我們怎麼了？: 75
對於謝宣諾的問題，阿斌早就心中有數。
「我咁嘅樣，仲返去做乜？喺美國幾好，當年意外嘅事，我宜家個個月都會收到政府援助咗我地嘅一筆錢，夠生活夠俾冬餘開開心心讀書，幾好呀。」阿斌選擇了一個最直接的解答方法。
阿斌說時沒有掩飾任何事實，左手的義肢和面上的疤痕就是最好的証明。他努力的表達向二人著，所有事已經過去，雖然他遇上巨變而令身體有任何改變，但他依然生活得很好，很好。
「你呢度多唔多朋友？」簡仁問阿斌
「邊有，呢度好多西班牙人，佢地有自己嘅社區，唔係咁接納其他國家嘅人。我以前係住Garden Grove，不過治安好差，之後我阿媽就用積蓄買咗呢間屋。」阿斌站起來，看著相上母親的照片。
「斌…你隻手？」謝宣諾鼓起勇氣，想搞清楚阿斌身上所缺的，到底是不是自己當年幹的好事。他心入面一直想著母親的事，知道如果這一次不問，下次，不知道會什麼時候，又或者是會在那裡見面。
「我隻手…？哈哈…十樓跑咗大半個鐘先搵到出路，走到去差唔多大堂時有舊大石飛落嚟，我算反應快，個人就避到，點知就打中隻手。」阿斌依然是看著母親的照片，輕鬆背著他們說，彷彿是在轉達其他人的事情般。
阿斌的輕鬆，謝宣諾看得很內疚，不過，他選擇繼續的問下去。
「你可唔可以話俾我知，當日係點？我係點樣……令到你宜家咁？」謝宣諾站起來，走到阿斌的旁邊，很用力的說出每一個字。
「諾仔你做乜呀？」簡仁阻止，這不會是一個好問題
「你由得我好冇？」謝宣諾很快的向簡仁來一個「反阻止」，然後再看著阿斌很誠懇的說
「你話俾我知，我有嘢都想同你講。」
兩個故人這一刻很近距離的對視，阿斌在猶豫著謝宣諾的態度；而謝宣諾，也試著在離開美國前，做好自己所有的事。
「好，不過應承我，我地三兄弟，就當係講緊一件好多好多年前嘅歷史就算，唔好太多感覺好冇？」阿斌笑笑，而謝宣諾也點點頭。
「簡仁，開多罐酒俾我。」阿斌伸出右手，簡仁立即遞上啤酒，阿斌一口氣喝下半罐後，開始說出，十二年前，讓他人生翻天覆地的一天，是怎樣捱過的。
「當日，我同你收咗線之後，就喺世貿中心周圍行，唔知係你好彩定我好運，我再去間二手波衫舖撞下彩時，竟然見到個老闆提早咗返嚟開門。我好快咁幫你買咗件衫，之後見時間仲早，就走咗上去世貿中心一間運動中心度睇下一啲地方足球比賽嘅資料。點知睇睇下聽到一聲好大聲嘅巨響，所有嘅燈即時熄哂，好多人大叫同周圍走。
我唔識路，就只有跟住人走，我跟住一個外國女人走，走咗一段時間，先發現佢都係亂走。我同佢都走咗去一個唔知邊度嘅樓梯，當時周圍都好黑，我同佢一直跑，就只係一路聽到好嘈好嘈嘅聲。落到最底層我摸到一度門，但無論我點用力我都係打唔開度門。
呢個時候，後樓梯嘅燈開始閃下閃下咁著返，我呢個時候見到，一個亞洲女仔好驚咁坐咗喺門旁邊嘅一個位置。我知道佢係受驚過度，所以同個外國女人拉埋佢一齊走，佢起初唔肯走，最後個女人同佢用英文講咗幾句，佢就開始半推半就跟我地行。
我地由原地落嚟條路走返上去，所有地方基本上只係剩返一啲走火警嘅燈有光，呢個時間，唔知邊度飛咗一舊石頭埋嚟，我完全唔知乜嘢事嘅情況下，就打到頭破血流。
不過我知道情況愈來愈危急，我唔可以留喺呢個地方，我拎咗買俾你件波衫出嚟，包住個頭，再帶住個女仔一路跟住人流走。
呢個時間本來同我一齊行嘅外國女人已經唔見咗，我拖住個亞洲女仔一直走，呢個時間我聽到有人大叫，有一間飛機，撞咗落我地身處果幢大廈果度。
呢個時間我身邊嘅亞洲女仔講咗一句說話，我唔知佢講乜嘢話，只係見到佢好驚咁一路大叫一路想走返上去。我用盡全力咁拉住佢，將佢拉到去一個冇人嘅地方俾佢冷靜，再過多一段時間，又有人大叫，幢樓可能會冧，我嚇到完全冇哂方向，拉住佢就一路走一路走……
最後我終於帶住佢走到落大堂，就出大堂時，一舊大石向我地飛落嚟，我一手推開咗個女仔，自己就俾舊大石打中隻左手，最後仲黑到成隻左手手掌壓住咗。
呢個時候心愈來愈多碎石跌落嚟，我覺得隻手好痛，成個人完全發唔到力，我叫個女仔走先，佢唔肯。佢好似發咗狂咁拉住周圍逃走緊嘅人，又拉又扯，最後搵到幾個外國男人幫我將舊石頭推走。
