《台灣個表妹嚟咗我屋企住》【完】: (五十六)米線

時間一跳，我真係同咗小南去咗屋企附近一間譚仔三哥食嘢。

一入去，就有招牌譚仔阿姨招呼我哋坐低，然後我就拎住張餐牌教小南點樣去嗌嘢食。

「嗱⋯⋯好簡單，本身就係食米線嘅，咁你可以加餸，你見到餐牌有咩餸想嗌就嗌啦，之後有得揀辣定唔辣，就係咁簡單啦。」

「哦⋯⋯」見到表妹思索良久後，就話：「我諗好啦！」

「咁就嗌啦，唔該！」





譚仔阿姨嚟到問我哋食咩。

而小南就話：「我要呢個豬肉、牛肉、牛丸，要最辣！」

譚仔阿姨同我聽到之後都呆咗一呆。

「最辣，真係好辣㗎喎。」個阿姨帶點口音咁講。

「嗯！我要最辣呀！」小南去意已決，我都無謂阻佢。





一陣佢中完伏就知㗎啦。

我笑一笑之後就話：「唔該我要乍醬腩肉米線，中辣。」

「仲有冇其他嘢要？」

「冇啦。」

譚仔阿姨走咗去後，小南就問我⋯⋯





「星星表哥呀，點解你唔食最辣嘅？」

我本想笑而不語，但見小南呢啲初生之犢唔係咁明白，所以我要解釋一下。

「其實呢，中辣已經辣到想死咁滯㗎啦，你仲話要最辣⋯⋯我都唔知好唔好幫你call定白車先。」我笑住咁講。

「你睇小我？我好食得辣㗎！」小南實牙實齒咁話。

我只能話小南太睇小譚仔三哥嘅麻辣同出面嘅分別。

不過事實勝於雄辯，一陣佢就知味道啦⋯⋯

「不過話時話，原來你都係五月天嘅fans。」小南話。

「五月天？你又知嘅？」





「咁啱聽到你嘅電話鈴聲嘛，頭先嗰首係我不願讓你一個人。」

「咦，原來表妹你鍾意五月天啲歌。」

「我都係近幾年先鍾意咋，佢首首歌我都好熟㗎！」

「我都好鍾意聽佢哋啲歌，所以電話入面都有好多佢哋嘅歌。」

「如果可以去睇佢哋演唱會就好啦⋯⋯」小南好無奈咁嘆氣。

「你第日再大過啲咪可以去睇囉。」

「我依家唔大咩？屋企冇咩錢呀嘛，如果佢哋知道咗我去睇演唱會實鬧死我。」





「第日有機會嘅話，表哥請你去睇囉。」

「係咪㗎？可能我返咗去台灣之後，你都唔記得我啦。」

「點會呢？我都唔呃人嘅。」

「嘻⋯⋯聽住先啦。」

事實上我都唔算係五月天嘅fans，只係特別鍾意聽佢某一啲歌。其實我係陳奕迅嘅fans，但點解知鈴聲又會係五月天嘅歌呢？因為真正五月天fans嗰個係阿琪，佢幫我整咗呢個鈴聲之後，我就一直都冇再改過。

因為嗰陣阿琪鍾意聽，我先鍾意聽。

雖然依家搵唔到咩理由再去聽五月天嘅歌，但偏偏就係唔想改呢個鈴聲，習慣咗就係習慣咗，習慣間唔中聽下嗰啲歌，又懶得去改個鈴聲。

所以話，我仲有好多嘢根本就未放低。





同表妹傾下傾下話咁快，兩兜嘅米線就擺到嚟我哋眼前。