浮事的，第二個的士佬既故事。: 暴走２

電話完了，三人相視。

「風......成件事奇奇怪怪咁....報警啦....你唔好去亂黎呀.....我岩岩先見返你，你唔可以有咩事架....」小恩用祈求的聲音對梓風說。

「HAPPY，有無三百粒？」風問。

「無。」HAPPY回應道

「咁點?」風問，但他的眼神卻似有多少念頭。





「咁.....既然咁啱得咁橋佢地揀呢個地方做交收，咁咪......試下囉。」二人交換了一個可疑的眼神。

「但唔知對方有咩架生係手，睇黎得我地兩個去會好危險。」風說「同埋成件事真係奇奇怪怪咁。」

「人多，怕會打草驚蛇。聽佢地頭先講野個款，應該都係D二打六黎既姐，比盡人佢地十零個人。如果情況唔對路，咪PLAN B囉。」HAPPY少有地認真起來。

「PLAN B？」風問。

「我有一百二十萬現金，你拎五十萬去，包D報紙扮有三百個。到時如果原來佢真係人多勢眾既，咪放低錢囉。以我對黑社會既經驗，有成五十萬佢地，最多都係打你一身，應該唔會要你條命仔既。」HAPPY說。





「咁如果有十幾條友，我地兩個夠唔夠做？」風問。

「叫埋大細B去啦，加埋佢兩個就肯定無問題－－－－－如果對面得十幾個。」HAPPY說。

「嗯，四個，加埋救走TIFFANY五個人，一架車岩岩夠晒。」風說

「喂!!!!!!你地係度講咩呀。唔好亂黎呀！唔準亂黎呀！」小恩急切地追問。

「放心啦，你係屋企等。」風握著小恩的手說道。





「你叫我點放心丫！呢個女人真係值得你去冒險咩？」小恩紅著雙眼問道。

「第一，有HAPPY既PLAN B，所以成個行動危險度已經降低晒。第二，我知有你係屋企等緊我，我邊捨得有事呢？第三，亦都係最重要既一點－－－－－屯門海水化淡廠，係我地既主場！」風說

他眼中的神彩似在說著：「我唔係去冒險，我係去打柒呢班買板唔知定既仆街姐！」