【大學故】《上到大學，原來真係會咩都唔同曬》: 五

(五)
*小熙視覺


聽住啊k威脅雪琪既對話，我當下即刻走去同岩岩係廁所出黎既嘉浩講。

而當我再拎返起電話既時候，對方已經cut左我線。

我同嘉浩不停打比呀賢雪琪之下，終於得知件事暫時告一段落，但呀賢好似變到突然有啲奇怪。



「小熙我真係好鍾意好鍾意你...⋯」

「傻豬，做乜突然咁講啊⋯」的確，陳俊賢平時好少直接講肉麻野，多數都係用行動表示。

「你... 你唔會離開我架，係咪？」唔知點解呀賢既語氣變到好認真，令到我都正經上黎「唔... 唔會啊，做乜咁問？」

「⋯無啊... 掛住你姐。好喇，你快啲去玩喇，你訓個陣再whatsapp我喇。」呀賢遲疑左兩秒，又變返正常咁答。

「好喇，咁你小心啲喇，返到屋企話我知。Bye」




「小熙，過隔離房喇。」呀朗係我收左線之後，隨即開口「男朋友？」

「係 .. 係啊⋯過去喇？嘉浩呢？」唔知點解面對呀朗既問題，突然有啲尷尬

「哦，而家叫佢先。你拎件褸過去，個邊好似開好大冷氣。」呀朗笑左笑咁摸我個頭一下講。

「嘉浩，我地過去喇。」啊朗已經走左出房門，企係大廳對住坐係沙發既嘉浩講。

「哦，好啊」嘉浩簡單咁同雪琪交代左幾句就收左線，然後跟上前行去我隔離，同我一齊跟住呀朗行去隔離房。




係房門外已經聽到入邊既歡樂聲，呀朗一打開門，入邊同時十幾人望住我地三個。

最先回神既係Ceci，佢好簡單咁介紹「佢地就係我地粉紅組其餘既組仔女喇，嘉浩呀朗同小熙。」

望返房入邊既情況，除左Ceci, Rainbow, Leo之外，其他全部都係綠組既組仔女，一共六人。

「小熙，過黎呢邊坐！」Rainbow 對住我揮手，然後示意我坐佢左手邊。而我都笑住咁點左下頭，然後行左過去坐底。

「好喇，咁既然齊人不如大家再自介下？」綠組其中一個戴眼鏡組仔講「我叫Kelvin, Film，yr2 」

「Tiffany，Yr1，Bba」 同我同一系既，仲要有個女神英文名我當然即刻scene下條女，點知係個暗瘡大肥婆。

我當堂心入邊為呀賢默哀一秒，需知少女時代個Tiffany係佢女神。



「浩然，Yr1，Design」眼前呢個都幾陽光型既肌肉男應該係Rainbow口中既天菜，因為呢個浩然一開口，Rainbow即刻比左個眼色我。

之後其餘既人既自我介紹我都無點留心聽，就開左第一個game，國王遊戲。

相信都唔洗我多講，黎玩得ocamp既都應該要放啲好玩得。本身玩第一二輪都好簡單好正常，而去到第三輪就開始變質。

Kelvin抽中國王之後，就落命令「梅花J同紅心10，一個訓地下另一個係佢上邊面對面做掌上壓。」


「中左，唉，梅花J⋯」講野既係呀朗。
而我，就係抽中紅心10。


「wow，咁紅心十係邊個！」tiffany隨即起哄。



我見嘉浩望一望我張牌，之後就望住我，我都望番住佢。

「咦！係小熙喎！」Rainbow哄個頭埋黎睇完我張牌之後幫我宣揚開去。

「快啲快啲！」

「邊個訓低呀，不如小熙啦！」

唔知係咪我遲黎已經錯過左啲咩，佢地成堆已經變到好熟咁，我仲周不時見到浩然成日挨身挨勢想抽ceci水，但ceci又好似唔介意反而幾受落。

「咁... 我做掌上壓啦。」呀朗望一望我，之後有啲尷尬咁講。

其他人退開令到本來圍既圈變得更大，而我同呀朗就係中間個位做呢個動作。



「wow！！ 快啲快啲！」佢地開始起哄。

我訓左係度，望住呀朗做掌上壓。每一下佢壓落黎個陣我個心都跳得好快。

呀朗係咁意做左三四下就即刻起番身「得啦」佢笑一笑咁講，而我都坐番起身。

「好喇，下一round啦快啲。」

我望一望嘉浩，發現條友係咁望住ceci，我即刻望住ceci，見到佢成個人挨曬落浩然度咁同隔離既一個長髮女女傾計。

「今次我要紅心4同葵扇5！求其一個熊抱另一個然後原地轉五圈啦哈哈」抽中國王既leo好爽朗咁講，其實就算唔洗介紹都唔難估到佢讀pe。

「唔係掛」係我隔離既嘉浩細細聲咁講

「咦我係紅心十喎」ceci笑住咁企起身



呢一個monent我瞬間望住嘉浩，但群眾壓力話俾我知如果停佢地呢round會好掃興。

「嘩益你啦嘉浩」rainbow講笑咁講

「咪抽人水呀」坐嘉浩隔離既leo都笑住咁用手肘頂一頂嘉浩。

佢兩個企左起身，然後ceci笑住咁一下跳上去攬落嘉浩度。嘉浩就開始轉圈

「wow！！」

「不如嘴埋啦！！」講野既係個個組仔。

呢個時候嘉浩轉完五圈，放低左ceci。

「咪玩啦何永豪，嘉浩有女朋友架」ceci即刻笑住咁幫嘉浩解圍，然後懶自然咁坐番低。


「不如玩first Impression呀」岩岩同ceci傾計個個長髮組女話，後尾先知佢叫hana。

「好喎！」

跟住我地就分成男女兩邊，我地組將佢地分好左no。


「好喇咁女仔問先架啦」Rainbow笑住咁講「我地六個邊個最girlfriendable」

Rainbow一問完，我見呀朗同個個永豪都望左我一眼。

「咁我地男仔邊個最boyfriendable阿？」識搞氣氛既Leo隨即接住Rainbow既問題，而hana聽到boyfriendable呢個term忍唔住笑左出黎。

之後大家都係問啲無厘頭問題，例如邊個最女神，邊個最乖女啊咁，男仔就問邊個最毒撚款，邊個望落最搞笑最識social咁。

我地決定每一個人諗一個問題，到ceci問個陣，佢配合佢個個我覺得好姣既笑容問「最想同邊個發展成sp關係」，同時我見到佢有意無意咁望住嘉浩。


我越黎越覺得呢個Ceci唔簡單。