我們怎麼了？: 42

「仁……？好耐冇見，你幾好嘛？」謝宣諾雖然有點驚訝，但基本要說的話還是要說的。 

「你唔使理我，我問你宜家喺邊，我宜家嚟搵你。」可惜簡仁的答案仍然是那麼帶狠勁 

「四季酒店，你幾時會嚟？」謝宣諾沒辦法，只可以無奈的說出簡仁唯一想要的答案 

「住四季？你都幾好環境，哈，十五分鐘後落樓下等我。」簡仁拋下這句，便掛了線。 

謝宣諾苦笑，站起來伸伸懶腰後便換衣服，準備下去見簡仁。 





十五分鐘後，謝宣諾站在酒店的大堂門口，他的心情很忐忑，不過對於將要發生的場面，他已經作了心理準備，而且也知道自己應該怎麼處理。 

「轟！轟！」突然一輛跑車駛至，停在謝宣諾的面前。 

「嘩，你係謝宣諾？」一個人從車窗探頭出來，向謝宣諾打量，謝宣諾認得出，這個就是十二年後的簡仁。簡仁下車，謝宣諾用友善的目光從頭到腳的審視了簡仁一遍。 

眼前的簡仁外表上跟十二年前沒太大的改變，但一身貴氣打扮卻併發出一股讓人窒息的感覺，尤其是右手手腕上的一隻限量版名貴手錶和純金色的墨鏡，壓根兒就是一身土富豪的打扮。 

「咁多年唔見，肥咗咁多，即係環境幾好啦。」簡仁看著謝宣諾的肚子說。 





「哈哈，哈哈。」謝宣諾知道簡仁的態度，這個情況下只有尷尬的苦笑兩句來應該他的搶白。 

「上車。」簡仁仍然是那種沒有尾音的說話方式。 

「哦。」謝宣諾跳上車，然後簡仁便沒有說話，一聲不響的駕著他的跑車，幾個起落已經直上西區海底隧道。謝宣諾正襟向著車子的正方，再用盡九牛二虎之力移動眼尾去留意簡仁。他看著簡仁嫻熟地操作著那輛跑車，內心一直回想著，眼前這個霸氣物體就是自己十多年前那個好兄弟，內心不禁有點戚然。 