推開石頭一刻，我望到自己隻左手血肉模糊，不過唔知點解，我竟然一啲痛嘅感覺都冇。最後我地終於走到出幢大廈，當我走出去再回望果一下，我先睇到成個畫面係幾咁震撼…」
「跟住呢？」謝宣諾一直很留神的聽。
「跟住我同個女仔去到一個地方，大家嘅情緒開始靜落嚟，而我隻手亦開始識痛。個女仔指住我個頭，我用右手摸一摸，先知道個頭嘅傷口仲未止到血，成件波衫都染咗做紅色。
最後我暈咗，一起身已經發覺自己訓咗喺醫院，而隻左手，因為感染而切咗。呢個時候媽咪已經喺我身邊。佢話我昏迷咗三日，醫生要我檢查多幾次個頭有冇其他問題先俾我走。
我完全接受唔到自己冇咗隻左手，一日到黑都不停咁鬧身邊嘅人，媽咪、護士、醫生統統都俾我日日咁不停鬧。班外國人唔知我鬧乜嘢，慢慢連我自己都唔知自己喺度鬧乜嘢，我當時只係覺得自己係世界上最慘嘅人，所有人都好似欠咗我咁。」
「正常…好正常…」謝宣諾不斷的點頭，一直帶有愧疚的點頭
「之後呢？」簡仁這時也走到阿斌身旁，以態度來表達一點支持
「跟住五日後，個亞洲女仔突然出現喺我病房門口。佢拎住血跡已經乾哂嘅波衫，走到去我病床前，同我講，佢係一個越南嚟既女仔。
我當時先醒起，唔怪得我聽唔明佢講果句說話。之後佢坐低同我傾計，佢話俾我知，佢叫Panpie，跟父母由越南去美國，意外果日，就係佢地第一日到美國嘅日子。
我同佢用英文溝通，可能大家都唔叻，所以傾得好辛苦。佢陪我傾咗一整日，到夜晚凌晨，我叫佢返屋企，佢先話俾我知，佢係冇屋企。之前幾日，佢都係喺醫院度過。
跟住佢開始喊，不停咁喊，最後話我知，我地逃走時佢講果句嘢係乜嘢意思。原來當時佢向我用越南話講，佢父母喺樓上，佢睇住架飛機，向住我地幢大廈飛過嚟，而且撞向我地上面嘅樓層度。
佢喺醫院搵咗好耐，都搵唔到佢父母，佢唔知可以點做，但多謝我推開佢救咗佢一命。」
「之後呢個女仔點？」謝宣諾聽得入神。
「之後我同呢個女仔喺埋咗一齊，最後佢都係搵唔到佢父母，而我亦都變咗一個殘廢嘅人。不過講嚟又好奇怪，可能係大家都遇上巨變，我地兩個反而互相影響喺佢面前，我從來都冇自卑嘅感覺，因為佢每日都俾好多信心我。
佢成日都話，當日唔係我救咗佢，佢今日就唔可以照顧到我起居。同我一齊幾年，佢學識咗中文，佢就識得用緣份呢樣嘢，去形容我地嘅感情。」
「佢就係……」謝宣諾指指睡房那邊問
「嗯…佢就係我宜家太太，所以你終於知道，點解我唔會返香港？」阿斌把往事都說完，氣氛反而變得輕鬆。
「但……點解你唔打電話返香港俾我地？」簡仁追問
「因為我媽咪。」阿斌明顯也預計到這個問題。
「點解？因為你媽咪同你阿爸離婚嘅事？」簡仁猜測，但阿斌搖搖頭。
「我媽咪知道係諾仔叫我上，佢呢十幾年，到死之前都唔俾我聯絡你地。我出事時電話跌咗，其他電話薄一直都俾佢鎖住，加上我一講香港嘅事佢就會發脾氣，所以我亦都冇再提。
佢成日都怕，如果我呢個樣返到香港，一定會承受好多不必要嘅壓力，加上我太太又唔可以跟我返香港，所以我應承過媽咪我唔會再接觸香港所有嘅人同事。
直到領養咗冬餘之後，我就更加冇諗過返香港呢件事。只係媽咪過身之後有一日，我打開佢保險箱先發現果本，我寫滿哂電話同Msn帳號嘅記事薄，我先決定上去睇下見唔見你地。」
「冬餘……？領養？」簡仁和謝宣諾有點吃驚
「係，我地以前住Garden Grove時，有一日冬天好凍，我同Panpie經過一個垃圾站發現一個棄嬰，我立刻帶佢返屋企，喺佢件衫度發現一張紙條，Panpie一睇就話係越南話，話呢個係越南嘅小朋友。
最後我地報警，將佢交咗俾警察，再商量咗一晚，就決定領養咗佢。佢係冬天嘅一個冇人要嘅小朋友，所以我就決定叫佢做「冬餘」。」
「你好勁，斌。」謝宣諾豎起姆指，向阿斌說。
「諾仔，唔使再為我嘅事上心，人一定會有錯，但錯事係一定會過。最重要嘅，係我地都可以喺呢啲事入面學識一啲自己唔識嘅嘢。唔好再拘泥喺以前嘅事度，呢一刻，自己想做，又或者可以做嘅，就全心全意同埋全力去做。
好似我用一晚時間決定收養冬餘，因為我怕如果我遲咗一日，今日佢就唔可以叫我做爸爸，我亦都唔可以每日教佢踢波。
記得，望前面，唔使再同我講對唔住。」
阿斌這一句，徹底的讓謝宣諾釋懷了。他們三個，然後一直痛飲，直到謝宣諾和簡仁要離開的半個小時。