《台灣個表妹嚟咗我屋企住》【完】: (四十三)假象

中二嗰陣分完班，第一日安排座位嘅時候，我就被安排坐喺一個不顯眼嘅班房角落。

一個瘦瘦嘅身影從我坐位旁邊經過，呢個身影坐喺我隔離座位嗰陣，一條長長嘅馬尾就突然打到我嘅臉龐。

「哎呀⋯」

「唔好意思呀⋯」

呢一刻，我先發現用頭髮攻擊我嘅人，係一個好可愛嘅女仔。





眼前嘅女仔急忙向我道歉：「對唔住呀，我冇心㗎⋯⋯你有冇事呀？」

「冇事⋯」

細看之下，呢個女仔完全乎合咗我心目中嘅女神形象⋯⋯

個天竟然派咗個天使坐我隔離位！

當時命運如此眷顧我，我又點估到命運原來都識得作弄人呢？呢個世界嘅假象實在太多，第一次見到嘅時候，我哋係唔會識得分辨真假，只係會迷迷糊糊咁樂在其中。





迷糊咁就認識咗我嘅初戀⋯⋯

「你坐我隔離？我哋幾有緣份喎⋯」我問。

「嗯⋯係呀，咁我同你差唔多高呀嘛。」佢回答。

「咁我以後啲功課就靠你啦！」我開玩笑咁講。

「乜你咁㗎⋯我連你個名都未知喎。」





「你唔識睇下座位表㗎？坐你隔離嗰個嘅名都唔知⋯⋯」

「咁你講唔講呀⋯⋯」

「講⋯講唔講你遲早都知㗎喇，我叫黃家星，叫我阿星啦。」

「阿星？哈哈⋯⋯」眼前嘅女仔無啦啦傻笑起嚟。「你係咪識整咖哩㗎？阿⋯星！」

「唔止呀！我仲識整人肉叉燒包添呀！」

「嘩⋯好無聊呀你。」

「喂，咁你呢？」

「吓⋯你唔識睇下座位表㗎？」





我居然畀人用自己講過說話串返自己⋯⋯

「我文盲㗎，快啲話我知啦。」

佢一抹淺笑，然後簡單咁講咗佢個名畀我知⋯⋯

「我叫文詠琪呀！」

而呢一段小插曲，就係我同阿琪初次邂逅。

可以坐喺阿琪隔離座位，可以成日同佢傾計，一齊盡情玩樂，一齊專心聽書，一齊渡過幾個苦悶又漫長嘅學期後⋯⋯

彼此之間嘅感情就越嚟越好⋯⋯





由追求、表白、正式拍拖，阿琪變成我嘅初戀情人。

因為小插曲而牽起嘅動人曲調，延續出一段又一段優美嘅樂章，一直聽得如痴如醉，聽到當中有高興同悲傷嘅音韻，但意想不到嘅係完結嘅尾奏原來就只有悽慘。

有緣有份亦不代表永遠會擁有。

其實所謂緣份，就是瞬間出現又突然消失嘅假象。