肥妹仔愛作戰: 7.

我仍在猶疑是否跟蘇茵走時，她已經付了早餐錢，然後蹺著我離開大排檔。

「我屋企係天后，不如搭叮叮返去囉。」她說。

「Er….上你屋企唔係咁好，會打擾你屋企人….」我企圖找藉口拒絕。

「我自己一個住，冇人做咩都得….你想唔想減肥架……」她似笑非笑的說。

「其實呢….我好想知道你點幫我減….我呢，其實我自己減都得，唔駛麻煩你….」我戰戰兢兢的說。



「你知唔知我幫幾多人成功減肥，人地求我，我都未必同佢減呀，而且我幫人減肥我收錢架….收好貴架…….」她說。

「咁利害….不過我冇錢架，所以都唔好煩你喇….」

「見係你，我唔收錢幫你減….你想錢債肉償都得嘅…」她眼盯著我由頭打量我一次。「你咁多肉都唔怕啦….」

「咩呀….咩多肉呀…..多肉得罪你咩？」我怒吼著她。

「哈哈，你比半年時間我，我一定可以幫你減到你想要嘅磅數。」



「半年太耐喇….我要最短時期減60磅。」

「你知唔知呀，減肥一個月唔可以多過8磅。如果你想減60磅，最少要7至8個月。如果減得太快，營養唔夠會影響健康，然後又會令皮膚差，又好容易影響情緒，好容易搞到有厭食症架。最重要係會拖低新陳代謝，到時更加難減。而且當你食返野，身體會因為之前捱餓，更加吸收多啲，令你更肥更難減….」她活像一個營養師的口吻娓娓道來。

「你講野好似營養師….好犀利呀….」我拍著掌由衷的敬佩她。

「哈，咩好似？我真係營養師嚟架….想當年我減肥又係盲頭烏蠅咁，節食搞到身體好差….上左叮叮再講啦…」她一手拉著我上電車。

在電車上，她十分興奮的表示要坐在車頭位置。她把窗打開，讓風吹入電車內。



「好耐冇坐叮叮喇…..好舒服呀….」她把雙手搭在扶手上說。

此時，我才發現她左手手腕上有一個細小的紋身--「love 8」

「你個紋身好靚呀…….但係，咩係love 8….」我說。

「係love infinite ….咩love 8….」她笑著說。

「love infinite ？有咩meaning 架？好靚呀，我都想紋….」我說。

突然她靜了下來，然後右手輕輕的撫摸著紋身。雙眼遙遙的望著窗外景色。我從沒有看過她這樣子。我估這個紋身對於她來說十分有意義，所以我也不敢再說甚麼。

過了一會，她緩緩地說她的故事。

「當年我因為肥被女朋友飛，我都係學你節食減肥。我每日只飲水同食蘋果，身體越嚟越差，成日病，又經常發脾氣。



之後去到一個磅數點都落唔到，我好唔開心，扣喉又冇用，飲啖水都肥。我好憎自己，好討厭自己個大肚腩，覺得自己好失敗。所以我割脈自殺。唔知係因為我太肚餓冇力，定係因為太肥，我死唔去，但係留左條疤痕。

我留條疤痕去警惕我自己，去努力減肥去恨比條疤痕我嘅前度。

我去讀營養，去做運動，令自己健康地瘦。但當我越瘦，我個恨就越小。去到最後，我減肥完全係為自己，而唔係前度。條疤痕根本係我自己比自己嘅。

我覺得我係時候放低，所以用紋身遮住條疤…..love infinite….代表無限愛，無限地愛自己錫自己多啲….我見到你，我見到我以前嘅自己，所以我想幫你….」她眼紅紅的說著自己的故事，令我感到萬分抱歉。

「噢，對唔住，令你諗起之前嘅唔開心添….」我說。

「哈.....都過左去啦….ok 呀….」她回復笑嘻嘻的說。

我想每個肥妹仔減肥的原因各有不同。總是有些肥妹仔是因為傷心難過而開始減肥。肥妹仔的心酸又有幾多個瘦人明白呢。



「我會照你方法減肥，請你多多指教…」我捉起她的雙手說。

「阿詩，為左減肥，你可以去到幾盡？」