《台灣個表妹嚟咗我屋企住》【完】: (六十二)西多士

星期日，趁住朝早有啲時間，畀我能夠抽空溫下書。

但只要小南一瞓醒起身，我就唔會有呢嘅時間。

所以到咗下午，我又畀佢捉咗出街行，去行下一啲香港出名嘅地方。

而佢總係鍾意喺人來人往嘅街道上活蹦亂跳。

行夠了，差唔多黃昏，我哋就去街市買餸煮飯，然後佢就喺屋企煮一餐好餸畀我食。





呢種放假嘅公式，我清楚咁記得有經歷過。

以前細個逢星期六日放假，我就會做咗依家小南嘅角色，捉咗媽媽出街玩，拖住佢隻手周街行嚟行去，睇下呢樣又睇下嗰種，然後當佢見我冇咁精力旺盛嘅時候，就會拉我去街市幫手拎餸，而作為幫手嘅奬勵，就係返屋企前去附近一間茶記食一嚿沾滿蜜糖嘅西多士。

所以嗰陣我好鍾意放假，唔多唔少係因為可以去茶記食西多士。

可惜依家再食返西多士都無意義，冇咗當初嗰份喜悅感，因為連最重要陪我食嘅嗰個人都已經唔喺度。

點樣嘅西多士，都必然會缺少咗一種實在嘅味道。