《台灣個表妹嚟咗我屋企住》【完】: (四十五)日記

瞓醒起身之後，我有覆返阿琪。

「我幾好呀，你想聚下舊？冇問題。」

我隻手始終都冇打多幾隻字，畢竟我自己都唔知道應該點樣去面對佢，寧願將一句簡簡單單嘅問候藏喺心裏就算。

你好嗎？

真係問完又點？唔通對方同你講佢唔好咩？





真係要知道，唯有再一次進入嗰個人嘅世界去了解佢。

可惜，我唔會再想咁做。

以前，同親阿琪whatsapp傾計，我總會加上一大堆表情符號，但依家身份唔同咗，連講多少少嘢都要諗清楚啲，為咗唔好令自己有不必要嘅想像。

而覆完佢，我就又放部電話喺枱面⋯⋯

如果係以前，我應該會揸實部電話等阿琪嘅下一句說話，盡量秒回佢，但依家我覆whatsapp嘅心機都冇哂，或者係我份人懶咗，懶得去同人聯絡感情。





然後我去咗食啲藥，飲多幾啖水，望住掛喺牆上嘅時鐘。

原來星期六嘅朝早係咁悶咁無聊⋯⋯

阿爸返咗工，剩低返我同小南喺度⋯做咩好呢？帶表妹去玩？定係帶佢去書店好呢？

見到時候尚早，我就突然萌生咗一個念頭⋯想帶佢去一個自己都好耐冇去過嘅地方。

於是我去敲敲小南嘅房門，想睇下佢起身未。





咚咚！

「表妹？你瞓醒未呀？」

「喂喂！」

等咗陣⋯都冇咩聲氣，我就決定膽粗粗咁入去睇下。

「表哥入嚟㗎喇。」

跟住我慢慢咁打開門，見到小南正在床上甜睡中，枕邊有一隻我送畀佢嘅Hello Kitty。

表妹一副相當疲倦嘅模樣，令我都唔忍心再打搞佢，然後我又慢慢閂返房門⋯⋯

而喺離開嘅剎那間，我留意到喺阿哥張書枱上面有一本嘢。





我忽然諗返起小南話過佢都有喺台灣帶咗啲書嚟香港睇，而喺好奇心嘅驅使下，搞到我好想知道小南究竟係咪鍾意睇開啲文史類嘅書籍，於是我又開返道門行咗入去。

但⋯近睇先發現原來唔係一本書，係一本日記。

呢個表妹同我一樣都有寫日記嘅習慣喎！只係我冇咁好心機會日日寫，只會間唔中將一啲我好想寫嘅嘢寫低，而小南嚟咗呢段時間，我都有寫低同佢啲經歷。

好奇心再一次驅使下⋯我翻開咗小南本日記嚟睇，只見一翻開，就係尋日發生嘅事⋯⋯

裏面嘅內容，一開始係講佢自己全日食過啲咩，咁好笑嘅，連食過嘅嘢都寫低，而後面就係埋怨我嘅一啲說話。

咦⋯唔睇都唔知小南咁話我喎。