《台灣個表妹嚟咗我屋企住》【完】: (八十二)表白了
「程小南！我想你做我男⋯⋯男⋯⋯又講錯咗添。」
「小南！做我條女啦！咁講好似幾粗俗⋯」
「程小南！我好想你做我女朋友呀！」
無聊起嚟，就對住自己房間塊鏡喺度練習點樣表白。
講咗十幾次，先講到一次正常，到時實戰都唔知點算好⋯⋯
其實我當初點同阿琪表白㗎呢？點解依家會變返個愛情白痴⋯⋯
不過點都好，打鐵要趁熱，我已經決定咗今晚要搵個機會同小南表白。
神呀！保佑我啦！
準備好一個心思細密嘅表白計劃後，然後就係等待時機嘅成熟。
所以我一早就叫阿爸今晚自己食外賣，我話會同小南玩到好夜先返。
對唔住阿爸，要屈就你啦！
咁都係為咗你個仔嘅未來幸福着想⋯⋯
唔知由幾時開始，我會有勇氣去追求「幸福」。
可能係因為小南嘅出現，令我見到嗰啲消失已久嘅幸福，而我好想捉緊住，唔想畀自己有後悔嘅機會。
跟住，我就同小南渡過咗一個平凡又漫長嘅晏就，心情隨着黃昏嘅來臨，緊張嘅感覺以幾何級數增加咗唔少。
呢個晏就無聊中帶點趣味，我同小南坐喺梳化上面睇電視，間唔中講啲笑話引佢笑又或者呵癢下佢，應該會加分啩⋯⋯反正依家都咁親密，時機算係成熟啦？
話咁快就天黑⋯⋯
希望我嘅計劃成功啦！
我同小南都換好晒衫，着埋鞋準備出門口。
今晚嘅小南都唔知係一早拆穿咗我嘅陰謀，打扮得好靚⋯⋯[bomb]
淡淡嘅妝，為佢天然散發嘅氣質作點綴。
「喂⋯表哥。」
黑色嘅連身長裙，配上一對深啡色嘅波鞋，咁嘅裝束簡約得嚟又唔會失去格調。
「喂⋯星星表哥！」
最重要係佢嘅嘴唇好似搽咗唇膏，有少少粉紅，同佢兩面臉頰淺淺嘅紅暈好襯，好可愛。
每一次望住小南，我個心都有唔同嘅悸動。
但今次見到一個最靚嘅佢，個心又跳得越嚟越快⋯⋯
呢種感覺就好似第一次喺機場見到佢咁。
「喂！」小南用手拍一拍我嘅額頭。
「吓⋯⋯係⋯⋯」我被迫中止咗對佢嘅幻想。
「你聾咗呀？做咩眼甘甘咁望住我⋯⋯」小南望望自己嘅打扮，有啲害羞咁問我：「係咪⋯⋯着得唔好睇？」
「梗係唔係啦⋯⋯你好靚⋯⋯」我如實相告。
「嘻⋯⋯口花花！行啦，我肚餓啦。」小南笑意滿盈咁講。
「嗯！跟住表哥唔好走失呀！」
「嘻⋯⋯你當我細佬仔咩？」
「係呀。」
比着平時，小南應該係會「哼！」返我，但依家佢兩次嘅語氣都係笑下笑下⋯⋯
我真係覺得今晚係個大好時機！
我帶住小南搭車去到全流人流最旺盛嘅地區之一—旺角。
落咗車後，我就同佢一齊周圍行，行行下，我注意到沿途有好多鹹濕佬都𥄫住我表妹，真係想插盲哂佢哋隻眼！不過咁又難怪嘅，小南着得咁靚，自然散發出嚟嘅魅力的確係好吸引人，包括一邊行緊，一邊望住佢嘅我。
或者係旁人眼中，我哋係一對小情侶，但呢一刻仲未係，我哋只係一對表兄妹。
不過好快就唔同講法㗎喇⋯⋯
我嘅手背不期然地掂到佢嘅手背，講真真係幾吊癮，幾緊張，好想一手拖住佢行，但驚又會嚇親佢。
可能小南都察覺到呢種奇怪嘅感覺，所以佢又一次捉住我隻手臂行，仲將個頭靠緊過嚟，咁睇落都幾似情侶喎。
突然行到某個地方⋯⋯
「表哥！」
小南停低咗腳步，然後望向我。
「嗯？做咩呀？」
「不如我哋今晚食嗰啲啦！」小南手指指住一檔腸粉鋪。
