《台灣個表妹嚟咗我屋企住》【完】: (八十六)窩心嘅早餐

漫漫長夜，我同小南凈係瞓喺度傾計，直到小南攰攰地，佢就靠緊過嚟緊貼住我心口，然後我攬住佢雙雙入睡。

呢晚我冇發一個美夢，因為比起美夢更好嘅，已經藏於我懷內。

能夠擁着深愛嘅女仔，

最幸福嘅事情莫過於此⋯⋯

一瞓醒，小南又唔喺我身邊，我諗佢應該怕畀阿爸發現而預先離開咗。





又到咗星期一，要返學校補課。

望望個鐘，亦差唔多係時候起身刷牙洗面換衫返學。

我抓住自己蓬亂嘅頭髮，準備行出客廳。

但一打開門，就聞到一陣燶味。

而氣味嘅源頭係喺廚房傳出嚟⋯⋯





眼見枱上面，有一碟腸仔煎蛋。

「傻瓜你起身喇？」小南坐定定喺度，甜絲絲咁望住我。「快啲過嚟坐低啦！」

「嗯⋯⋯」雖然啱啱起身仲有啲迷迷糊糊，但我都清楚知道係小南煮咗早餐畀我食。

不過⋯佢幾時唔叫我做表哥，反而叫我做傻瓜㗎⋯⋯畀個傻瓜嗌我做傻瓜，真係有啲唔甘心，但見佢咁好肯煮埋早餐畀我食，就放過佢啦！

我望住碟賣相還好嘅腸仔煎蛋，再望望小南滿心期待嘅樣子，發現當中有啲異樣⋯⋯





「咦⋯點解得一碟嘅，小南你唔食咩？」

「哦！我食完啦！你都快啲食啦！」

小南嘅模樣好古怪，表現得好唔自然，佢果然唔係咁識講大話，好容易就畀人識穿。

加埋剛才嗰陣燶味，綜合我所有分析⋯⋯

我拎起支叉，再拮落去條腸仔度，反返轉一睇，係濃哂嘅⋯⋯

再睇睇隻煎蛋，另一面一樣咁黑⋯⋯

「小南你⋯⋯」我苦住笑咁講：「你煮早餐咁叻嘅⋯⋯」

「哈哈⋯⋯」小南佢以笑遮醜。「咁我頭先唔覺意煮得太耐呀嘛！」





「一睇就知難食啦，你仲畀我食⋯⋯」我抱怨咁話。

「食得唔好嘥呀！況且我好畀心機煮㗎，點呀你？係咪唔願意食呀？」小南面色即時如同我手上塊煎蛋一樣黑。

「食囉⋯⋯」我再拮起條腸仔，好似平時BBQ咁，只食冇燶到嘅一面。

「咁就乖啦！」小南又再次燦爛咁笑住。「依個係男朋友先有嘅權利嚟㗎！姨丈都無得食！」

「男朋友嘅權利？」我問。

「係呀！得你先有咋。」小南話。

「我可以申請更多權利嗎？」我開玩笑咁講。





「成日都無厘正經⋯⋯快啲食啦。」小南溫柔咁斥責我。

「哦⋯⋯」我硬着頭皮，慢慢咬落去，喺口腔內咀嚼⋯⋯

我食咗一啖，先發現其實冇燶嗰面都幾好味。

但係有乜理由得我一個食呢？

「喂⋯咁你都要食喎！」我用支叉指住佢話。

「吓？點解喎⋯⋯」小南好扭擰咁講。

「你自己煮都唔試下味點得㗎？更何況你話食得唔好嘥嘅。」

「唔好啦⋯⋯」





「冇得唔好！」

最後小南都難以逃過一劫，食咗少少，跟住再演變成我一啖佢一啖。

食完只得一半嘅早餐後，我就換衫返學校繼續奮鬥。

原來朝早瞓醒有早餐食都幾窩心，雖然唔好味⋯⋯