【大學故】《上到大學，原來真係會咩都唔同曬》: 二
(二)
*雪琪視覺
「吱吱～」我下意識伸手去床頭櫃拎起部電話。
「咩事啊」我眼都未擘打咁接聽左個唔知邊個打黎既電話
「你仲未起身啊？」電話另一邊傳黎一把好熟悉既男聲。
「幾點呀依家，我琴晚同你條女facetime到成兩點呀眼訓到呢」我仲係昏睡狀態
「十一點啦，你豬黎？今日oday喎白痴!食唔食野啊，買黎俾你喇」呀賢笑住咁串鳩我
「一點半先係，大把時間啦... 好喎，雞肉清湯加皮蛋，唔該曬」
「屌妳都估到妳架啦」
「些些大佬，bye」
拿，你地唔好誤會阿，我同呀賢係fd黎咋。我同佢識左都幾耐下，我同佢咁fd都係因為嘉浩，而佢一直都當我妹咁看待。
中三個年陳俊賢無啦啦係學校出曬名，除左因為係籃球隊隊長之外，中三個年佢無啦啦剪左個韓仔齊陰頭番黎，加上本身樣唔差既佢，完美吸引一眾迷戀泡菜國既女女。
而當時同佢同班既我對佢又無咩感覺，只係覺得佢個樣順眼左。
但班上面既女同學就真係不得了，即刻發曬春咁，十足啲偶像劇入面啲姣雞咁日日痴住呀賢，個陣既我真係得啖笑。
一次調位，調正我同佢坐，就係咁開始同佢有啲交流咁，但都唔算好熟。
直至中四個陣我同嘉浩一齊左，而嘉浩同呀賢係小學已經識既好朋友，我先同呀賢變熟。
「叮噹 —」我起身去開門
「咁快既你，依家唔係lunch hour咩」我笑住咁講，同時讓開俾呀賢入黎。
「效率呢啲野你識咩啊」佢除左鞋，就行入黎。
「喂係喎，你估ocamp我地同唔同組呀拿」我係廁所一路刷牙一路問佢。
「咩呀」呀賢話「嘉嘉無同你講咩，佢特登編我地係同組喎」
「咁好」
「係啊。係喎小熙有無覆你啊」呀賢望住個兩個灰剔既msg問我
「未呀，唉佢地玩緊啊嘛，嘉浩會幫你睇住佢既」我坐係呀賢隔離打開兜譚仔。
「話唔擔心就假既」呀賢擔憂咁講，不過我都明既，去得ocamp其實預左俾人抽水架啦，但好彩有個fd係隔離睇住，都叫放心啲。
「喂如果到時我俾人抽水你要救我啊」我講笑咁講
「唔係掛，抽都唔抽妳啦」佢望都無望過我一眼
「屌你呀」我拍左佢手臂一下
「唉屌我叫左妳食快啲架啦，搞到又遲。」
「收皮啦你，你都係早我一秒先食完隻雞翼架咋！」我即刻窒番佢。
「搭八啦頂」呀賢望一望手錶，然後就同我一齊狂奔入Z大。
我同呀賢衝左入Z大既入口，好快就見到一班著住粉藍色衫既人係門口。
「hi同學，係咪迎新架？」一個大概米五五既包包面女仔好nice咁問
「係呀」我笑住咁回答
「你地沿住呢條樓梯上到三樓轉左就係架啦」佢用手指示意俾我地睇。
我同呀賢即刻狗衝上去。就係我地去到門口個陣，我見到一個好熟識既身影。
「鄺曉輝？」呀賢俾我更先一步講出呢個名。
係我地前面個個男仔聽到之後，隨即另左過黎。呢一刻，我地三個都定左係度。
「做咩啊...」
「走開啦你... 做咩呀...!喂!」
「咪郁啦八婆！藍嘉浩有咩咁好啊？」
「停手呀！唔好呀！！」
「估唔到咁都撞得番你地」鄺曉輝冷笑左一下「好耐無見，陳俊賢，程雪琪。」佢對呀賢講完呢句，就將目光放係我身上，用個好鋭利既眼神望住我，然後下一秒，佢就同呀賢擦肩而過。
呢一刻我既心泛起一陣陣既恐懼，前所未有既不安感直湧上我心頭。
「妳無野呀嘛？」呀賢拍一拍我，我先發現原來我隻手係度震緊。
「無... 無野，我ok」我勉強咁笑左一笑，然後就推開B301既大門。
「雪琪！呢度呀」我一望過去，就見到嘉嘉揮手示意我地過去。
「嘉嘉！」我忍唔住衝左過去佢個度。
我地已經差唔多年幾無見，估唔到當初無讀中六既嘉嘉報左夜校進修之後會入到U，依家同我仲要同一科。
講真真係放心好多，始終有人照住。
「嘩好耐無見啦陳俊賢」嘉嘉微笑住咁對呀賢講。
「估唔到咁有緣」呀賢都對住嘉嘉笑左一笑，呢個時候我見到係嘉嘉隔離個個有啲mk味既女仔目不轉睛咁望實呀賢，同時嘴角慢慢上揚。
