【大學故】《上到大學，原來真係會咩都唔同曬》: 一
(一)
*小熙視覺
「李穎熙，你一定要幫我睇實藍嘉浩條死仔呀！你呀，夠膽帶女番hall既話我jer都扯斷你！」
呢個咁有霸氣既就係我老死程雪琪，而佢口中所講既藍嘉浩就係佢男朋友。
我同雪琪係由中四個年識既，依家諗番起，當時誓死都估唔到我同佢會做到好朋友。
雪琪係一個好豪爽既女仔，加上學開跆拳道同泰拳，就顯得佢更加man。
雖然既性格好男仔講野又直又鍾意串柒我，但只要有其他人恰我，佢一定第一時間企出黎幫我。
「衰妹，我係帶都淨係帶妳一個番啦。」呢個身高目測米七五戴眼鏡既男仔一手拉左雪琪去佢度。
無錯啦，佢就係藍嘉浩，姐係雪琪男朋友，聽雪琪講佢地係中三個年一齊既。
嘉浩一直都俾人好陽光好大哥哥既感覺，而且eq高又溫柔，之前一齊番pt個陣遇正啲麻煩客我地都會推俾嘉浩黎處理，有時真係幾佩服佢啲耐性。
據我所知佢媾到雪琪番黎唔多唔少都係關佢個個好charm既笑容事。雖然佢有時係大男人左啲，但對雪琪都唔錯既。
「屌，洗唔洗咁痴纏呀，顧及下旁人既感受好喎你兩個。」企係嘉浩隔離個個大約米七八既齊陰男仔笑住咁講，同時將手搭係我膊頭。
呢個係我男朋友，佢叫陳俊賢。唔識佢既人會覺得佢好cool，因為佢只會係熟人面前熱情。而我同佢係係中五個年係埋一齊。
係中四個年佢為左媾我，居然同佢個個一齊左兩年既女朋友分左手。
雖然我個陣係幾鍾意佢既，但係我都無接受佢。之後佢一直追左我一年幾，最後我都係俾佢感動左同左佢一齊。
好彩呀賢無媾到手就當係草，到依家為止都對我好好好專一。
「有得曬緊係曬啦」嘉浩講完，就即場當住全地鐵站既人面前烏低身鍚左雪琪一下。
「真係無眼睇，行快啲啦就黎八點啦，拿遲到我會打人」我拖住呀賢加快腳步係旺角E2出口行去兆萬。
今日係jupas放榜既大日子，而我地四個都因為順利入u所以決定夜晚去食放題慶祝。
唯一既不足，就係我同嘉浩入到同一間，而雪琪同呀賢入到同一間，成功拆散左我地呢兩pair情侶同埋好朋友。
加上X大出名多靚女，所以頭先一見面雪琪就即刻抆住我叫我同佢睇實嘉浩。
「呀係喎，你入到咩科話？」一坐低，雪琪就望住坐係佢斜對面既呀賢問。
「都話傳理落，我已經講左十萬次啦程小姐。」呀賢覆住wtsapp咁答雪琪，同時忍唔住串左佢一句「唔夠你個嘉浩勁呀，讀psycho。」
「記性差，唔好意思囉」雪琪睥住呀賢，然後另過黎同我講「李穎熙你條仔真係好煩」
「佢不嬲都係咁架啦」我笑住咁講。
我叫李穎熙，同雪琪佢地一樣今年18歲，就係今日朝早得知自己已經背上左大學生呢個身份。
而我同嘉浩之後都會係X大既學生，雖然我地讀唔同科，但起碼唔洗怕之後無人陪食lunch先啦。
除左開心之外，講真係有啲緊張既，話曬X大多靚女，而且我讀個科又係特別多女女讀既bba(好似係)，聽聞X大前個幾屆校花都係讀bba既人，我依家已經無限ff緊我係一班充滿女神既地方應該點樣立足。
「喂係喎，聽講zero都入到X大」嘉浩突然話
「你講緊凌曉峰？」雪琪一秒回應
「係啊，唔係仲有邊個」
「佢條mk都入到u，你有無收錯風呀死仔」呀賢一下批肘落嘉浩度。
「屌，佢ig自己話架，好似係讀n展」嘉浩一路講一路寫緊落單紙
「... 唔係掛」我聽到之後，自然反應咁呆左一呆。
差唔多兩年無聽過呢個名，估唔到，緣份會將我地拉番埋。
「聽日就係ocamp啦，我好緊張啊」我對住鏡頭講，同時見到屏幕另一邊既雪琪係度敷緊mask。
「你幫我睇實藍嘉浩呀！唉其實我唔想去，但嘉嘉又要我陪佢」雪琪就住佢塊mask咁講，而且完美無視我個句好緊張。
嘉嘉係大我地一年既同事，係之前番pt個陣識既。佢今年year2，係Z大讀緊social work，同雪琪同一科。