「你咁大食，會夠飽咩？」我質疑咁講。
「梗係夠啦！嚟啦！」佢又拉住我隻手臂，將我成個人拖咗過去。
小南連街邊嘢都鍾意⋯⋯
轉眼間，我哋買咗腸粉、魚蛋、燒賣呢啲美食。
只見小南拎住支竹籤，篤咗粒魚蛋食，然後又篤咗粒燒賣食，望落個樣食得好開心。
平民化嘅食物，簡簡單單加啲甜醬豉油芝麻咁，就已經好好食，所以話唔需要食好貴嘅嘢都可以得到味覺上好大嘅滿足。
「表妹⋯⋯點解你會想食嘅？」我一邊咀嚼緊粒燒賣，一邊問：「你唔驚好似上次咁偷你嘢食咩？」
「你敢？」小南立即好大反應，將竹籤尖嘅部份指向我。「我唔放過你㗎！」
「唔敢唔敢⋯⋯我點敢搶你嘢食？嫌命長咩？」我滴住冷汗講。
「因為食呢啲簡單呀嘛，又好食喎⋯⋯」小南話。
原來簡單對小南嚟講係最好⋯⋯
「但係你真係夠食啦？」我問。
「咁今晚仲有大把時間呀嘛！」原來小南你早有預謀，同我一樣咁有計劃。
咦⋯⋯諗起計劃⋯⋯
我哋食哂啲腸粉燒賣魚蛋之後，再行多咗陣，我先諗起⋯⋯
我好似畀小南打亂咗我嘅計劃喎！
「唯有實行Plan B啦！」
「咩⋯咩嘢Plan B呀？」小南問我。
咦！唔覺意講埋自己心入面諗嘅嘢添。
「冇呀⋯⋯」我都廢事再兜。
「嘻⋯古靈精怪。」小南話。
「同你差唔多啫⋯你成日都係咁。」
「你古怪啲呀！個樣又傻下傻下⋯⋯」
「你講緊自己咋？表妹⋯⋯」
轉計劃後，作戰地點都要轉埋，目的地直指尖沙咀碼頭！
於是我又帶住小南嚟到尖沙咀，喺海旁肩並肩咁散步，雖則嗰度好臭，但有小南喺度幾臭都冇所謂了。
直到行到碼頭附近，聽住啲街頭歌手喺度玩緊busking，我同小南就越聽越入迷，入迷到連我本來諗好嘅Plan B都唔記得哂。
明明呢種氣氛已經好濃厚㗎啦，差埋門一腳咋！頂！點做好啦⋯⋯
望住個歌手拎住支吉他自彈自唱⋯⋯
死就死啦！
我走埋去個歌手度，問佢可唔可以借支木吉他嚟畀我玩一首歌，而佢就好爽快咁答應咗。
然後我將支吉他接過嚟，掛喺身上，身前掛住嘅吉他所施加喺我身上重量，同樣加重咗我嘅不安感。
小南見我行埋去拎起支吉他，一開始係愕然，但跟住都滿心期待咁望實我嘅表演，又為我打氣。
「表哥加油呀！」
「嗯⋯⋯」
好不安，我有預感一陣會出羞。
喺中學時任職band吉他手嘅我，對於玩吉他本來係得心應手，但喺唱歌方面就好鬼水皮，而且都有成一年冇揸過吉他，因此拎起上嚟都顯得有啲手忙腳亂，但最基本嘅和弦都記得嘅⋯⋯
我將手指放喺指板同弦線上，喚起為咗考好一個試而強制沉睡嘅音樂知識。
既然係咁，就彈呢首歌啦！簡單又唔易走音嘅歌。
https://www.youtube.com/watch?v=yjW2zwVKArM
我左手放喺指板上，右手輕輕彈奏出悅耳嘅音樂⋯⋯
個嘴向住支咪，柔聲唱出⋯⋯
尋回一碗湯 清清的小菜⋯⋯
真係好感激小南煮畀我嘅每一餐飯。
尋回一碗湯 最艱苦都掩蓋
尋回一碗湯 跌倒也算精彩
來喝下去 也喝下了感慨
外賣嘅例湯永遠及唔上小南親手煲嘅好飲。
門外那風多急 海多深 慶幸都回來
忙忙腳步裡也有家作最好的遮蓋
一碗湯為你而常存在
來喝下去 也喝下了溫愛
自從屋企多咗你喺度，令我以前成日產生嗰啲負面情緒一掃而空。
