我們怎麼了？: 76
又過三巡，在阿斌訴說了自己的往事之後，三個人又繼續高興的喝酒。期間，謝宣諾也有跟阿斌說起自己去了泰國和回來香港後的事，包括Sandy和家寶的存在。
阿斌給了謝宣諾很多安慰和鼓勵，而簡仁也聊得愈來愈起勁。三個人圍在大廳中暢所欲言，當中涉獵的話題包括愛情、家庭、足球、事業還有兒時的集體回憶。
「係呀係呀，哈哈，果時打天堂一見到蘋果草條友就追住佢嚟打，有時我打飛龍點知成班月族幫條龍加血加速，我由龍谷拉條龍拉到去古丁先放棄唔打。」阿斌眉飛色舞的說著，旁邊的簡仁和謝宣諾在大笑
「月族班人好賤，不過我同建倫都唔弱，成日等佢地掛機時去整紅佢地，哈哈。」簡仁喝了一點酒，情緒高漲的大聲說
「喂，細聲小小啦簡仁。」謝宣諾掩著簡仁的嘴，另一隻手在拍打他的頭
「哈哈。」阿斌指著他們，因為他記起，讀書的時候謝宣諾也是這樣對待簡仁的。他們由天黑喝到接近天亮，大家忘掉了之前的種種，將自己的情緒帶回到那最青澀的少年時期，然後互相傾吐、互相勉勵。
就像十多年前在牛津道足球場上的那種無拘無束一樣，他們在這一晚，終於可以好好的抒發掉，對彼此積沉已久的種種感覺。
除了一件事，一件謝宣諾必須要對阿斌說的重要事。
時間快到了，不會再等人。謝宣諾收起了笑臉站起來。
「好喇，斌，我地差唔多時間要走。」
「好，我祝你呢個手術成功，好返之後，同詠莉嚟美國搵我。仲有，幫我問候佢地其他人，返到去我地再用Whatsapp聯絡。」阿斌用右手不斷翻弄謝宣諾的頭髮說。
「嗯……斌，多謝你同我講嘅所有嘢。我諗，如果唔係今日你親口同我講，我永遠都唔會相信，亦都唔會明白「諒解」呢一樣嘢係乜嘢一回事。」謝宣諾向阿斌心存感激的說
「所有事，都應該係睇目的。當日你只係貪快叫我上去幫你買，唔係有心令我發生呢件事。件事過後我都有諗，呢十幾年我冇再出現你地一定以為我死咗，諾仔你內心一定係好內疚。我有諗過一早去搵你地講聲你地知，但我又知你地一定會用盡方法咁搵到我為止，到時只會令媽咪唔開心。
每個人都一定會有不幸嘅事出現喺自己身上，如果我地選擇用負能量將呢類不幸嘅事放到最大，最後賠上嘅，只係我地一世人嘅時間。
再者，原諒一個冇心害我而又識得內疚嘅兄弟，根本唔係一件難事。我講埋呢次，下次再見，你唔好再提起喇。」
阿斌一路說，謝宣諾的反應一路變得激動，他要準備說出最後一件事。
「我地…可能，我係話可能，會係最後一次見面。」
「諾仔你講乜呀？」簡仁在旁邊說，聽到謝宣諾的這一句說話，阿斌有點丈八金剛，但隱約覺得有點不對勁。
「香港同美國唔係好遠，如果冬餘有長假期我咪帶佢返嚟囉。」
聽到阿斌的回覆和簡仁的發問，謝宣諾搖搖頭，然後重重的呼了一口氣。
「你地仲記唔記得當年，點解我要同我阿爸去美國？」
「因為你阿爸有病要去醫。」簡仁有點焦慮，因為他清楚謝宣諾的行事，所以立即搶答，希望謝宣諾快點說出箇中原因。
「我阿爸當年患咗一個病，身體入面血管同血小板出問題，令到佢就算係受好小嘅傷，都有可能大量出血，或者係流血不止。」