「不如我地做多次簡單既自我介紹啦！拿我聽組媽講你地一早已經識架啦，咁我就係你地黎緊ocamp既組爸，我叫朗昇，讀medic year2」唔知係咪我多心，呢個組爸由一開波已經淨係望住我講，所以我禮貌上都笑住咁點左下頭。
「我叫yuki，讀marketing」個個mk妹既眼光依然離不開呀賢，呢條女相當有嫌疑。
「hello我叫呀琳，讀history架」mk yuki隔離個個一頭全黑直髮女仔笑住咁講，同時嘴角露出兩個淺淺既梨渦。
「karson，讀chem」一個戴住副眼鏡既男仔好cool咁講。雖然坐係度睇得唔清楚，但佢望落起碼都有米八五左右。
「咦呀k岩岩去左洗手間，呀佢番黎啦」嘉嘉望一望門口，然後再望一望手上面份資料講。
我一秒另轉面，見到鄺曉輝行緊過黎。
出於自然反應，我好用力咁捉住呀賢隻手臂。
「喂你去咁耐架，岩岩齊人，你自我介紹下先啦！」組爸即刻帶動氣氛
我見呀k用個意味深長既笑容住咁望住我，然後好陽光咁笑住講「我叫呀k，讀music」
「好啦到你兩個啦，快啲啦」嘉嘉笑住咁用佢手上個file係我面前揚左兩下
「... 我... 我叫雪琪，讀social work」我仲未冷靜到我既思緒
「我叫呀賢，傳理系」呀賢講完笑左一笑。
之後組爸組媽就諗住同我地破下冰玩下遊戲咁，但我真係完全提唔起勁。
我不時見到呀k望住我，佢個樣話俾我知我未來將會死撚緊。
都係經過啲簡單既game，我地都開始熟。
「拿記住我地係紅組，歷屆紅組次次ocamp都大獲全勝架，我地今年都要得唔得！！」
嘉嘉同朗昇講好曬ocamp當日既概要之後，都已經差唔多七點幾，都差唔多係時候散band。
「一唔一齊去食野啊？」行出B301房之後，組爸有意無意咁行我隔離然後問大家。
「一齊去啦，大家熟下傾下計嘛」嘉嘉另過黎對住我地報上一個大大既微笑。
我望住呀賢，佢一副無所謂既樣，於是我就拎電話出黎wtsapp左嘉浩「bb，我依家同呀賢同埋ocamp啲人去食野呀(豬)」
嘉浩既last seen仲係係三點半，我再撳入小熙個對話欄，last seen都係兩點幾左右。睇黎ocamp真係好多野玩咁。
「係喎你中學讀邊間架？」
「唔出名既band2中學，講你都唔識架啦」我笑左一笑
「哈唔好以為band1一定勁呀，我個間都好多入唔到大學...」
一路上組爸係咁聊我講野，而基於禮貌我都笑住咁回答佢。
「係喎妳電話幾多號啊？」佢將佢電話遞俾我。可能佢見我猶豫左兩秒，就隨即補多句「岩岩你未到個陣我地開左個group呀，依家加番你同呀賢入去。」佢講完就露出佢個個好charm既笑容。
我俾左電話佢之後，佢就拉左我入群，之後佢就行去呀賢度問佢要電話。
呢個時候我另過去望住岩岩一路上係咁同呀賢吹水個條mk妹yuki。
條女個妝真係濃得有點過份，根本去oday ocamp係唔需要化到咁(我認為)。
佢上身著住件貼身小背心，同樣係女仔既我一眼就睇得出佢心口前個對野塞左幾厚墊；而下本身就係一律mk妹係旺中買50蚊條個隻典型熱褲，總之一個字，好撚姣呀你老未。
我用大概五秒scane完條女，就望住呀賢。佢岩岩俾完電話組爸，抬高頭就同我對視緊。
我用眼神叫佢好自為之，而佢就好無奈咁望住我。
「快啲過黎救我啦頂你個肺，條女好煩呀」我一睇wtsapp，原來呀賢向我求救。
「係喎雪琪，妳有無興趣入dance so阿，我覺得...」
「等陣呀」我對住朗昇佢笑左一笑，之後就走去呀賢度「喂我老豆老母過左澳門，今晚屋企無人，上唔上黎訓」我俾曬眼色陳俊賢，同時同把懶細聲其實條mk妹一定聽到既聲講。
只見我一講完，條mk妹已經一秒變臉然後走去前面聊第二個男仔傾計。
「你想小熙轉校過黎Z大你就繼續咁啦陳俊賢」我都一秒變臉
「明明我都係受害者喎」呀賢好無奈咁講。
但估唔到原來我呢番說話唔單止係yuki聽到。
*小熙視覺
做完旺角站既任務，我地組就準備搭車去深水埗。而我同嘉浩就好自然一齊行。