簡仁的車子開得很快，十五分鐘後，已去到他的目的地，荃灣路德圍。 

謝宣諾看看手錶，車程才不過八分鐘。





「落車。」簡仁向謝宣諾擺擺手，自己便打開車門下車去。謝宣諾也連忙走下車，然後跟著簡仁的步伐走去。簡仁沒有說話，只顧自己一直逕自走到車的另一個方向那。 

簡仁走得很急，謝宣諾一直在後面跟上，最後簡仁走進一個已經關了燈的球場。簡仁推開那個鐵欄，一直走到球場中圈，終於停下腳步。 

這時謝宣諾也跟上了。 

「謝宣諾。」簡仁看著他。 

謝宣諾：「我地嚟呢度做乜？」 

「祖正打俾我時，我咁啱喺日本開緊會，佢同我講話見到你，你知唔知我嘅感覺有幾複雜？」簡仁沒有看著謝宣諾，雙眼一直向著遠處那個漆黑中的龍門問 

謝宣諾：「我知道當時我叫阿斌去美國係我唔啱，今次返嚟，我想睇下自己可以彌補到幾多嘢。」 

「阿斌？」簡仁有點奇怪謝宣諾的答案 





謝宣諾：「你唔係嬲我…當日冇第一時講俾你地知阿斌嘅事咩？」 

「原來你以為呢件事先係最重要？」簡仁情緒開始有點起伏 

謝宣諾：「咁係乜？」 

簡仁：「我想問你，你咁多年冇返香港，係你自己唔返，定係有某啲事令你唔可以返？」 

謝宣諾：「某啲事？即係乜？」 

「答我呀！」簡仁突然很大聲的說 

「冇人同事令我唔返香港，咁多年，係我自己覺得，香港冇人需要我返嚟。」謝宣諾沉著氣說 





「仆街！」簡仁突然一拳打向謝宣諾謝宣諾完全沒有預計之下，被簡仁打得跌在地上，下意識地摸摸鼻頭，一度暖暖的血漿已經慢慢由鼻孔滲出來。 

「做乜嘢呀？有乜唔講得要郁手郁腳？」雖然已經有心理準備，但突然被襲的謝宣諾還是惱火的反問簡仁 

但眼前的簡仁未有因為這一拳而內疚或者減輕憤怒，他一衝上前，兩手已經執著謝宣諾的領口，近乎面貼面的向謝宣諾咆哮一句： 

「你係唔係唔使理你老豆老母呀？謝宣諾？」 

「爸爸？媽咪？做乜事？」謝宣諾醍醐灌頂，所有的事情包括簡仁的態度都終於有個端倪。 

「乜嘢事？你起身，望唔望到果邊？」簡仁拉起謝宣諾，右手指向不遠處的一幢唐樓。 

「做乜嘢？」謝宣諾繼續摸著鼻子說 

「三樓，個窗貼住塊藍色布果間呀，見唔見到？」簡仁愈說，火氣就是愈大。 





「嗯。」謝宣諾點點頭 

簡仁：「你老豆老母就係住喺呢間屋呀你知唔知呀？」 

簡仁的答案，把謝宣諾嚇得失魂落魄，連忙問簡仁：「點解佢地會住呢度？點解會咁？」 

簡仁：「咩叫點解會咁？你當你老豆老母一世無驚無險銅皮鐵骨咁幫你遮風擋雨？仲要你諾仔一個唔該就走咗去十二年都仲要長命百歲咁等你返？咁多年嚟，我以為你有乜嘢事，你有意外你有苦衷，甚至係你可能死咗先唔可以返嚟香港睇下你老豆老母。我真係估唔到你係無穿無爛，牙都唔蛀一隻咁返香港，仲要肥屍大隻住喺四季咁好環境？」 

「到底發生乜嘢事？佢地發生乜嘢事？點解會住呢度」謝宣諾沒有理會簡仁的長篇大論，只是尋找自己想要的答案。 

簡仁：「點解住呢度？你覺得阿老豆老母唔可以住呢度咩？你仲以為佢地喺美國大魚大肉又或是仲住喺半山？我話你知，冇喇！一個沙士佢地乜都冇哂喇，咁多年嚟，你阿媽仲日日都掛住你掛到周身病，成日怕你唔知去咗泰國發生乜嘢事，怕你曝屍荒野。你阿爸明明自己都有病喺身，都仲要出去打工去俾你阿媽睇病，邊似得諾哥你住四季咁富貴？」 

「媽咪有病？媽咪有咩病？點解會咁？」謝宣諾拉著簡仁的手問，拉扯間沾得簡仁整隻手臂都是血。 





簡仁：「腎病，嚴重到要換腎。」 

「點解…」謝宣諾下意識想說為什麼沒有人跟他說，但他立即明白，是自己一直在泰國那邊把父母的生活想像得太美化，沒有想過他們都會遇到難題。

「點解？我都想問你點解？點解你可以當佢地好似乜都搞得掂咁？我話你知唔係呀，你老豆老母都會有搞唔掂嘅時侯，佢地冇哂錢，借錢借到冇哂朋友果時想搵個地方住都冇，唔識搵人幫唔識諗辦法，我求咗佢地幾耐，佢地先肯住喺我老豆留俾我嘅呢間舊屋，你老豆仲要堅持個個月俾返三千數我當屋租，醒未呀？謝宣諾？」簡仁鬧得起勁，完全沒有理會自己手上那些班駁血跡。 

「霜姐呢？霜姐去咗邊？」謝宣諾六神無主般問 

「死咗喇！死咗好多年喇！時間唔會等你架，謝宣諾！」簡仁這一句，正正式式讓謝宣諾崩潰了。