【大學故】《上到大學，原來真係會咩都唔同曬》: 三
(三)
*雪琪視覺
我地一行十人去左附近一間餐廳食野。呀賢坐我右邊，而組爸就坐左係我左邊。
我見到條mk yuki用個好唔友善既眼神望一望我，然後行左去呀賢另一邊坐低。但由於十個人有啲混亂既關係，其他人都無發覺佢呢個舉動。
我心諗，做乜撚野。
呀賢一坐地已經即刻拎個電話出黎諗住搵小熙，但小熙依然無上wtsapp。
「全日都無on過，有無真係咁忙啊」呀賢對住我輕聲抱怨左句。
「咁可能真係多野玩呢，嘉浩都未打番俾我啦。」我望住一臉擔心既佢講。
「咦呀賢你同雪琪係情侶呀？」呢個時候yuki突然問呀賢，同時吸引在場所有人既目光
「唔怪得啦！你兩個今日全日都一齊行」呀琳再次露出佢個個梨渦。
我睇得出嘉嘉個個疑惑既表情。
「唔係呀，我地...」正當我諗住解畫個陣，阿k無啦啦笑住咁講「唔洗怕醜啦，你地係第一對情侶喎，拿預左俾人抽水架啦」
鄺曉輝擺明玩野。
在場除左呀賢之外，佢係唯一一個最清楚知道藍嘉浩係我男朋友呢個事實。
我同呀賢咩都未講到，就俾佢地你一句我一句無限抽水，最後我同呀賢只好以好無奈既微笑去回應。
我望向yuki，佢笑得好撚樣衰咁望住我，我隨即另番轉面。
「咦組爸你唔出聲既」阿k有意無意咁問組爸
「哈，無呀，見大家岩岩都傾得咁開心，不如我地玩個遊戲呀」
「咩遊戲呀」
「每人順著咁問一個問題，邊個唔肯答就當輸，輸左請食飯啊哈哈」
其實呢個所謂遊戲都係想俾我地再了解下大家姐。
但唔講真係唔知，原來笑起上黎好甜又幾靚女既呀琳仲係A0；好cool既karson原來係加拿大讀過兩年書再經non jupas入u；條mk yuki中學個陣居然係head prefect。
而最屈機既係組爸朗昇，原來佢同我地同年，成績優異既佢係中五個年直接俾Z大 medic取錄左，係佢言語間聽得出佢屋企應該係幾有錢。
傾下計食下野咁，好快又過左個幾鐘。
食完野，基本上大家都散band。
「拿記得後日唔好遲到呀！有咩大家再係group傾啦」行出餐廳之後，組爸就對住我地講
互相道別後，我就同呀賢一齊行落地鐵站。
「叮」
呀賢即刻反射性動作咁拎個電話出黎，但個電話無著mon
「叮」再次傳黎wtsapp既訊息提示，今次我feel到我褲袋震左一下，原來係我有msg。
「hi(笑喊)」第一個wtsapp msg
「今日覺得點呀(笑喊)」第二個wtsapp msg
係一堆我無save名既數字，但數字後面個名話我知係組爸朗昇
「無咩點呀，都ok呀幾好玩」
係我隔離既呀賢由見我拎電話出黎個刻已經望住我電話，條友慌死唔係以為嘉浩覆左我而小熙未覆佢咩。
「條狗公十成想狗衝妳啦」呀賢係一邊笑住咁講「我要話俾嘉浩知先得啦」
「唔係呀？但佢地岩岩唔係以為你係我男朋友咩，會唔會明知都咁猖狂」我望住嘉浩個欄，原來佢九點幾個陣on過wtsapp，但係就無搵我。
「有啲男人係咁架啦，理得你有無男朋友，分分鐘就係有男朋友先對你落手，就算之後有啲咩事都唔怕你爆出去。」呀賢望住我講
「吱～吱～」
「喂bb，好掛住你啊我，咁遲先打黎，好無玩啊」呀賢一接個電話就轟炸另一邊個個人，唔洗問都知係小熙。
我地一路行到月台，而呀賢就同小熙傾足咁耐。
我同呀賢係月台分道揚鑣，佢搭去荃灣個邊，而我要搭番中環個頭。
講完再見，我就拎電話出黎諗住聽歌。
突然後面有人拍一拍我。
我另轉面，係呀k，佢一下捉住我然後拉左我去車尾一個暗角位。
*小熙視覺
返到營地後，都不外乎係計下分，聽下mc講野，dem beat，分房分sponser，之後簡單咁食個飯後再玩多左個大game就返左房。
但當然，去ocamp最爆既實際上係夜晚既房game，而我地粉紅色組就決定去同綠組一齊玩。
