《台灣個表妹嚟咗我屋企住》【完】: (八十七)喺學校

喺學校，我又變返嗰個為考試制度而拼搏嘅黃家星，只係今次我再唔係淨係為咗阿爸一個咁簡單。

亦係為咗正喺屋企每日為我守候嘅女仔。

今日上住Miss Li嘅英文堂，多咗一份決心。

一諗起屋企嘅小南，我就不自覺地笑着。

而坐喺我身邊嗰兩位死黨都好快察覺得到我咁唔尋常嘅舉動。





一輪奮鬥過後⋯⋯

「好啦，大家休息十分鐘先。」Miss Li一聲下令，課室內嘅全部人都立即放鬆哂。

「喂⋯星爺你做咩一個人戇鳩鳩喺度笑？」軒少擰轉身問我。「坐你前面都聽到你啲鳩笑聲呀！」

「係囉⋯⋯你痴咗線呀？」阿yo亦過埋嚟搭嘴。

「冇！邊有喎！」我話。





「冇？你係咪⋯係咪溝到表妹啦？」軒少果然料事如神，又再一次洞悉得到我為何傻笑。

呢條友仔嘅邏輯思維幾勁，唔做偵探真係浪費咗佢嘅天賦⋯⋯

「邊有啲咁嘅事⋯⋯」我嘗試蒙混過去。

「表妹？你講緊上次去你屋企BBQ嗰個小南？」阿yo問軒少。

「梗係啦！仲有邊個喎？」軒少又淫邪咁對住我笑。





「頂你哋唔好咁勁啦⋯⋯」我只好投降。

「嗱嗱嗱！肯招認啦？你真係溝咗你表妹？」軒少話。

「算係啩⋯⋯」然後我將全部事情嘅流程簡單咁同兩位死黨講咗一次，咁當中當然冇包括我唔係太相信小南嗰啲乜嘢宿世姻緣同埋超過一個半月就會死嘅事情。

其實同小南住埋係同一屋簷下朝夕相對，確實難免日久生情，互生情愫。

「吓？我上次見嗰個女仔好純品㗎喎，唉⋯⋯又多一朵鮮花插在牛糞上。」阿yo聽後，竟然揶揄我一番。

「乜嘢牛糞呀？我點會係牛糞？」我反駁話。

「哈⋯⋯咁你幾時再帶阿嫂嚟同我哋班朋友見下面呀？仲有阿榮呀！」軒少問。

「搵日啦搵日啦。」我敷衍佢哋咁話。





「嗱！認真喎！到時約你出嚟，咪鬼放我哋飛機呀！」軒少罕有地認真咁講。

「唔會嘅唔會嘅⋯⋯」

「好啦！休息完啦！繼續上堂⋯⋯」而Miss Li又一聲下令，將所有人拉返去現實。

如是者嘅半日補課，有咗愛情嘅滋潤，我覺得自己功力大增，聽書溫書都特別起勁。

唔知道真係到咗考DSE嗰日，小南仲會唔會喺我身邊呢？