這句說完，謝宣諾停頓了一下，他不曉得怎麼去形容自己的情況。而阿斌跟簡仁，由不明所以，再慢慢思考，最後終於想出一點端倪來。
「你阿爸個病，你都有？係遺傳？」阿斌單刀直入的問
謝宣諾點點頭，簡仁立刻拉著他的手臂。
「點解你冇講過？有冇人知呢件事？」
「秋凝知，十幾年前我有同佢講過，果晚我喺球場同你地三個講完要做手術之後，祖立返屋企同佢講，佢就記得我阿爸係有呢個病。禽晚喺機場，祖立特登叫開你地，就係想俾機會秋凝問清楚我呢件事。」謝宣諾慢慢的說出整件事始末，阿斌和簡仁愈聽，使覺得愈是有問題。
「你話你阿爸剩傷小小都會流血不止，咁你點做手術？」阿斌找出重點來，氣氛立即變得死寂。
如果押下籌碼，謝宣諾便有可能在手術當中出現意外，而後果是不能預計的；但如果謝宣諾不押下這場賭局，就會親眼看著自己的母親隨時離開自己。
阿斌想阻止，但可以怎樣開口？自己也是剛剛經歷喪母之痛，他也有著就算做任何事也希望把母親換回來的覺悟。換了是他，他也會毫不猶豫的去做這個手術。
某個程度上，阿斌是最明白謝宣諾的一個人。
「詠莉知唔知？」簡仁問，牽涉到詠莉的，他都特別緊張
「未知，我打算做完手術先同佢講。」謝宣諾無奈，但相反簡仁卻顯得很激動。
「你明知自己會咁，你仲同詠莉講咁多？你仲去搞人地結婚做乜？」
「簡仁。」阿斌阻止簡仁，續說：「我用諾仔角度去諗，我明佢點解咁做，你覺得佢會好過？我唔知你講諾仔阻止詠莉嘅事係乜嘢，但如果諾仔真係面臨一個咁大嘅問題，整件事諗得最多最仔細最立體嘅，唔應該係佢咩？」
簡仁被阿斌問得正中要害，一直以來，他到底是用什麼角度去看謝宣諾的問題？是多年兄弟的體諒，還是出自對詠莉的私心？
「我同詠莉講，都係同一個原因，我唔想再因為自己嘅猶豫，令自己再失去可以表達嘅機會。直到我返香港，我先知道霜姐一直以嚟係幾咁需要我，但最後係我令佢有一個最差嘅結尾……」謝宣諾停頓了句子，免得這麼開心的重逢畫面出現眼淚。
「做手術之前，唔理個結果係點，我都想做到，如果我要死喺手術床，我都應該係會開開心心去見霜姐。」
阿斌哭了，沒有任何說話可以說，他就是很難受的哭了。十多年不見，我明白你，也支持你。
不過我還是不捨得你。
簡仁在旁邊沒有說話，他木納的緊繃著眉頭，沒有說出什麼話來。謝宣諾抱抱阿斌，然後說
「好喇，我地夠鐘去機場，我地唔可以遲。」
「我送你地出門口。」阿斌擦擦眼淚為二人送行，當走到門口的時候，他想起了一些東西。
「你地等等我。」
阿斌走進房間，拿出一個盒子來，再連隨遞到謝宣諾的面前。謝宣諾笑了一下，再將那盒子打開。
那是一件滿是斑斑血跡的球衣，十多年阿斌為謝宣諾去買而出意外的那一件球衣。
「全部都係我嘅血，點洗都洗唔甩，收住先。」阿斌笑笑說
「多謝，兄弟。」謝宣諾拿出來，雙手將球衣高高的舉起，讓那一件美國國家隊的球衣飄揚在晚風當中。
「為咗你，我地都兜咗好多路。」謝宣諾看著那球衣說。
「諾仔，想唔想知，當年個外國女人同Panpie講咗乜嘢，佢先肯跟我地一齊逃走？」阿斌突然問謝宣諾。