原因係Ceci同Rainbow都話綠組個組爸同其中兩個組仔好正，於是就叫埋我陪佢地。
「小熙，我地過隔離房玩喇。」 Rainbow急不及待咁拉住岩岩沖完涼既我講。
「我要吹埋頭先啊，不如你同ceci過去先？」我諗住打比啊賢先，今日全日都冇點覆過佢，佢一定好擔心我。
「咁好喇，你一陣記得過黎啊！」見Rainbow一臉期待既樣，我就點左下頭之後望向坐係沙發既Ceci講「我吹埋個頭過黎啊。」
「好喇，咁你一陣記得過黎喇。」然後佢兩個就拉埋Leo去左隔離房。
因為組爸媽同OC去左開會既關係，房入邊而家得返係廁所吹緊頭既我，係另一個廁所沖緊涼既嘉浩同係沙發食緊杯麵既啊朗。
「咦？你做咩唔跟Rainbow佢地去埋隔離房啊？」我一邊吹頭一邊問。
「無啊，諗住食埋個杯麵先，真係好撚肚餓。」啊朗望左我一眼之後答。
「頭先唔夠飽咩？我見你食左好多野喎！」
「唔好睇我好似好瘦咁，其實我食極唔飽。」
的確啊朗同普遍香港男仔一樣都係唔肥又有啲肌肉個種類型既男仔。
「唉，你就好喇。我就要就住食喇，驚肥啊嘛。」
「你都唔肥，有啲肉地幾可愛啊！」啊朗呢個時候食完杯麵就行左入廁所掉垃圾，不過掉完之後佢無即刻走到，反而企係門口望住我。
「做咩啊？你都想吹頭？」見佢眼甘甘咁望實我，我就好自然加快吹頭既速度，然後就比左個風筒佢。
而啊朗呆左一呆，之後微微咁笑住接左我比佢既風筒「唔該曬。」
「唔洗，咁你吹完頭記得收返好比我啊。」講完之後，我就拎左電話走左入女仔房打比啊賢。
「喂bb，好掛住你啊我，咁遲先打黎，好無玩啊」電話一接通，啊賢已經不停咁講野。
「無啊，今日全日都好忙好多野做，所以咪覆你唔到囉」我抱住歉意咁答「Sorry啊，我聽日會覆你多啲」
「傻妹，我講下炸。我都係擔心你姐，你小心啲啊，有冇整親啊？」無錯，果然係我男朋友，知我成日整到。
但費時佢擔心我，於是我就話「無啊，你呢？今日雪琪同你oday喎！有冇靚女同組啊？」
「除左雪琪之外，仲有兩個mk妹一組囉，不過我覺得佢地無個夠李穎熙靚。」
陳俊賢一提到mk妹三個字，我即刻問「MK妹？咁佢地知唔知你有女朋友啊！？」
「有個叫Yuki既係咁煩我，之後雪琪就扮係我女朋友趕走左佢囉。」啊賢同我解釋「不過我同雪琪真係無野嫁！係想個mk妹唔好煩我，之後我又同雪琪講，咁雪琪佢又走左過黎，但佢又⋯...」聽到佢咁緊張既語氣就想像到佢而家一定好慌張面都紅曬個樣。
「嘻嘻，知道喇，傻豬。你點會真係同雪琪有野，我都無話唔信你，你咁緊張做乜喎。」我笑住咁講。
「咁... 咁我驚你誤會啊嘛！」啊賢聽到我笑，都放鬆左咁答。
「傻喇，你同雪琪份人我點會唔知姐！咁組仔呢？」
「都無乜特別，不過同左啊k一組囉。」
「下？啊k？鄺曉輝？之前中意雪琪個個？」聽到啊k個名既我不禁加大左聲量，好緊張咁追問。
「係啊！佢仲不停望住雪琪，唉，條友真係唔知想點！」啊賢提起啊k都開始起火。
「咁... 咁你有冇送雪琪返去？」我起皺眉頭，好不安咁握緊電話。
「無啊⋯... 都唔順路...」
「頂你，陳俊賢你快啲去送雪琪返去！個啊k真係痴線架！」我焦慮不安咁同啊賢講。
「唔會既，雪琪佢學跆拳道同泰拳架喎，點會有事姐。」啊賢聽到我既要求，都開始擔心上黎。
「你去唔去啊？我而家要打比雪琪，你而家快啲同我送佢返去啊！」好少對啊賢提出無理要求既我一講完，都成功令啊賢妥協。
「好喇好喇，咁我送完佢再打返比你好無？」
「好，唔該曬bb」知道啊賢就左我，我都好識做咁嗲返佢。
一同啊賢收左線，我即刻打比雪琪，但係就打極都無人聽。
「快啲聽電話喇，程雪琪⋯...」不安感繼續強烈上升，直到突然電話接起。
電話傳出既係啊k把聲「點解？點解你係都要揀嘉浩唔揀我？」
然後已經係電話跌左落地同雪琪掙扎既聲音⋯⋯。