一場十年的夢。: 心的距離

好快時間就到十一月尾，臨近陸運會。
每年陸運會學校都請同區幾間運動廢校嚟做聯校比賽打飛機。
我地同童軍、女童軍就每年都要做開幕式，而開幕式前又要好唔人道咁係跑道上面食風。
呀倩站係我前面。
望住佢把長髮，入咗神。
可能因為佢嘅告白，我慢慢地鍾意咗呢呢個女仔。
莫名其妙。
 
｢喂！｣我由始至終，直到佢係我生命消失，都無當面叫過佢個名。
｢大風喎，你凍唔凍？｣當年嘅十一月係會凍，同依家唔同，一切都唔同。




佢FING下佢個頭髮，無再應我。
 
幾分鐘後，佢又突然開聲：｢一陣放飯同我食？｣
語氣好平淡。
我好怕我望唔透嘅人，永遠都估唔到佢地心裡面諗乜。
但為咗了解佢多少少，結果我地一齊食。
 
係西貢，學生比得起又食得落口嘅野食唔多。我地揀咗間泰式粉。
我叫咗碗豬頸肉金邊粉，佢叫左紥肉金邊粉。
佢還佢食，我還我食。




全程無傾過計。
唯一知多咗嘅，係佢食野好施文，嘴細細咁一啖一啖咁食。
 
十二月尾嘅第一個星期一嘅朝早，事隔二個月佢又再係我平時嗰卡地鐵出現。
同上次一樣，我同佢都只係隔住四五個身位對望。
唔同嘅係佢微笑，然後點頭。
我右邊拎住mp3機，雙耳塞住耳筒，雙手成手手汗。
到站。佢又再先行出車廂，我又再跟住佢返去。
原來佢步姿都幾奇怪，先係腳踭離地，半秒後先郁腳尖。
 




又自從呢門開始，呀倩每朝都會係我車廂出現。
情況就好似專登嚟搵我咁，
但同時又唔會過嚟同我傾計，只有對望。
每次同佢嘅相處，我個心都不期然咁跳動。
 
慢慢地由每個星期二四人行嘅時間，
慢慢地對佢有多小小嘅了解：原來佢唔只會微笑。
我地嘅距離，從來無拉近過。