《台灣個表妹嚟咗我屋企住》【完】: (六十八)飲！

「妖，你唔識㗎啦。」我對住阿榮講。

「咩呀？咁你表妹嚟㗎喎，作為死黨要認識一下都好正常啫？」阿榮話。

點解好似我個個朋友都想識小南咁嘅⋯⋯

「有機會先啦，上次燒嘢食你又唔嚟。」

「都話嗰日唔得閑⋯⋯」



「喂！咪扯開話題呀，講緊你表妹㗎嘛。」軒少又狡猾起嚟。「阿榮，你有所不知啦！佢表妹好靚㗎。」

「唔係啩？真嘅？」阿榮一聽，就對我表妹更加感興趣。「認真，幾時介紹嚟識下呀？」

「你哋兩條咸蟲⋯⋯咪打我表妹主意呀！」我故作抗拒。

「得啦！鬼唔知你個表妹係你㗎？」軒少話。

「你話咩呀⋯咩係我？」我話。



「上次睇你對住個表妹嗰陣色心起個樣，就知你想溝佢啦！」軒少坐埋嚟，然後搭住我膊頭。「想溝人咪溝囉⋯⋯古時啲皇帝為咗保持貴族血統呀，都係食返自己啲表親咋，快啲去馬啦。」

「係囉，你都咁耐冇女陪啦，搵返個都好正常啫。」阿榮附和軒少話。

「妖⋯⋯你哋咪玩我啦。」我無奈咁講。

溝表妹⋯邊有諗過喎⋯我始終害怕世俗嘅眼光，加上傳統嘅思想下，根本諗都唔會諗呢啲事情。

「唉算，你第日食咗佢嗰陣你就知我冇講錯㗎喇。」



「預祝你早日有女呀。」

「唔好再玩我啦⋯兩位大佬。」

「好⋯唔玩你，飲杯先啦。」

「嗯⋯」

杯與杯碰撞過後，我就將杯好苦嘅酒飲落肚。

嗰一晚一個小聚會，就同佢哋一邊飲酒一邊吹水，飲到有微微醉意，吹到天昏地暗，直到半夜凌晨先散水。

今日軒少開嘅玩笑真係大⋯竟然叫我去追小南。

就算我鍾意人，人哋都未必鍾意我㗎嘛⋯⋯



不過諗返最近同阿榮和好咗，對於阿琪嘅事又已經釋懷咗，心結一個又一個咁解開哂，舊有嘅枷鎖已經冇再束縛住我。

如果係咁重新學會去鍾意一個人，其實都未嘗不可⋯⋯

可惜我仲有一個死結點都解唔開⋯⋯