【大學故】《上到大學，原來真係會咩都唔同曬》: 九
(九)
*小熙視覺
「咩料啊!」zero定一定神，下一秒，佢就起曬槓咁。
三年，zero仲係咁唔成熟。
但係呀朗只係企左係我面前，然後對住zero講左句「你唔識尊重人，都唔該尊重下你自己。」
zero唔出聲，佢行左埋呀朗度。
佢地互啤左一陣，zero就另過黎對住我講「當初扮prue扮true，原來大家咪同一樣人」佢笑左一笑，然後就離開左。
「點啊你無事啊嘛小熙」呀朗望住zero離去，之後即刻過黎問我。
呢刻我既眼淚唔爭氣咁流左落黎。呀朗扶住我坐低左，然後輕輕掃我背。
過左大概五分鐘，我都開始冷靜落黎。
「你唔介意既，可以話我知發生咩事既」佢雙手支撐住張櫈咁講。
我望住地下，然後同呀朗講出左呢段除左雪琪佢地之外無人知既經歷。
zero係我F4個陣追我，而當時呀賢係同佢同一時期追緊我。但係最後我同左zero一齊，因為個陣呀賢有女朋友，我覺得佢好極有限。
但不足幾個月，zero已經一腳踏幾船俾我發現左，個陣我好傷，亦都同佢分左手。
之後我同佢係學校亦都好似陌路人咁，升左F5忙左之後更加無咩見過對方。
「呢啲mk仔，得個樣架姐!唔洗驚佢架，總之... 你男朋友唔係你隔離個陣，我都會隨時係你隔離既。」呀朗聽完就講出呢句說話
「我... 我意思係我地都同一個系，會成日見到姐，妳唔好誤會阿小熙」佢見到我望住佢唔出聲，於是就即刻補多句。
「哈哈，我係諗緊你岩岩話zero mk仔，你...」我都即刻笑左一笑咁話「點都好啦，多謝你呀呀朗」
「哈，我中學個陣仲mk呀，依家好左好多架啦」呀朗對住我露出微笑「mk仔真係得把口架咋，唔洗驚佢」
「就遲到啦，行啦。」呀朗望一望手錶，然後拉住我跑上去。
「等陣放左一齊食飯？」呀朗問我
「ok阿」我笑一笑，呀朗聽到我咁講都對住我笑左一下
『小熙，今晚Ceci話re u喎，你去唔去？』 上上下堂收到嘉浩既Whatsapp。
我再望一望我地組個Group，根本就未約好re u既日子，而我都冇收到Ceci既Whatsapp。
於是我問坐係隔離同我一樣玩緊電話既呀朗，「你有冇收到Ceci Whatsapp啊？」
呀朗望一望手機，「無啊，做咩咁問？」
「咁姐係個姣婆想姣嘉浩啦！」我反曬白眼咁答
但雪琪而家同呀賢係camp，無得比Ceci見下嘉浩真正既女朋友。但我一個人去搵佢兩個又會令場面相當尷尬。
「今晚去同埋佢地食囉？」 係喎，我今晚好似約左呀朗食飯。正當我苦惱緊應該點做好，呀朗好似知道我諗乜咁同我講。
「好啊，咁我覆嘉浩先。」我笑得好開心咁點左下頭，就繼續玩電話。
『今晚我同呀朗都黎，要唔要叫埋Rainbow?』
『我問左喇，佢話要返工，Leo就話練波黎唔到。』
『咁今晚幾點？我6點放』
『Ceci話食壽司喎，6點半尖沙咀等？』
『好，你今日冇堂咩？』
『3點幾放左喇，而家係屋企』
同嘉浩傾左陣，我收埋電話又聽教授廢up下課程大綱、Project、計分方法個啲，就落左堂。
同呀朗講左去尖沙咀，我地就搭地鐵。
又係放工時間，好多人既月台。
今次我好小心謹慎咁望實前面，驚又跌倒比到麻煩呀朗。我真係唔想一日柒咁多次。
突然，呀朗捉住我手臂，力度唔大我唔會覺得痛，但我完全係佢控制之下。
「你... 唔好介意，我都係驚你跌親⋯...」呀朗見我望住佢，隨即好唔好意思咁笑左笑。
「無事，不過你都幾細心架喎！」我回答
「細心又點…都冇女朋友」佢好細聲咁講，但我都聽到啲，於是就笑住話「未搵到姐，你中意邊種呀？等我介紹下喇！」
「嗯？係咪架？」呀朗好有興致咁望住我
「係啊，你講得出，我都會盡量滿足你既需要！」
「我中意可愛既，齊陰長頭髮，眼大大，嗲啲痴身啲囉！」
「頂，咁似我既」我笑住咁打左佢一下
「你唔好咁自戀好無先？」呀朗扮嘔咁講。
我同呀朗有講有笑咁，好快就到左尖沙咀。我地未行到B出口，遠處已經見到嘉浩。
「喂，Ceci呢？」呀朗好自然咁讓我企係入邊，一邊問嘉浩。
「唔知啊，佢話黎緊喎。」嘉浩好無奈咁比左佢同Ceci既Whatsapp對話我地睇。
「十分鐘前話係屋企黎緊？佢唔係住柴灣架咩？」我大喊。
「算喇，女仔嘛。」嘉浩望一望錶，六點四十分。
「明知約六半，佢係屋企都可以六半先出門口」對呢條女有好大敵意既我，真係開始覺得佢乞我憎。
「Ceci有冇話食邊間啊？」 呀朗笑左笑咁問。
「佢話食壽司喎，但冇話邊間啊！放題？」嘉浩望一望呀朗同我表示詢問。
「咁貴，我又唔係食得多。不如爭鮮喇。」我望住嘉浩答。
「咁多年都仲食爭鮮。」嘉浩笑住咁打左我頭一下，「都坐得唔耐，不如食板長喇？」
「我冇意見」 「我都冇」我同呀朗答完佢，我就open rice下。
「不如我地去拎位先喇，費時等咁耐。」呀朗提議完，我就隨即點頭表示同意。
坐低左冇幾耐，Ceci就濃妝豔抹，低胸a字裙咁行過黎。本身坐係嘉浩隔離既我同對面呀朗見到佢呢身戰鬥格真係呆撚左。
「有冇必要著成咁。」我反左個白眼，好細聲咁同呀朗講。
「小熙，我地一齊坐啊！」Ceci好熱情咁痴埋我到，我望一望嘉浩，又望一望呀朗。
「咁，我坐嘉浩隔離喇」呀朗企起身讓比Ceci坐，坐左係嘉浩左邊。而我都好無奈咁行左另一邊同Ceci一齊坐。
呢條女，真係相當乞我憎。