《台灣個表妹嚟咗我屋企住》【完】: (四十四)記返起

見到whatapps嘅信息，我拎住部手機完全唔知點做好。

如果一個前度女友搵返自己⋯⋯咁究竟意味住啲咩嘢？

按常理，只有兩個可能性⋯⋯

一，對方重燃愛火，即係翻撻。

二，佢真係想搵你聚下舊，別無他意。





我就當然唔想再胡思亂想，堅信後者係最有可能，畢竟我用咗兩年嘅時間先慢慢放得低佢，我唔想突然又拎返起。

請就話放低，心入面其實永遠唔會忘記呢個人。

人總會記得曾經給予自己甜蜜回憶嘅嗰個人。

並且必定記得佢嘅樣子、名字、喜好，一切一切。

而有共嗚嘅事物就會勾起嗰啲回憶以及對嗰個人嘅記憶，點樣選擇性失憶都唔會忘記得到，點都會勾得返起。





例如我聽過嘅一個故事，女主角整咗個朱古力蛋糕畀男主角食，而男主角第一次收到人哋親手整嘅嘢食就梗係好開心，到咗若干年後，當男主角每一次食蛋糕嘅時候，都會好自然諗返起同女主角嘅甜蜜點滴。

蛋糕對故事中嘅男女主角，就係有共嗚嘅事物。

而一碗糖水，就係我同阿琪有共嗚嘅事物。

望住佢嘅信息，諗返起某啲陳年往事，而只屬於阿琪嘅西米露味道仍然留喺我口腔內。

回味雖好，可以懷緬一下往事，但往事已經過去，再次回望只係自討苦吃。





點解又會撞上呢啲心結㗎？唉⋯⋯

上一次有表妹推我一把，畀咗啲意見我，但今次呢啲愛情嘅煩惱，已表明零經驗嘅表妹又點會識。

有人幫我解結下呢啲煩惱就好啦，如今睇嚟我只能夠靠自己⋯⋯

我望望時間，然後隨便藍刎咗阿琪，再放部電話喺枱面，就上床瞓了。

瞓醒先算啦！