《台灣個表妹嚟咗我屋企住》【完】: (六十七)固執

放低咗，就係放低咗。

阿琪還返畀我嗰本書，我就放返喺書櫃；阿琪同我共同擁有嘅美好回憶，我會放喺心入面。

仲有嗰啲以前影低喺手機嘅相，我都絕對唔會刪走。

兩年前已經傷心過一次，所以兩年後唔需要再傷心多一次。

經過咗三日沉悶嘅補課，喺星期三嘅晚上，我就同軒少、阿榮一齊坐喺某個大排檔一邊食嘢，一邊把酒言歡。





而講嚟講去都係嗰陣喺學校做過嘅白痴行為，某幾個同學嘅近況，仲有一啲陳年舊事⋯⋯

「星爺，你知唔知你嗰陣做過幾多傻仔嘢呀？哈哈⋯⋯」由軒少帶起嘅話題，阿榮就同佢一齊笑我。

「傻仔嘢？咩傻仔嘢呀⋯⋯」

呢個情景同上個禮拜去軒少屋企嘅時候，小南同阿yo恥笑我做過嘅搞笑嘢不謀而合。

其實我做過啲咩呢？可以令佢哋成日恥笑我⋯⋯





「吓⋯你自己唔知㗎？定係你唔記得咗呀？」阿榮問。

「睇佢樣都似係唔記得咗啦。」軒少笑住咁講：「咦⋯你中三嗰陣廁所單嘢呢⋯」

「中三、廁所單嘢？」

畀佢講一講，我真係有返啲印象。

「嗰陣時街知巷聞㗎喎，你一定會記得啦。」





「頂⋯你個肺，哈⋯」我不禁以笑遮醜，因為單嘢實在太柒。「我屙爛廁板呀嘛。」

「哈哈哈⋯⋯」

我諗阿yo同小南講嘅搞笑野都大概係講緊呢件事。

相比起我，其實阿榮同軒少都唔少引人發笑嘅往事，而朋友間相聚少不免會互揭瘡疤，例如阿榮當住全班面前表白失敗啦，仲有係軒少試過扯住旗出去黑板做數。

一點一滴，講返起，依然能夠令人再三回味，笑到死。

當然仲有自己嗰啲無藥可救嘅固執⋯⋯

「喂⋯係喎，阿榮，你知唔知呀？原先我同呢條友講叫佢同你和好，佢死都唔肯㗎！仲話一世冇朋友做，講到幾恐佈呀！」軒少話。

「咦⋯乜原來咁㗎？但你又主動搵返我嘅？」阿榮聽後向住我問。





「咁係⋯因為⋯有個人令我改變咗睇法。」我話。

「邊個呀？阿yo？」阿榮再追問。

「屌！梗係唔係啦，我估九成係佢表妹。」而軒少就搶住幫我答。

「吓？星爺嘅表妹？邊個嚟㗎？」

估唔到軒少竟然一眼看穿⋯⋯改變我嘅人係小南。