【大學故】《上到大學，原來真係會咩都唔同曬》: 六
(六)
*小熙視覺
「咁我地睇落邊個最似usb？」今次出聲既係永豪。
永豪唔算靚仔，但望落去幾型。佢個feel係個種平時番學就薯仔，但平時出街打扮完就幾型個隻，唔知大家明唔明我up乜。
「問埋邊個最似性無能呀笨」係佢隔離既浩然笑住咁講，佢講完kelvin大笑左出黎「一定係你啦仲洗咩問啊?」
「寫好未？下一題啦」呢次出聲既係hana「最想上邊個先」hana問左個好過界既問題，不過咁又係，ocamp特色黎。
我見到ceci一臉自信咁款，而係隔離無出聲既個個組女呀芯就面紅紅咁。
「咦呀芯你未問喎，黎啦快啲一齊玩唔好唔出聲啦」tiffany一手搭住呀芯膊頭好大家姐feel咁講。
「我... 我唔知問咩好呀」呀芯怕怕醜醜咁講，睇佢一路以黎都無咩出過聲，應該係個好靜既怕醜妹。
「唔緊要啦，諗唔到咪下個囉，最緊要開心姐，一係呀tiffany你問囉」對面既呀朗笑住咁同tiffany講，同時呀芯抬高頭對住呀朗笑左一笑就dup低番個頭，講真我覺得佢可愛得黎又唔扮野。
「咁啊... 邊個最好j」tiffany諗左兩秒就話。
「識j一定j妳啦」kelvin好賤咁笑住講。
「屌你啦，想死呀」tiffany都笑住咁屌番佢轉頭。
我之後問rainbow先知原來佢兩個一早識，所以成日互串。
tiffany雖然外形唔討好，但由於好nice既性格所以有好多朋友。
「好啦我地已經填好啦，你地得未」嘉浩抬一抬頭問我地
「嗯我地都ok啦」我答佢。
我地各自攤開左張紙。
「嘩最多人想j你呀hana」tiffany講完就拍左hana一下
「拿你班變態咪真係j我啊下。」hana講笑咁講。
「最多人想同ceci做sp喎」rainbow望一望ceci「有成五個都揀你啊」然後笑吟吟咁望住班男仔
「頂，會唔會係咁啊」ceci懶唔好意思咁笑住講
心諗，收皮啦，明明同問題係你問既，扮乜唔好意思。
「最girlfdable係小熙喎！」佢地望一望我，「四個揀你啊」tiffany指一指張紙
「小熙咁可愛，唔出奇啊」呀朗呢個時候出聲
「姐係你有份揀佢啦，wow！」hana即刻話
而除左嘉浩之外，佢地全班都起哄「wow wow！」
「我都係講事實咋嘛」呀朗唔好意思咁笑左一笑
「嘩最想上又係ceci」
「頂，食屎啦你地」
「咁係咁架啦！」
「咁妳地呢，揀邊個啊」leo一手搶過張紙「嘉浩你最boyfdable喎」佢笑住咁講
「我俾人話開似呀哥架咋喎」嘉浩好無奈咁講。的確，佢性格真係大哥哥feel既
「話左架啦，我話左架，你最似性無能呀！」kelvin望完張紙之後指住浩然黎笑
「屌，睇過」浩然搶左張紙「on9仔，四號係你呀白痴，你先係佢地眼中既性無能呀」佢講完忍唔住強力恥笑kelvin
「屌！」
我地成堆都忍唔住笑出聲
「usb係我... 喂我好純情架囉，妳班友真係太唔了解我」浩然一路講自己都忍唔住笑左出黎
「一定係啦，睇你個樣肯定係A0啦浩然哥」tiffany話
「你點知架」
「收皮啦！」呢句係我地差唔多十幾條友一齊講既
之後既兩日都係玩下啲game毫無特別咁過，加上第一晚通左頂所以我第二晚十二點幾就訓著左。
隨左同其他組都玩得埋左，最令我深刻應該都係Ceci。
佢明知道嘉浩有女朋友，又知道我係嘉浩女朋友既好朋友，但佢都可以無視我既存在而成日搵機會痴埋去嘉浩到。
但畢竟我唔係嘉浩正室，而琴晚嘉浩對我再三保證唔會對Ceci有超出朋友以外既接觸，我都唔想顯得好小家咁剪斷所有純粹想交個朋友既女仔，所以我冇點理Ceci。
