就坐喺佢隔離睇書。

我記得佢話過自己喺台灣都帶咗啲書過嚟，所以我就問咗佢借嚟睇下，一睇⋯⋯原來佢啲書全部都係啲台灣浪漫小說，我諗通常係對愛情好有憧憬嘅女仔先鍾意睇，特別係小南呢啲咁純品嘅女仔。

只可惜大部人經歷嘅戀愛，開頭都係美好，但結局就相當不堪，包括我在內。

而我再睇睇下先發現啲書都唔錯，可以學習到好多氹女仔嘅技巧，好似一本拍拖實戰指南。





對住我呢啲好耐冇拍過拖，啲戀愛經驗已經唔再係咁純熟嘅人嚟講，睇下浪漫小說學返一兩招都幾好。

可能係作者嘅文筆太好，令我覺得嗰啲情節係幾老套，但又真係幾浪漫喎⋯⋯

「表哥你睇緊邊頁呀？」有時睇睇下就會畀小南打擾，搞到我專心唔到。

「哦！呢頁呀？個女主角會⋯⋯」個衰妹仲要無啦啦劇透畀我知。

「喂呀，你瞓覺啦，你咁講完我仲點睇呀？」我用手指彈一彈佢嘅額頭。





「嘻嘻⋯⋯我特登㗎喎。」咁頑皮嘅細路女，想話嚴懲下佢，但見佢咁可憐又唔可以咁做。

但另類啲嘅懲罰方法都有嘅⋯⋯

我笑一笑，又錫咗小南一啖。

「嘻⋯做咩呀你又？我都冇批准你咁做。」小南甜笑住咁講，語氣似係好開心。

「吓？乜唔係男朋友嘅權利嚟㗎咩？」我摸住佢個頭問。

「我冇畀啲咁嘅權利你喎！」小南充滿嬌氣咁話。

「咁你想點呀？女朋友大人⋯⋯」見到佢咁可愛嘅樣子，我亦不自覺咁笑着。

「我要⋯⋯報仇！」說罷，小南就想用佢嘅嘴唇偷襲我。





但我一早就預測得到小南嘅行動，而有所防備，拎埋本書企起身，令小南一個撲空。

小南先係怒視著我，然後好唔甘心對住我哭哭啼啼：「嗚⋯⋯你又恰我！」

「唔好扮喊啦，呢招用過好多次啦。」我立即拆穿佢嘅詭計。

「哼⋯⋯唔得添。」小南突然奮起，向住我嘅嘴唇進攻。「咁我就直接嚟啦！」

只可惜，我實在高過佢好多，有身高嘅優勢，我仲要專登企直個人，令到小南無論點跳下跳下，始終都錫唔到我，報唔到一吻之仇。

「哈哈⋯想錫我呀？嚟啦！」我指住自己個嘴，對住小南好挑釁性咁講。

「呀！死人黃家星！」固執嘅小南已經乜都唔理，勢要報仇雪恨。





但係佢真係點跳高都冇用喎⋯⋯

而我又再次趁住佢冇防備嘅時候，偷偷吻一下佢。

激到小南扎扎跳，谷到成塊面都紅哂。

「唔制呀！快啲投降呀你！」

「鬼叫你生得咁矮咩？」

跟住我哋就喺屋入面好似咁來來回回咗好多次，畀小南追住我嚟攻擊。

玩咗陣，又陪住佢返房抖下。

由於已經連續兩日都食外賣，而小南依家嘅境況又煮唔到食，我又唔想畀佢食咁多出面啲味精，所以我就大膽提議今晚嗰餐⋯⋯我親手煮！





但話時話，外賣呢樣嘢本來唔係同我嘅生活息息相關㗎咩？小南入侵我嘅世界，連我嘅生活都改變埋。

不過呢種改變，我好鍾意。

今日變成一日師奶嘅我，一個人落街買餸，買咗菜、魚、火腿，諗住煮啲最簡單最易煮嘅餸菜畀小南同阿爸食。

入到去廚房，小南嘅主場，我要慢慢諗下點煮飯食。

因為我⋯都係第一次煮飯，係一個超級新手。

小南想話嚟從旁指導一下，但畀我以廚藝天才為由拒絕咗。

話過要親手為屋企人煮一餐，又豈能假手于人呢？





於是我搞咗一輪，終於蒸好條魚，炒好碟菜，仲有一碟火腿炒蛋，然後放哂上枱面。

對於新手嚟講，煮到咁已經好有滿足感。

但阿爸同小南就唔係咁睇啦⋯⋯

「吓？咁咋？咁清淡嘅？」好明顯阿爸好不滿。

「食咗試下先啦！」我話。

「好呀，就睇下表哥煮成點！」小南話。

佢哋開始夾起啲餸食，面色同時越嚟越差⋯⋯

「嘩！星仔，你煮得咁難食嘅？」

「表哥⋯⋯你煮得⋯⋯真係好難食。」

「幾難食呀？」我夾咗舊蛋放入口細味品嚐，先發現原來真係幾難食。「嗯⋯⋯不過我煮嘅係一份心意，又唔係味道。」

只係眼前嘅呢兩個人唔容許我狡辯，互相輪流炮轟我⋯⋯

「你有冇食清楚㗎？」

「啲菜又淡茂茂⋯⋯」

「啲蛋又鹹到死⋯⋯」

「仲有條魚呀！唔熟嘅⋯⋯」

睇嚟自我感覺幾良好都冇用，第一次煮飯劣評如潮，就咁宣告失敗。

但係你哋都唔使批評到我顏面無存㗎？話哂第一次食小南煮啲嘢食咪又係一樣咁難食，當時我都有畀下台階佢啦。

不過照咁睇嚟，煮飯真係唔啱我，都係交返畀小南算啦。