【大學故】《上到大學，原來真係會咩都唔同曬》: 八

(八)
*呀賢視覺


呢一刻我望住企係門口呆左既雪琪，個腦真係空白一片。你要明白依家yuki著到幾sexy咁係後面攬住我。

「...陳... 陳俊賢你...」雪琪口都窒埋。

「唔係啊，我同佢...」我同佢無野架？做咩呢句對白咁似俾人捉姦在床既時候既對白？



「呀賢... 你唔係... 想唔負責任阿？」呢個時候個個喊緊既yuki無啦啦爆左句咁既野出黎，佢仲要一路講一路喊，同時間我feel到佢將我攬得更緊。

「屌... 妳講乜啊」條女想點啊

「你岩岩... 我今日危險期... 」yuki一路懶細聲扮曬唔敢正視雪琪。

「哦... 好野呀你陳俊賢，唔去玩房game原來係為左同佢...！」呢個時候雪琪忍唔住衝左過黎，一下扯開左yuki將佢推落沙發。

yuki唔知雪琪有學開跆拳道加泰拳，估唔到呢個身形既女仔可以大力到一下將佢打飛咁濟，成個人已經失重心跌左落去。



雪琪繼而轉過黎，然後舉起手就想兜巴車埋黎。

「妳癲夠未呀？」我一手捉住佢隻手，然後對住佢大喝左句。

因為我知道以雪琪咁衝動既性格，我要暫停佢既暴力行為只有突然嚇一嚇窒佢。

果然雪琪停左一停

「條女講完，到我講未？」我平復番情緒咁問佢。



我望一望仲未企番起身既yuki，然後對住雪琪講「係佢引我聊我，而我亦都對佢無興趣無掂過佢。我份人係點你應該最清楚，打從同小熙一齊之後，我陳俊賢無同過其他女flirt。」

雪琪望住我，然後轉過去望住條女，我亦都跟住佢視線一齊望過去。只見yuki一臉疑惑同驚訝咁望住我地兩個。

唔難估到佢依家終於知道雪琪同我唔係情侶。

「呀yuki呀可？你聽到啦依家。第一，我同陳俊賢唔係情侶，第二，呀賢對你無興趣，懂？」雪琪對住yuki講。

但我見到yuki先係呆左一呆，然後笑左一笑。

「陳俊賢，我遲早會令你愛上我架。」佢抹左一抹眼角岩岩流出黎既眼淚，然後就頭也不回咁樣行左出房。


「喂陳俊賢」雪琪行過黎，一手搭住我膊頭「岩岩sorry阿」



「傻啦，識左妳幾耐啊，你衝動都唔係第一日既事啦」我笑左一笑「但我知妳實信我既。」

「咁你對小熙係點大家有眼睇既」雪琪笑左一笑「但個yuki唔諗住放棄咁，點算」下一秒，雪琪有啲苦惱咁講。

「我諗佢應該唔會再亂黎既，過左ocamp之後都無咩機會會單獨見到，加上又唔同系」我諗左一諗，然後咁講。

「希望啦，你知架啦，啲mk妹面皮咁厚，點知佢會做啲乜啊」睇黎雪琪仲係好耿耿於懷岩岩yuki咁樣想獻身俾我。


「咚咚... 」我同雪琪一齊望向門口

「呀賢雪琪，你地...」門口既係呀琳同karson，佢兩個望住我地一路笑「做咩唔過黎玩呀，仲要使走呀yuki，唔通你兩個咁猖狂...」呀琳一路奸笑咁講。

「...緊係唔係啦，係呀賢有啲頭痛我咪黎睇下佢囉」雪琪若有所思咁講。



「唉你地就好啦一pair咁入黎，羨慕死我啦。」呀琳一邊講，雙手一邊捉實karson隻手一臉羨慕咁講。

而我同雪琪只係以無奈既笑容去回應。

你問我點解無澄清我地唔係情侶？或者因為個一刻我同雪琪個心都疑惑緊yuki到底同左佢地講咩，點解佢無踢爆我地唔係情侶？

「好啦咁你地休息下啦，聽日先玩都得架姐」karson講完，就同呀琳一齊走左。


*小熙視覺


係呀賢屋企幫佢執左陣屋已經下午一點幾，電話突然響起。

「李穎熙！」一聽到我爸呢把聲，真係心都離埋。



我爸係好嚴好固板個種，所以佢根本唔知我同呀賢拍緊拖。平時唔比我著短裙不在話下，我成十八歲女都仲要十二點前返屋企。

琴晚我成晚冇返屋企，又冇打過電話比佢同媽咪，佢擔心我都好正常。只係佢一大聲吆喝我全名，即係代表佢有排鬧我。

非常識做既我當然即刻幫佢降溫，「老豆，今日返工辛苦喇。食緊飯？我而家返緊黎喇！」

「死女包，唔好講第二啲野住。琴晚玩到咁夜仲要玩到冇車返黎。去左雪琪到訓都唔打個電話返黎，想死啊？」老豆把聲聽落又唔係嬲，只係長氣咁煩多我一兩句就收線。

好明顯雪琪琴晚幫我打左電話返去，成功暪住左我爸。


每個係父母心中係乖寶寶既年輕人都需要一個令父母放心既朋友，而呢個人就係程雪琪。




著返琴晚自己既衫，幫呀賢餵埋佢隻狗，奶茶，我就起程返屋企。

呀賢同我都係住荃灣，我搭三四個字小巴就返到去。

我上到車先拎返電話出黎睇返所有whatsapp。今朝起身個陣，淨係覆左呀賢，其他人睇都未睇。

『你有152個訊息來自8個聯絡人』

『呀女，你起身打比我』 老豆。

『小熙，返屋企記得飲湯。小心啲。』 媽咪。

『李穎熙，又去仔到訓呢？幫你暪住左老豆喇！』呀哥。

『又幫你暪住你老豆喇，請我食飯喇！』 雪琪。

『寶寶，我好掛住你啊！你食飯未呀？』 呀賢。

『on9，你酒醒未啊？飲多啲水喇！』 嘉浩。

『小熙，你醒未啊？記得今日三點有堂啊！』 係我未入名既聯絡人。

其餘既都係黎自group，傾緊幾時re u啊個啲。

我一一回覆曬佢地，然後撳入去我未入名既個欄，睇幅icon應該係呀朗。

『好啊，唔該你啊。你唔講我真係唔記得左。』我回覆。

對方隨即回『估到你喇，傻妹。』

『你點知我今日三點堂啊？』

『之前你send比我既，我地都係bba架嘛。』

『係喎，咁你同我一樣都係三點堂？』

『係啊，我係canteen等埋你？』

『好啊。』

約完呀朗，我就求其返屋企沖涼食左個蘋果換左件衫就趕出門返學。

點知去到canteen 搵到呀朗後，見到個我已經好耐冇見到既人。

凌曉峰Zero，我前男朋友。

我當下呆坐咁望住比昔日成熟左好多既佢，做唔到任何反應。

Zero望左我一眼，再望一望呀朗，發出不屑既笑聲「李穎熙，仲以為你真係咁純。又換仔？陳俊賢滿足唔到你咩？」

我緊握拳頭，一陣鼻酸湧上心頭，淚水好快係眼睛打滾。我唔係仲鐘意佢，只係太嬲，已經嬲到出唔到聲。

我即刻低頭打算轉身，點知呀朗已經行到去zero面前推左佢一野。

Zero應該估唔到呀朗會掂佢，毫無準備之下退後左兩步。

而我望住呢個情景，呆左一呆。