一場十年的夢。: 突如其來的(告白??)

｢九成九係JOHN哥得米啦，仲要係條女做主動添，真爽皮。｣我當刻係咁諗。
直至我轉身望到JOHN哥同嗰條女都呆左，先發現唔係。
再望望另一條女呀倩，定眼咁望實我，我先知咩料。
 
！！！！！！！！！！！！！！！！！！！！！！！！！！！！！！！！！！！
 
就算打一千萬個感歎號，都形容唔到我當刻嘅驚訝！
喂老闆，我同你識左七日，見過兩次咋喎。
更重要係我知自己係咩樣咩料，無可能有女鍾意我架！
而呀倩又唔似係講玩笑喎，好認真咁望實我。




｢你……無女朋友架可？｣佢連小小尷尬都無，直接咁再問我。
｢吓……ER……｣我完全唔知比咩反應佢好。
｢你咁搞笑嘅？！｣我真係唔知點應好，唯有亂應左先，之後就一支箭咁沖返去月台。
 
其實到依家我都唔明佢到底諗緊乜。
矮、樣衰、毒，係我嘅寫照。有兩個可能：一，有D野係天注定，人夾人緣；二，佢玩尻我。
到今時今日，唯一而又最完美嘅解釋，係個天玩尻我。
為咗佢一個神經刀嘅表白，我浪費咗自己十年光陰、浪費左一個女仔七年青春。
因為佢，我差D唔能夠搵返自己嘅愛情，差D打算求其搵個愛自己嘅人，求其過咗佢就算。
 




三幾日後，如常咁撘地鐵返學，奇怪嘅係佢係我平時撘開嘅嗰一卡出現。
人類是習慣的動物。我亦都係一份子。
習慣咗嘅我好少改變：撘地鐵去開嗰卡就嗰卡；去食野每一間餐廳都有食開嘅一兩款食物；耳筒用開嘅MODEL會一直用，壞咗會買返相同型號……
過去一年，佢都無出現過係｢我呢卡｣度，今日竟然會見到佢。
係佢專登嚟呢卡，定係咁啱呢？我唔知，亦唔會知。
上咗車，我無主動去同佢傾計，佢亦無過嚟同我傾。
只係隔住四五個身位對望。
望望下又發現：佢對腳……都幾粗下架喎。
 
好快就落車。由於佢近車門，所以佢行先，我行後。




我好鍾意望人嘅背影。
望住佢行，步姿有少少奇怪，應該係輕微內八，行到左右擺，每擺一下，把頭髮就跟住擺。
直到返到學校，我先無再跟住佢。
 
過左大概兩三個星期，由於JOHN哥好比力咁追緊條女，而我同呀倩似乎都無咩朋友，所以每逢返民安隊放學都一齊走，慢慢同呀倩有正常嘅交流。
但兩個人，都無勇氣提起係閘機前嘅事。
 
情況就好似嗰一次純粹我個人FF出嚟咁。
又或者好似全世界都比人消除記憶，唯獨得我記得咁。