謝宣諾點點頭。
「佢話，呢個世界已經有好多人同事放棄我地，所以我地唔可以放棄自己。只要你唔放棄自己，所有嘅惡夢都一定會過去，太陽係一定會出嚟。」阿斌拉著簡仁，向謝宣諾作出一個送行的擁抱。
謝宣諾很快樂，他笑得非常開心，這時他更發現，原來冬餘已經悄悄的起了床，躲了在遠處的一個房門口旁。
「冬餘，嚟諾叔叔度。」謝宣諾向他揚揚手，但好奇的冬餘只是看著他，沒有反應。
「冬餘，你成日問爸爸，如果我係簡東拿，咁邊個係笠臣同舒米高？佢地兩個，就係爸爸嘅笠臣同舒米高喇。」阿斌拍拍二人，向冬餘打趣道。
阿斌這樣一說，冬餘立即有了反應，他主動的走到謝宣諾和簡仁面前。
「爸爸踢波好叻，你地都係好叻架？」
謝宣諾蹲下，雙手輕力捏著冬餘的雙臂，笑著跟他說：
「你爸爸細個入嘅所有波，都係我交俾佢，你話我叻唔叻？」
「咁佢呢？」冬餘看著簡仁。
「我？你爸爸中場交失嘅所有波，最後都係我救返出嚟，你話勁唔勁？」
聽完簡仁的答案，冬餘想了想，小小的身體退後了一步，突然向他們大聲說：
「你地好，我叫麥冬餘，我踢前鋒，我地可唔可以一齊踢波呀？」
謝宣諾和簡仁有點奇怪，阿斌立刻解釋
「佢每次去球場都會咁樣同人講，佢似我唔識講嘢，所以我教佢咁樣識朋友。」
謝宣諾回頭看著冬餘，那隻伸得筆直的小手看得他好感動，他和簡仁也立即伸出手來，跟冬餘交了這個忘年朋友。
「有機會你去香港，見到一個叫謝家寶嘅小朋友，都記得咁樣同佢做朋友。」
「知道。」
「好喇，我地真係夠時間喇，要行喇。」
謝宣諾拍拍冬餘的頭，立即走上車，開車前，他向阿斌再次舉起那球衣。
「好兄弟，下次見。」阿斌大叫
「應承你。」謝宣諾也舉起姆指，然後簡仁便開動汽車，往機場奔去。
一路上，兩人都沒有說什麼，簡仁的表情轉了好幾次，很明顯是一副有話要說的表情。謝宣諾有點累，很快的便睡著了。
一個小時後，他們順利到達機場，辦好了所有証件後，最終在一間餐廳等待登機。謝宣諾爭取時間小睡了一會，直到簡仁將他喚靜。
「上機喇諾仔。」
「好。」謝宣諾立刻動身，一直往離境閘口走去。沿途，他發現簡仁不斷的在應付他那手提電話。
「同邊個講嘢講咁耐，入機場講到宜家。」
「詠莉。」簡仁直接了當的回答
「乜嘢事？唔係媽咪有突發事？」謝宣諾覺得奇怪，如果是母親的病情他應該也會收到通知。
「唔係，我只係同佢講咗，你有病件事。」簡仁如實的告訴謝宣諾，但換來謝宣諾的停步。
「你同佢講哂？」謝宣諾問簡仁
「我唔可以俾你地不明不白咁繼續落去，阿斌講得啱，有事嘅係你，我地應該都為你諗，我想你同詠莉都知大家嘅心意。」簡仁預計會被謝宣諾責難，但結果是沒有。
「嗯。好喇夠鐘，我地行啦。」謝宣諾向簡仁笑了笑，再繼續腳步往前的走。
簡仁覺得奇怪，但感覺很好，終於有一次，他跟謝宣諾之間是沒有爭執。
二人順利的上機，這時天色開始光亮。坐在窗口旁邊的謝宣諾，看著那個太陽慢慢的從地平線昇上來，他記起了阿斌的說話。
「所有惡夢都會過去，太陽一定會出嚟。」