《台灣個表妹嚟咗我屋企住》【完】: (八十一)白痴表妹

第二朝瞓醒，轉身嗰陣，就發現身邊嘅小南成個人唔見咗，只有我一個人瞓喺張床上面。

唔通佢夢遊又發作？走咗出去？

正當我擔心小南安全嘅時候，見到完完全全蓋喺我身上嘅被，先至安心落嚟。

應該係小南蓋落嚟⋯⋯

呢個表妹真係⋯⋯嘻嘻⋯⋯





一瞓就瞓到十一點幾，日光從窗邊滲入嚟，我起身出到去客廳，就望見小南坐喺度睇緊電視。

小南身上嘅衣服同我一樣冇得換，而且因爲尋日去沙灘玩完，件衫又濕又有沙，應該係好污糟。

真係想快脆啲返屋企沖個涼換件衫⋯⋯

「咦⋯星星表哥你醒啦？」小南察覺到我企咗喺門口。

「嗯，婆婆呢？」





「佢出咗去開檔啦，叫我哋一陣自走嗰陣鎖門喎。」

「哦⋯好呀，咁我哋都走啦，唔好打搞人哋咁耐。」

「嗯！」

「我去執埋啲嘢先。」說罷，我就返房間收拾好行裝，同時整理下自己嘅思維。

個阿婆真古怪，咁都唔驚啲陌生人爆佢夾，可能佢真係冇咩錢啦。





仲有嘅係小南，尋晚嘅事佢會唔會當冇發生過呢？

我哋鎖好道門，離開阿婆間屋後，就打算去搵阿婆，雖然鹹魚就唔會買，但循例都要再多謝一聲。

不過行到去尋日小南炒車嗰個出事地點，望過四周圍都搵唔到阿婆個攤擋。

老人家係鍾意神出鬼沒㗎啦，眼見搵唔到佢，只好作罷，準備起程返屋企。

而人流又變返尋日晏晝嘅時候一樣咁多⋯⋯

喺行去碼頭嘅途中，小南見到一樣好有趣嘅建築物，就叫停咗我。

「表哥！嗰樣係咩嚟㗎？」小南指住一幅有好多鎖頭掛住嘅木牆。

「嗰樣？鎖囉。」我簡潔咁回答。





「車！鬼唔知咩？」

「畀你寫字掛上去嘅鎖囉。」

「好似幾有意思喎⋯」小南聽後思考半晌，然後拉住我手話：「咁我哋都去寫下啦！」

「好⋯」

買咗個鎖頭，小南就拎住支筆喺鎖頭嘅一面，好專注咁寫上咗一段文字，跟住擰轉另一面遞過嚟畀我。

「嗱！到你寫啦。」小南話。

「我寫？」





「係呀，一人一面呀，我寫完咪到你寫囉，咪偷睇我寫啲嘢呀！」

「哦⋯⋯好呀。」

我拎過嚟，就咁寫上咗「白痴表妹」四隻大字。

唔知小南寫咗啲咩喺另一面呢？好想知呀！之但係畀佢啤到我實一實，又唔敢擰轉去睇呀⋯⋯

然後我就將個鎖頭掛上木牆，扣實咗。

「乜你咁快寫完㗎？寫咗啲咩呀？」小南想去偷睇。

「喂⋯你點可以偷睇㗎？我都冇偷睇你寫啲咩啦。」我馬上喝止佢。

「咁算囉⋯」小南有啲悶氣咁講。





「除非你講我知你寫咗啲咩先啦⋯」我試探佢咁話。

「唔講喎！」

「咁我都唔講囉。」

我一早都知呢個表妹鍾意唱反調㗎喇⋯⋯

搭船返屋企之後，我同小南就繼續如常咁一齊生活。

買餸煮飯，食飯瞓覺。

因為冇覆返阿爸，夜晚食飯嗰陣就因而畀佢話咗幾句，但都有同佢解釋返點解尋晚冇返嚟瞓。





生活真係繼續如常？

不可超越嘅界線，就真係不可超越？

瞓喺床上嘅我就開始密謀一個計劃⋯⋯