【大學故】《上到大學，原來真係會咩都唔同曬》: 四
(四)
*雪琪視覺
由於已經差唔多九點幾，過左放工繁忙時間，所以個站無咩人。
加上九龍塘呢個站最多就係啲大陸西，月台車尾位有個師奶就算見我俾個男仔扯開左都視而不見咁，加埋佢同佢個仔講野個陣啲口音，一睇就知佢係強國人。
「放手呀!」正當我想制服呀k既時候，佢先發製人將我逼左埋牆，而由於係公眾地方我怕引起其他人既目光，所以我暫時選擇屈服。
「你... 你想點呀」我忍住我既驚慌，個腦不斷諗番起個晚。
「做咩啊...」
「走開啦你... 做咩呀...！喂！」
「咪郁啦八婆！藍嘉浩有咩咁好啊？識又係我識你先，好又係我對你好啲，點解你要同佢一齊阿？我依家就要俾帽佢戴阿！」
「停手呀！唔好呀！！」
「我想點？」呀k冷笑左一下「我話過要令妳後悔架程雪琪」佢直視我「藍嘉浩個晚對我做既野，我要妳黎還」佢冷冷咁講。
呢刻既我覺得好心寒，嘉浩... 到底對呀k做過啲乜？我混亂既思緒不斷組織緊當年發生過既事。
呀k由中一開始同我同班，中二個年開始鍾意我。但係我對佢並無感覺，所以我拒絕佢之後都一直同佢保持距離。
但係佢無放棄，反而成日獻殷勤，久而久之我就對佢開始反感。
之後佢應該feel到我對佢越黎越cool，就三口六面同我講話想同番我做朋友，叫我唔好再避佢，而我都答應左佢。
雖然咁講，但我都知佢一直覺得最終可以感動到我，所以佢都係好積極對我好好。反之，我對佢都係朋友咁，正確黎講係當普通同學。
中三個年我同嘉浩一齊左，呀k表面好似好無野咁，但係其他同學口中所得知，原來呀k一直諗緊點樣可以搶到我番黎。
我個陣真係無野好講，偏偏班主任硬係鍾意將我同佢分埋一齊坐，一坐坐足成年。我唯有成日有意無意咁提起嘉浩黎令呀k放棄。
中四個陣，我同嘉浩曾經因為一啲事而鬧交，呀k就係呢個時候走出黎安慰我陪我飲酒。之後佢居然落藥係我杯野度，之後仲差啲搞左我。
好彩當時呀賢突然出現救左我我先無事。而嘉浩係係當晚經呀賢口中先知呀k想搞我，就去左搵佢理論。
第二日，呀k就無番學。嘉浩話過已經俾左教訓佢，一個禮拜之後呀k就退左學。
諗番起，我真係唔知嘉浩對呀k做過啲咩，佢亦都唔肯講。
「鄺... 鄺曉輝，你落藥想強姦我我都未同你計，你好意思黎搵我報仇？」唔係... 明明當初我先係受害者!
「 點解？點解你係都要揀嘉浩唔揀我？ 」呀k聽到我提番個晚既野，即刻好激動咁捉住我雙手。係我掙扎既同時我部電話係褲袋跌左落地。
「放手... 放手呀！」我使盡全力想推開呀k，但由於我俾佢逼左埋牆，而且雙手俾佢緊鎖住，令到我個重心偏向後唔能夠向前用力。
「哈」佢笑左一聲「妳想妳好姐妹同埋好朋友嘈交既，咪當我耳邊風囉」
我呆左一呆，然後雙手自然咁放鬆左。
佢隨即拎出自己部電話，撳左兩下，就轉過黎俾我睇。我見到佢電話入面有條片，望落係似偷拍既。
呀k撳左播放鍵，只見畫面中既呀賢同埋中四個陣隔離班既張佩悠係我地中學既殘廁入面搞野。
「陳... 陳俊賢？」當下我成個人窒曬機。一黎係我諗唔到呀賢之前會咁樣，二黎係點解呀k會有呢條片。
雖則個陣呀賢同小熙未一齊，但個期佢應該追緊小熙架喎，佢搞咩啊。
呀k應該睇得穿我既疑惑「條片係我退學前兩個月左右發現既」佢停左一停「估唔到當時貪玩偷拍左落黎終於會有用到既一日」佢望住自己部電話笑左一笑「條片拍得咁清，唔知放上高登會幾快俾人起到底呢可」
我真係好嬲，我唔係嬲佢威脅我，而係因為我既事而搞到小熙同呀賢。呢刻我真係忍唔住，舉起手就想兜巴車埋去佢度。
