五千天的小確幸: 下巴仔

下巴仔

狗狗的下巴是個軟弱的地方，就算是隻50公斤的洛威拿(我有)正面高速衝去你，只要較準時間由下而上卑個拋搥(但如何攞岩個位就唔好問我喇)，多多都唔夠死。

但偏偏佢地就最鍾意攞出黎同人玩，晾在梳化上眼怔怔望你，反轉個人大字型朝天，打橫伸長條頸阻住路中心扮餓死，全部都在呼喚你的手去搲一搲個下巴仔。

千祈唔好遇到草地丶泥地或者水氹，如果唔系一定下巴先著陸，跟著後腳一蹬，全個人向前推呀推，前進時像蛇一樣左扭右扭，完成後長噓一口氣好不滿足。如是者來回重覆數次，直至全身濕透/漿透/臭暈給我喝停為止。





豬自小也喜歡和我玩下巴仔，她咀仔短短胖胖，毛仔又密又柔軟，搔下巴時脷仔在外邊跳下跳下，可愛極了。豬尤其鍾意枕在我腳上睡覺，嗅著我的腳氣打呼，是我最愛的回憶畫面之一。

我睇過泰林頓既TTouch按摩術，佢透過獨特的撫摸丶畫圈丶托提，幫動物建立信任丶減壓，達到治療效果。沿著咀邊兩邊直落喉嚨按摩打圈可以安穩他們的情緒，冷靜接受大人的關懷愛心。

豬系後來的日子，又吃藥又打針，心情當然唔好，尤其是飲完中藥之後，苦口苦面扭計要吐出來，醫生叔叔中醫伯伯束手無策。試過加蜜糖甜甜地丶加多水淡淡味丶少加水杰杰地難吐D都行唔通。不知怎地有天我放了塊暖毛巾在豬下巴，她忽然神色舒泰地乖乖呑藥，開開心心接受我的撫摸，不久更打起呼嚕，就像小時候睡我腳上一樣香甜幼滑，我愛你小豬。

謝謝你，泰林頓女士。