尋回這碗湯 不簡不單不相愛
尋回這碗湯 令一屋窩心覆蓋
同檯有你共我 跌倒都算精彩
從來快樂也在溫飽裡盛載
呢個屋企因為你而變得舒服，我好想你一直都喺度。
門外那風多急 海多深 慶幸都回來
忙忙腳步裡也有家作最好的遮蓋
一碗湯為你而常存在
來喝下去 也喝下了大愛
辛辛苦苦補完課返嚟可以有住家飯食，我都唔知幾耐冇試過啦。
無論那天多高 花多香 也憧憬回來
忙忙腳步裡也有家作最好的遮蓋
一碗湯成就你偉大未來
我發覺，我真係越嚟越鍾意你⋯⋯
微溫之中 那片言半語都不需要
快喝下這慷慨
家會為你開
這口湯為你等待
永遠為你守待
「小南，你可唔可以做我女朋友，為咗我而繼續留喺度？」
終於⋯⋯講咗我想講嘅嘢。
莫非係太過突然？成件事嚟得太快，呢種老套表白方式嘅衝擊太震撼，圍觀嘅人同埋小南都畀我咁突然嘅表白嚇到呆哂。
連我身邊嗰位街頭歌手都呆埋⋯⋯
數秒過後，本來寂靜嘅環境隨着第一個人出聲和應而變得熱鬧起嚟。
「應承佢啦！」一把年輕嘅男人聲音。
「係呀！答應佢啦！」另一把女仔嘅聲音。
「答應佢啦⋯⋯」
全部人都喺呢一刻推我一把，相繼和應我呢個告白，熱鬧嘅聲音不絕於耳，只希望讓我同小南能夠牽在一起。
儼如所有故事中嘅男女主角一樣，全世界嘅目光就好似集中於我同佢身上咁⋯⋯
而小南就呆咗半晌，兩邊臉頰漸漸泛紅，又用力咬住下唇，沉默一時⋯⋯
咁即係咩意思呀？
「得⋯⋯得唔得呀？」一日未聽到個答案，我嘅心情都依然係忐忑不安。
如果頭先嘅不安係來自於表演，咁今次就來自於一個未知嘅答案同埋睇唔見嘅未來。
只見小南耷低頭，嘴唇微微張開⋯⋯
似乎係一個答案。
「唔得⋯⋯」
我冇聽錯呀？
應該冇聽錯，因為身邊全部嘅人都同我一樣嚇到呆多一次，未有心理準備接受第二次咁震撼嘅衝擊。
小南講完之後，就繼續耷低頭急急腳咁行咗去一邊。
「小南！」我將吉他除低還返畀個街頭歌手，然後再迅速追住小南。
雖然小南佢越行越快，但最後都畀我追上咗。
我捉住佢隻手腕，將佢成個人拉埋嚟我身邊。
趁住佢未有反應，喺轉身嘅嗰一瞬間⋯⋯
我再次錫咗佢一啖，又係好甜好暖嘅感覺，暖意更令我清楚自己嘅心意。
我嘅心意，已經講咗畀你知。
而我都知你係鍾意我㗎。
「喂呀！」同上次相反，小南好快就推返開我，面紅紅咁望住我，但呢種面紅，唔係憤怒，亦都唔係羞澀。
「你⋯⋯你做咩呀？」一雙憂鬱嘅大眼睛，從雙眼流露出嘅係憂愁感情。
「我鍾意你囉！」既然講一次唔成功，咁就講第二次。
「但係⋯⋯」小南好似有啲嘢想講，但又無啦啦耷低頭。
「但係啲咩呀⋯⋯我知道你都鍾意我㗎！」我拖起小南隻手。
「點解你會知⋯⋯」小南又抬高返頭，一面錯愕咁望住我。
「嗱！你啱啱先認咗。」我話。
「唔得㗎！」小南用力甩開我隻手，又好快咁轉身行走。
我馬上加緊腳步，擋住喺佢前面。
「點解唔得喎？」
「咁係⋯⋯因爲⋯⋯」小南越嚟越緊張，貌似擔心緊一啲佢想保守嘅秘密會守唔住。
「點解呀？講我知啦⋯⋯」
一直出現嘅疑問已經太多，我真係好想搞清楚，我唔想連去鍾意一個人都要煩惱。
小南開口終於講咗個原因出嚟，但呢個原因反而更令我一頭霧水⋯⋯
⋯⋯
⋯⋯
⋯⋯
「因為我驚你會死呀！」