就係jupas放榜個日佢wtsapp左雪琪先發現原來入到同一科。後來先知原來今年ocamp佢負責做組媽，於是佢更加落黎拉攏雪琪去ocamp。
「係啦係啦，藍嘉浩個殼都冧掂唔少女啦，點敢唔幫你睇實佢啊？」我講笑咁講，同時亦都好明白雪琪點解咁擔心。
成日聽人講，上到大學之後，好多野都會隨時間而改變。唔知上到大學之後，我同呀賢既關係又會唔會出現變化？
「總之一得閒就要搵我呀，唔好掛住新朋友唔記得我」
「係啦傻仔，我點會唔記得你呀，恨不得帶埋你去ocamp添啦」
「係至好講，你知你架啦啲狗公成日狗衝你架嘛，唔好俾人抽水呀知唔知呀八婆。」雪琪繼續成個呀媽咁
「得啦我咁醒，你估我係你咩」我笑住咁串左佢一句
「嘩，虧你講得出呢句，唔知邊個次次俾狗公聊個陣都嚇到即刻要我蒲頭呢可」佢頂唔順窒左我兩句
「係喇，知你最好」我由心而笑咁講
「雖然唔同校，第時都要每晚facetime呀！」
「唔講住啦，我要訓，聽朝好早起身」我望一望個鬧鐘，原來已經一點半。
「好啦，記得wtsapp我呀，記得記得幫我睇住藍嘉浩」雪琪死唔斷氣咁講。
「得啦煩！屌！」
「對唔住囉娘娘，奴婢知罪啦，早啲訓啦你」
「聽朝搵你啦bb，早抖」
收左雪琪線之後，原來呀賢一早wtsapp左我
「聽日起身wtsapp我呀，ocamp小心啲啊知唔知」
「知啦，我訓先啦，晚安(心心)」
「已經做緊第二個任務喇，全組等緊你啊，on9」我岩岩行出地鐵站就收到嘉浩既wtsapp。
「得！我狗衝緊上黎！」我覆完呢句，就拿拿聲狗衝上地面。
之前因為我同嘉浩都要返工既關係，我地都冇參加到oday，只係知道我同嘉浩同一組，都係粉紅組。
一去到朗豪坊門口，已經見到一行大概八九個著住粉紅色Camp Tee既年輕人。
「小熙！呢邊啊！」嘉浩一見到我行近既身影就同我揮手，令全組人都同時望住我。
我好自然咁行左去嘉浩隔離，個死仔另一邊係企左一個abc型既女仔，本來熱情咁同緊嘉浩傾計，見到我黎左之後好簡單咁對我點左下頭就收左聲。
於是我滿眼笑意咁用眼神示意「你死啦，我話比雪琪知」，而嘉浩即刻不停搖頭咁望住我。
「Hello，你就係李穎熙啊？」眼前一個笑得好好睇既女仔問我，而我都點頭微笑「係啊，你地叫我小熙就得啦！唔好意思啊，因為⋯今朝有啲唔舒服，所以遲左黎⋯」
「唔緊要，我係組媽Angel，讀Year 2 Social Work」
「我係組爸啊峰，讀art year2架」一個都幾高幾陽光型既男仔同我講
「我係你地組既oc，肥軒 year2工程」人如其名，講野既係個肥肥地但笑起上黎好親切好惹人歡喜既肥仔。
「好喇，終於齊曬6個組仔女喇！到我地啲組仔女介紹自己喇。因為小熙上次返工黎唔到Oday，而家先黎到同大家見面。不過冇關係既，我地就係呢三日兩夜到玩到熟！好無？」組媽Angel好興奮咁帶領成個氣氛，而組爸同oc都即刻到反應。
「我係啊朗，讀BBA Year 1」 一個偽韓mk仔望住我笑左笑
「Leo PE Year 1」 讀體育真係唔同啲，果然係又高又多肌肉。
係我正意淫緊Leo既同時，嘉浩用返頭先我望住佢既眼神望返我。於是我即刻回神繼續聽其他人既自我介紹。
「Ceci，讀Year 1 art」 原來頭先痴住嘉浩既abc既女仔就係叫Ceci，我相信佢將會成為我觀察既目標。
「Hi，我叫Rainbow，讀Environment year 1」 Rainbow係一個東菇頭戴眼鏡比人好親切感覺既女仔，我都隨即對住佢報以大大既微笑。
「我同佢係中學同學黎，就唔洗自介喇」 嘉浩講完打左我一下以表示我同佢好熟，而我都不忿咁打返佢手臂一下。
「咁大家而家要加油喇，出發做任務喇！輸左要食個辣雞麵唔比飲水啊！」組爸峰一講完，我地成班即刻打起精神做任務。