直到出camp個陣，完埋最後一個畫龜背既活動之後，營長就宣布活動直式完結。
「小熙，一齊食埋飯先走？」組爸峰好熱情咁問。
「係囉，一齊食埋先走喇！呀朗嘉浩同Ceci都黎啊！」組媽Angel都加入說客行列。
我望一望嘉浩，但咁岩佢同Ceci去左隔離組傾計，幫唔到我解圍。
因為呀賢話左會黎接我，但我又唔好意思拒絕。於是我打開電話，而家下午七點左右，呀賢last seen都仲係下午三點幾。
佢話今日放九點半，加上今晚應該係要OT遲放，我就send左個 whatsapp「bb我同組爸媽去旺角食飯，你放工黎搵我喇，我可以隨時走架。」
「咁... 好喇。」我收返電話之後，笑左笑咁答應左。
「好野，咁我地可以見耐啲喇！」組媽Angel走過黎，翹住我隻手講。
「啊！等我問埋Leo同綠組先！」然後，組爸媽就走左去隔離組繼續積極叫人食飯。
「藍嘉浩，你搵左雪琪未？」我見Ceci死都要chur住嘉浩，我忍唔住行左過去。
「哦，搵左喇。個傻妹話今晚要陪老豆食飯黎唔到搵我。」嘉浩見我開始黑面，佢都好醒目咁行左去我隔離，拉開同ceci距離。
「呀賢有冇搵你？」我無視左Ceci有啲不忿既表情，直接面向嘉浩問。
嘉浩望一望手機，「冇啊！條友應該好忙喇，舖頭好似今日返貨要點貨。」
「邊個係呀賢啊？」Ceci插嘴。
「咪佢男朋友囉。」呀朗指住我答。
「原來你有拍拖架？」Ceci一臉不屑
我心諗：屌，死姣婆。但表面上好平靜咁笑左笑點左一下頭就無理佢。
搞左一輪，Rainbow因為要返屋企食飯就冇跟埋黎食，一大堆人一齊去到旺角一間組爸峰一早已經book 好既party room已經八點幾。
一開始都係圍圈食都會，但食完野之後開始各散去Party Room唔同位置玩。
例如呀朗Leo玩Fiva，組媽Angel, Tiffany同幾個女仔唱k，嘉浩Ceci埋左唔知邊個個堆飲酒猜妹，仲有啲打牌玩wil鬥地主咁，場面非常熱鬧。
本身坐係嘉浩隔離淨係睇冇玩既我，一直一邊同雪琪whatsapp一邊等呀賢打黎。
「小熙，一齊玩喇！」一個蒲精樣叫Cyrus既男仔突然同我講，令本來圍緊圈既猜妹堆全部望向我。
「係啊！呀詩話要返屋企早走左，而家唔夠女仔啊！」蒲精二號男唔係好記得乜名回應。
「一齊玩喇，一個人玩電話咁悶！」蒲妹Candy。
「黎喇，一齊玩喇！」
一個又一個開始起哄要我玩，但我深知我係個一杯即醉既人，「唔喇，我唔飲得架」搖頭拒絕左幾次，但對方都唔肯心息。
「怕乜姐，呢度全部自己人。醉左咪叫嘉浩送你返去囉！」Ceci行過黎完全唔聽我既拒絕，就直接拉左我去坐。
唔想掃興既我諗住冇咁易輸，而且嘉浩應該會幫我頂既心態只好硬住頭皮咁加入猜妹堆。
「小熙，你又輸喇！」蒲精Cyrus笑住咁拍手。
「係喇！今次冇得要嘉浩頂喇！佢都幫你頂左三次喇！」Ceci係我望向嘉浩既同時已經開左口。
的確，嘉浩本身已經飲左幾杯，加上頭先幫我頂左三杯我驚嘉浩會醉。
望住枱上既綠茶溝唔知乜酒，我問「飲啤酒得唔得？」
「啤酒一早飲曬喇，買左一打炸！」蒲精二號再係我杯酒加左啲綠茶。「咁咪冇咁易醉囉。」
我望向嘉浩，只見嘉浩已經開始醉醉地咁，滿臉通紅咁對住我點左下頭。
我知嘉浩飲醉就會開始皮膚發紅，所以就將酒一飲而盡。
當我feel到我頭開始暈之際，呀賢終於打比我。
「喂bb，我收工喇。岩岩上左小巴出緊旺角。」
「好喇，你快啲到喇。」
我同呀賢交代左地址就收左線，打算行去沙發同嘉浩一齊休息。
然而，蒲精Cyrus 同ceci又用各種理由要我地繼續玩落去。
嘉浩冇出聲，而我又唔好意思拒絕就只好坐反低。接落去，我又飲左兩杯，已經神志不清咁訓左係沙發玩唔到。