但係呀k好敏捷就捉住左我隻手「諗清楚啊妳」佢fing一fing佢部電話。
「咁你到底想我點。」我好無奈咁問佢
「同我一齊」同時佢既視線同我對上左。
「你！」當下我真係嬲到唔知講咩好，任由我再強忍，都忍唔到我既情緒。
我一手稱起佢衫領。
呢一下係我今日第一次好好地咁望清楚呀k個樣。起碼三年無見，佢失去左昔日個種mk味同埋成日笑既樣，取而代之既係個份成熟同埋好令人打冷震既笑容。
呀k應該估唔到我會有呢個舉動，更加估唔到我可以一手稱得起佢，佢既表情顯現出一絲驚訝。
「雪琪！」呢個時候一把男聲由遠處傳黎，劃過整個月台。
我同呀k下意識另過去一望，只見呀賢係扶手電梯跑緊過黎。
呀k首先回過神黎，一腳將我部跌左落地既電話踢走左。
「屌！」
正當我想開佢片既時候，呀賢已經走到埋黎，而我地呢一連串既真人show已經吸引左唔少人既目光。
呀k即刻捉住我，但矮過佢既我係打架方面明顯俾佢有優勢。我起飛腳踢落佢要害，佢估唔到我會郁腳，瞬間痛到烏低左腰。
我即刻去執番部電話。
「鄺曉輝，唔該你唔好再搞雪琪。」呢個時候呀賢行埋呀k度，然後同佢講。
「哈」呀k冷笑左一下「英雄救美啊？點啊，原來你條八婆之後同左陳俊賢一齊啊？」呀k提高聲量對住我講。
「呀賢，佢手機... 」我示意呀賢搶呀k電話，但係呀k已經率先一部緊握住部電話。
呀賢個樣好疑惑咁望住呀k，然後目光停留係佢部5s度。
呀k撳著部電話，然後將屏幕轉過呀賢個邊「唔想條片流出既你就死開。」佢對住呀賢講。
我見到呀賢個樣先係呆左一呆，但不足兩秒已經回復本來個好惡既樣，並一手揪住呀k衣領「你即管將條片流出，我唔撚會care」講完呢句，呀賢一下將呀k推開，然後轉身行過黎我個邊。
「點呀你有無事呀」我見到呀賢個樣有啲內疚「sorry阿我應該一早就送埋你。」
「傻啦，程雪琪又點會有事阿？」我笑左一笑。但我心裡面一直諗，呀k到底想點啊？
我另轉去望一望呀k，只見有啲圍觀既人係度問佢有無事諸如此類，而佢就無視啲人咁踏入左岩岩到月台往中環個班車。
「條片... 點算阿」我擔心咁問
「算啦」呀賢淡淡咁講「其實都過左咁耐，就算起到又點，加上岩岩個個女仔個樣都睇唔到」
「下，咁都叫睇唔到？個個咪張佩悠囉」
「哈... 個個係呀詩黎」呀賢笑左一笑，然後望住我
呀賢堅持要送我番去，但去到中環我就逼佢上番車，因為佢聽日番早，費事佢太夜番。
「得架啦我唔會有事，都就到啦最多我飛的咁好未呀陳生？」我笑住咁講
就係我講完呢句，我就收到嘉浩電話。
「嘉浩打黎啦，你放心啦？」我舉一舉部電話
「咁好啦，小心啲啊」呀賢同我道別之後，我就接左嘉浩電話。
「肯打黎啦咩衰人」我扮唔開心
「鄺曉輝係你個邊啊？」嘉浩好緊張咁完全無視我既唔開心
「無事啦，呀賢岩岩趕到又救多我一獲」
「唔係啦，等我同嘉嘉講調左個鄺曉輝走先」嘉浩好急咁講
「傻佬，無事呀，放心啦，你女朋友同你挑都贏過啊，我又點會有事阿？」我笑住咁講「你今日點啊。」
「岩岩沖完涼啦，勁攰啊今日」嘉浩個邊有好大既風筒聲，好明顯係有人吹緊頭。
「好無玩呀，有無女女！」
「還好啦，我全程同小熙一齊啊傻妹」唔難估到嘉浩依家對住個電話發放佢個好charm既笑容
「算你啦」
「嘉浩我地過去啦」另一邊傳黎一把男仔聲
「哦好呀」嘉浩回應左一句
「你去玩先啦，聽日打俾我」我笑住咁講
「好啦，妳早啲訓啦，我愛妳」
收左線之後，我都已經行到屋企樓下。