《台灣個表妹嚟咗我屋企住》【完】: (六十三)好耐冇見

喺屋企食完表妹煮嘅一餐晚餐，我就要上路啦。

係時候要去見下阿琪。

我換咗件衫，着對波鞋，就打算出門口了。

「表哥你去邊呀？」小南問。

「星仔，夜麻麻先出街嘅？約咗朋友呀？」阿爸問。





朋友？冇錯，我應該去見嘅呢一個人係一位老朋友，而唔係初戀情人。

有時有啲身分無需要太執着，只要明白彼此嘅關係喺咩地步就得。

「嗯⋯只要一位好耐冇見嘅朋友，放心啦，唔會太夜返。」

說罷，我就嚟到呢一間同小南嚟過嘅糖水舖。

等咗冇耐，嗰個熟悉嘅身影就慢步嚟到坐低喺我面前。





飄逸嘅長髮下五官分明而清秀，纖瘦嘅身型⋯⋯

佢同兩年前一樣冇變過。

只係耐冇相處，唔知道佢嘅性格係咪依然咁霸道呢？

「黃⋯家⋯星！嘻嘻⋯好耐冇見你啦。」

「嗯⋯兩年啦呵？阿琪⋯⋯」





阿琪向住我嫣然一笑，此刻，我哋就彷彿一對只係隔咗一日冇相見嘅小情侶。

但假象永遠唔會係現實。

佢同我都清楚嗰啲只係往事，分咗手，我哋只係朋友。