《台灣個表妹嚟咗我屋企住》【完】: (六十一)幾好奇

寫完日記，我就一啲聽到開門聲⋯⋯

半夜三更，應該係阿爸返嚟。

我打開門行出廳，就見到阿爸一副極度疲倦嘅樣子。

「咦⋯星仔你仲未瞓呀？」

「嗯，係呀⋯你咁夜先返嘅？」





「同朋友傾耐咗啫。」阿爸一邊講，一邊除鞋，然後行去斟咗杯水飲。「點呀？你個表妹易唔易照顧呀？」

「你話佢？幾簡單呀，份人又乖又易照顧，畀嘢佢食同埋陪佢玩就得。」

「咁佢又真係幾純品嘅，似足哂佢阿媽，不過個外公就唔係啦⋯⋯」

「外公？」

我諗應該係講緊小南口中嗰個好寵愛佢嘅外公。





以及我印象中冇咩交流嘅嗰個人。

「我都好少講起佢喎，不過星仔你知少啲都好嘅，畢竟係我哋上一輩嘅事，冇理由要你哋扯上關係。」

「哦⋯⋯」

既然阿爸咁講，咁我都再無謂追問落去，跟住我就返房瞓覺。

雖然畀佢無意中誘發出我嘅好奇心⋯⋯





媽媽嘅爸爸，其實係個點樣嘅人呢？