《台灣個表妹嚟咗我屋企住》【完】: (五十五)咁食咩？

喺返去屋企嘅途中，我嘅電話就突然響起⋯⋯

『我不願讓你一個人 一個人在人海浮沉』
『我不願你獨自走過⋯⋯』

我拎出擺起褲袋嘅電話一睇，來電顯示寫住阿爸。

「喂，阿爸。」

「星仔？你依家喺邊呀？」





「我同小南喺街呀。」

「哦⋯⋯阿爸今晚同個朋友去食飯呀，你自己同小南食啦。」

「嗯，咁好囉。」

「拜拜。」

「嗯，拜拜。」說罷，我就收咗線。





阿爸今晚唔返嚟食飯，得我同小南兩個，返屋企煮飯好似好奇怪喎，況且天色已晚，今日又同小南行咗咁耐，我估佢都攰㗎啦，費事仲要佢煮咁辛苦，不如搵間餐廳食仲好啦。

「表哥，姨丈搵你做咩呀？」小南問。

「佢話今晚有朋友同佢食飯，叫我哋兩個自己搞掂。」我回答。

「哦⋯⋯咁你想唔想我返去煮飯呀？」小南十足賢妻咁講。

我梗係想啦，但唔忍心見到你咁辛苦呀嘛。





反正我都好少帶小南出街食晚餐，今日就係一個好機會。

「唔使煮啦，依家咁夜，表哥帶你去食飯啦。」

「嗯！好呀！咁食咩呀？」

咁食咩呀？如果要帶個女仔去食飯，必定會遇上呢條世紀難題。食得太好，個荷包又負荷唔到；食得冇咁好，又驚個女仔唔鍾意。

頂！食咩好呢？我一支公就冇所謂啫，但多個表妹又要諗埋佢嗰份。

一開頭，我個腦淨係諗住畀表妹食好啲，所以個腦彈咗鋸扒兩隻字出嚟，屋企附近真係有間餐廳可以食啲有質素嘅排，但埋單都要兩舊水，自己依家身上又冇咁多錢。

我食親嘅嘢嚟嚟去去都係M記、KFC、大快活、吉野家，一係就茶記，再唔係就係⋯⋯





咦！食呢樣都唔錯喎！

「我哋去食譚仔啦。」