《台灣個表妹嚟咗我屋企住》【完】: (五十四)兩個世界

聽完表妹解釋返個原因之後，原本恥笑佢嘅我就覺得好後悔⋯⋯估唔到燴番薯背後，有一個小故事。

而呢個小故事，就係發生喺小南嘅童年。

話說喺小南細個嘅時候，佢嘅外公，都係我嘅外公成日會整燴番薯畀佢食，因為佢哋嗰啲鄉下地方冇咩錢，有得食一餐飽肚嘅就已經好足夠。對佢哋嚟講唔需要什麼佳餚，有得食燴番薯就好幸福。

對比起我呢啲喺溫室長大嘅人，簡直係兩個世界。

唔怪得小南成日食咁多嘢，鋸到我一頸血⋯⋯



「外公佢好好人㗎！成日都畀好多嘢我食，又成日陪我玩，我兩個家姐都話佢偏心我，特別錫我，所以我同佢嘅關係應該係最好。」小南話。

「嗯⋯可能你人見人愛囉。」我話。

「口花花啦你！」

我嘅外公⋯我就對佢冇乜印象，只記得唯一一次返台灣探親嘅時候見到佢，好似連講兩句說話都冇。

「係啦⋯咁你嚟咗呢邊，外公佢唔擔心你㗎咩？」



「我都唔知呀，我都冇話佢知我嚟咗香港。」

「吓⋯」我有啲聽唔明表妹講嘅嘢。「你瞞住佢嚟？」

「嗯，係呀，我知道以外公嘅性格，佢一定唔會畀我一個人搭飛機嚟，所以我咪同媽媽夾埋，話去咗台北嗰邊囉。」

「乜原來你咁曳㗎。」

「嘻⋯可能外公佢已經識穿咗啦。」



「唔緊要啦，反正⋯你過多一個月多啲都走㗎啦⋯」唔知點解講講下有啲不捨嘅感覺又出現返。

「有排啦，我點要玩夠先返去㗎喇！」小南堅定咁講。「喺嗰邊悶死人㗎，又冇咩嘢好玩。」

咁的確又係嘅，我去過一次知道又真係幾悶。

「咁你留耐啲囉，表哥帶你玩哂成個香港。」我話。

「咁又唔得⋯⋯」小南有啲失落咁話：「喺九月之前，我就要返去㗎喇。」

「嗯⋯咁喺你走之前，我就帶你玩哂成個香港囉。」

「嗱！你話㗎！」

「絕不反口。」



「嘻⋯⋯」

「你做咩無啦啦傻笑呀？傻妹！」

「笑你對我咁好囉。」

「咁大哥哥係好應該照顧小妹妹㗎嘛！」

「嘻⋯⋯」

最後我同小南喺葵涌廣場呢個迷宮入面行咗幾個圈，睇下嘢食下嘢，就咁打發咗好多時間。

不知不覺間暮色已晚，我同小南離開呢個商場之後，就見到一個平淡嘅日落。休閒咁玩咗一日，感覺原來真係唔錯。