「係喎，你啲行李呢？」嘉浩見我淨係拎住個細書包問。
「我頭先返左轉學校放底左比營長佢地啊，好彩趕得切佢地架車未開咋！」
「叫左你琴晚早啲訓架喇，明顯你遲起身，扮咩唔舒服姐。」果然係中學同學，比佢講中左既我都唔服輸咁答「我陪你女朋友FaceTime啊，佢係咁叫我睇實你。」
「係喇係喇，我同你一組可以做得啲乜啊。」嘉浩一臉無奈咁笑左笑。
「喂，小熙嘉浩！你地講緊啲咩啊？我地一齊傾喇！」組爸峰突然轉身同企係最後既我地講。
「係囉，唔好放閃喇。我地盲喇。」肥軒好誇張咁雙手掩眼，動作表情滑稽，我地成組都笑左出聲。
「唔係啊，我地唔係男女朋友關係，你地誤會左喇！」嘉浩見狀一邊笑一邊答。
「係啊，我好姊妹先係佢女朋友。我幫佢黎睇實嘉浩架咋！」我都隨即回應。
「喔！仲以為你地拍住拖咁入黎，等我仲羨慕左成朝。」組媽Angel道。
「乜媽媽冇男朋友咩？」Leo呢個時候問。
「無啊，你媽媽都想要返個... 」組媽Angel扮到好哀怨咁講。
「所以要食組仔囉！」肥軒表示有花生食了。
「頂，講呢啲，死肥仔！」媽媽笑住咁打左肥軒一下。
成個氣氛都好歡樂，好快就去到金鐘站，要轉車去對面線。
金鐘一直都係好多人既轉車站，面對住大量人潮擁擠既情況，咁岩我就係個啲成日行平路既人都會跌親既人，於是我一落車就已經比企係身後既大陸人既行李箱kick到好幾次。
突然間，有個大陸女人好大力咁撞左我一下，而我亦都順理成章咁向前跌。
我以為藍嘉浩個死仔會明知我係啲成日跌既人會扶下我，點知佢掛住同Leo傾琴日德國場波踢成點，完全見唔到我跌左落地。
「好... 好痛...」因為著住短褲，而且撞到唔知邊個大陸人既行李箱，我再回神之時已經feel到右邊小腿有條好長既血痕。
但面對一直湧上既人潮而我又即刻起唔到身，不安感直湧心頭。我強忍痛楚咁移到牆邊。
呢個時候，一個身影黎到我隔離，半抱半拖咁拉左我去上落樓梯比較少人既位。
一直以為對方係嘉浩，我都無抬頭，只係不停整隻腳。一黎擔心留疤，二黎驚唔知有冇屈親行唔到。
「你再整就會留疤架喇。」聽到唔係嘉浩把聲，我即刻抬頭望左對方一眼，原來係偽韓mk仔啊朗。
「唔... 唔該曬你」我瞬間覺得好尷尬，只好低頭係袋入邊拎張紙巾印乾啲血。
「你咁樣對個傷口唔好架！」啊朗一講完已經拎左張濕紙巾出黎幫我整理傷口。
「會有啲痛，你忍下⋯」
「喔... 喔⋯」我繼續尷尬咁坐係樓梯間，望住啊朗幫我消毒完傷口再貼左膠布。
「搞掂，你郁下隻腳睇下點？」
「冇... 冇事喇。唔該曬你。」雖然仲有少少痛，不過都可以忍到。
「唔洗，我地快啲去搵佢地囉。」突然間覺得眼前既啊朗雖然外表mk，但應該係個幾溫柔可以交心既人。
於是，我報以微笑咁點頭。
「李穎熙！」
「小熙！」
其他人離遠見到我係啊朗既攙扶下慢慢企起身，即刻狗過黎。
「你個死蠢又跌親？有冇事啊？」嘉浩一臉擔憂咁望住我。
「無...無事...」我伸隻腳比嘉浩同其他人睇，表示自己真係冇事。
「好彩多得啊朗炸，而家冇再流血喇。」
「咁你行唔行到啊？」Rainbow上前扶住我問。
「嗯，冇事啦。我地出發喇！」我笑完仲行左幾步比佢地睇。
「對唔住啊，頭先掛住傾計⋯...」嘉浩未講完，我已經答「傻喇，而家冇事咪得。對唔住啊，要你地擔心我。」
為左就住我呢個傷者，組爸峰決定做完銅鑼灣既任務再做啲可以係車到做既mission 就返營地。
因為有9個人關係，我地分左兩架的士，男仔一架，女仔一架。
「唉，都唔知會唔會輸。我地淨係去左三個地方咋 ...」Ceci有意無意咁望左我幾眼，而我都唔好意思咁即刻道歉「唔... 對唔住啊⋯，希望唔會輸喇... 」
「係囉，邊有咁易輸姐。我地做曬旺角同銅鑼灣任務有得再加分架嘛！」組媽Angel笑住咁安慰我地。
「唉，希望喇⋯⋯」Ceci好唔開心咁講。
就係咁，我地有啲頹咁返左營地。