《台灣個表妹嚟咗我屋企住》【完】: (八十三)宿世姻緣
「你講緊咩呀⋯⋯」我又再次畀小南嚇窒咗。
「我話驚你會死呀！」從小南嘅神情同咁激動嘅反應，令我得知佢唔係講緊笑。
只係我唔明白⋯⋯
「乜嘢我會死呀？我哋拍拖會⋯⋯死？」我問。
「你唔明㗎啦⋯⋯你會死㗎！」小南仍然係咁講。
「你唔講我點明呀？」我漸漸有啲怨氣。
「吓⋯⋯」
古今中外，拒絕人表白嘅理由我就聽得多。
離不開都係嗰啲，
你係好人⋯⋯
我當你係朋友咋⋯⋯
我同你唔夾㗎⋯⋯
我唔想拍拖住⋯⋯
之但係因為拍拖而會使另一半死亡，我就真係聽都未聽過，原先我都諗住係表妹唔想拍拖住而作出嚟嘅藉口，又或者佢唔鍾意我利用群眾壓力嚟逼佢就範，又可能係佢想試探我係咪真係真心而玩下我。
不過原來呢啲原因通通都唔係⋯⋯
小南沉默咗一陣，又嚟問咗我一個好詫異嘅問題⋯⋯
「表哥⋯⋯你信唔信有宿世姻緣呢樣嘢？」
啱先話我會死，依家又嚟多個宿世姻緣？
小南就快搞到我個頭爆炸啦！我一啲都唔明呀！
「信啩⋯⋯」呢個答案我都唔肯定。
「如果⋯⋯我話你上一世再上一世都係我表哥⋯⋯咁你又信唔信呀？」小南好真摯咁望住我，完全唔似係講緊笑。
「咁荒謬嘅嘢⋯⋯我點信呀？」我都係否定咗自己。
「你只係⋯冇恢復啲記憶咋。」小南講下又諗下。「你記得返就知道㗎啦，我好似永遠都會搵返你一樣，咁多世都係咁⋯⋯」
我哋沿住海旁漫步，我就聽住小南解釋返所有事嘅來龍去脈⋯⋯
「咁我哋依家係第幾世？」雖然一時之間仲未接受得到小南所講嘅嘢，但我都嘗試緊去理解一下。
「好似係第⋯⋯八世，咦！又好似係第十世⋯⋯」小南摸住頭邊諗邊話，而臉上嘅紅暈已經散去。
「喂⋯⋯你係咪吹水㗎咋？」我好無奈咁問。
「梗係唔係啦！你仲係唔信我！」小南非常不滿咁講。「咁我啲記憶都係好模糊呀嘛！淨係記得前幾世嘅身份同好零碎嘅記憶，同埋最重要係一定要搵一個人。」
「嗰個人就係我？」我問。
「嗯！」
小南嚟香港嘅原因係搵我？
「咁嗰個筆友關咩事？」
「哦⋯嗰個真係筆友嚟咋，但係嗰次見你帶咗我去觀塘，仲以為你記得返啲嘢⋯⋯」
「吓⋯點解呀？」
「因為我哋上一世就係一齊住喺觀塘呀！」
小南依家講嘅嘢全部都係佢有而我冇嘅記憶，所以無論佢點講我都係𢲷晒頭，唔係太明。
「咁田川小南又係咩意思呀？」我將從小南日記上產生嘅疑問問咗出嚟。
「田川小南？哦⋯係因為⋯咦⋯你睇過我本日記？你點會睇到㗎？吓？」小南毫不留情面咁大力扭我隻耳仔。
「呀！呀⋯⋯喂！痛呀痛呀！」只覺隻耳仔差啲就被扭斷。「見你有日瞓咗先至唔小心睇到咋！睇咗一頁咋⋯⋯」
「哼！以後唔準呀！」小南話。
「係⋯但你未答我喎！」我話。
「咁係因為我記得第一世嗰陣係日本人，見到個姓氏咁有趣咪拎嚟做筆名囉。」小南解釋話。
「日記都要用筆名⋯⋯」
「唔得咩？哼！」
「得⋯」
霎時間又諗返起，今日唔係應該同小南表緊白㗎咩？點解無啦啦變得咁古怪㗎？要聽住小南講佢啲FF嘢。
於是我又拉返正題。
「你咁講法⋯⋯即係我哋無論係今世定上一世都係注定嘅一對啦，咁⋯點解你唔可以同我一齊？」我問。
「吓⋯因爲⋯」小南聽後，又遲疑咗一陣。「因為有把聲音同我講，如果我同你一齊超過一個半月，你就會死⋯⋯」
要是宿世姻緣呢啲咁奇怪嘅嘢都夠荒謬，咁唔想拍拖係因為我會死就係荒謬之中嘅荒謬，我確在忍唔住笑咗出嚟。
「哈哈⋯⋯」
我諗表妹唔只係有夢遊，仲有FF過度，佢係咪太傻呢？
但正正又因爲佢呢份傻氣，先至深深咁吸引到我，先至係令到我鍾意佢嘅原因。
「你根本都唔信我嘅？我真係⋯擔心你㗎⋯」小南眼角浮現出一些淚光，雙眼嘅眼眶漸漸咁泛紅起嚟。「正衰人！」
說罷，小南又加快腳步前行，似乎又想拋低我。
我唔想畀自己心愛嘅女仔喊，我會唔知點算㗎！從來都未見過小南喊，但係佢今次喊係因為緊張我？
我曾經覺得，世界上有好多嘢都係貌似真實嘅假象，無論友情、愛情，而直到依家我都係咁諗，但係我清楚小南呢一個表妹嘅存在係真實。
我問過好多次自己個心點諗，我知道我好鍾意呢個女仔，好愛佢，好想畀到幸福佢，好想氹到佢開心，每日都見到佢開開心心。
所以我唔再想失去啲乜嘢啦！
我一個箭步，用雙手從背後緊緊咁攬住小南，而且攬到實一實，唔想畀佢走甩。
「喂呀⋯做咩呀你？我嗌非禮㗎⋯⋯」
「小南⋯點解你要聽人哋講嘅嘢，都唔肯聽自己內心嘅說話？」
「我內心嘅說話？」
「從第一眼見到你，我冇諗過自己會咁鍾意你，直到一齊去迪士尼，一齊食西多士，一齊食糖水，一齊睇戲行街食譚仔⋯⋯我真係唔可以否定自己對你嘅愛意，就算要死又點？我總唔信鍾意一個人都會死，所以你都唔應該信⋯⋯」
我一次過將自己心底裏嘅想法講哂出嚟，全部都係我嘅肺腑之言，好希望小南明白我嘅想法。
「唔通你⋯唔係都係咁諗咩？」
我依然緊緊攬住小南，清楚感受到佢身上嘅暖意成日都刻意暖化我嘅心靈。
但冇咗佢，我可能仲係當初嗰個就快為咗讀書讀到崩潰嘅嗰個黃家星，小南真係改變咗我好多。
因為佢，我連嗰啲心結都能夠解得開，先可以令我清楚明白自己個心諗緊咩。
小南耷低頭，我仲聞到佢飄逸長髮嘅香氣⋯⋯
我哋任由空氣嘅沉寂⋯⋯
忽然⋯⋯
「嗚⋯⋯嗚⋯⋯」
係小南哭泣嘅聲音。