《第一次 我說我會記得妳 第二次 我說我會約定妳》: 暑假前夕七人行
暑假前夕，我們七人就到長洲度假屋住三日兩夜。其實，度假屋之旅本應是我與家人每年的節目，但因為家人都忙於工作，尤其是手執鑰匙的舅父，所以今年決定取消。既然大家都未能抽空，我就決定向舅父借鑰匙，免得失去度假享受的機會。
七月的天氣非常炎熱，地面像燒紅的鐵鑊，熱氣慢慢地蒸上來。我們到了度假屋，放下行李，體力已消耗一大半了。古語有云，不是！不是！是俗語說：「夏日炎炎正好眠」我正想睡著的時候，小S就衝過來拍一拍我。
小S：喂啊！咪訓啦！
我：咩事啊？
小S：我地行下長洲啦！
我：嘩！你睇唔到個太陽熱到燒死人咩！你唔驚曬到有雀斑咩？
小S：一早搽咗防曬啦！
我：你搵阿Jan陪你啦！
小S：唔得啊！阿Jan睇完本書之後要打機啊！Ashley佢地又訓著咗！
我：咁仲好啦，你陪佢打囉！
小S：你知我都唔識打機既！何況都有Matthew同Patrick啦！
我：比一個鐘我訓下先，等個太陽冇咁熱先啦下！
小S：我等你啊！一個鐘後叫醒你！(迷人的單眼加強了我的睡意！)
我：(最好唔好叫啦！)
果然小S真是有早沒遲，給我剛剛好一小時。唯有硬著頭皮出去吧！在這裡就介紹一下長洲美食，因為小S跟我逛街不外乎「食食食」。長洲，以我角度有「三絕」。第一是砵仔糕，因為香甜，質感結實且多紅豆。若果大家到長洲，就嚐嚐吧！第二是糯米滋，有芒果、紅豆、花生、芝麻，各有風味。第三是本人的母親大人摯愛，就是粽子，的確美味，但我認為價錢不合理！大家都可以嚐嚐！
黃昏前，我們二人就手拖手慢步海邊，手執一串冰糖葫蘆，就這樣地消耗餘下的一半體力......
小S：今日我真係好開心啊！咁走行咗成日啦......
(她偎依著我，把手臂扣得緊緊的，沒有想放手的意欲。)
我：累唔累啊？
小S：唔累啊！因為有你......陪我(她搖搖頭......)
我：我地睇多陣日落就番去啦！好唔好？
小S：嗯！嗯！
一會兒，我們收到電話，他們約在長洲街市買BBQ材料。由於合七人之力仍是太薄弱了。汽水是不足夠的，所以要再次往超級市場。我當時已經累透了，實在不想再去，但基於公平原則，所以以「包剪揼」方式決定二人買汽水。
七人：包剪揼！
(人人皆出剪，只有我跟阿Jan出包！)
我：咩料啊！又要我落！
Ashley：哎喲！
Katherine：哈哈！
小S：(掩嘴笑......)
Janice：(呆......)
Matthew, Patrick：Oh！
我：你地夾埋嫁！
小S：一係我陪你地去吖！
Ashley：唔得！願賭服輸！你同阿Jan拿拿臨去啦！咁就啱啦！Matthew佢地去透火，我就等食！
我：至勁係你地啦！
我跟阿Jan一起走到超級市場買汽水，剛見對面有售賣麥芽糖夾餅的小檔口。
我：阿Jan，有冇興趣啊？(我指向檔口！)
Janice：有啊！
我：唔該兩塊夾餅吖！
婆婆：唔好意思啊！已經賣晒啦！
我：咁算啦！唔該你！
婆婆：其實我仲有半樽麥芽糖，餅就冇啦！我送比你同女朋友攞返去食啦！
Janice：(面孔像溫室蘋果，看起來很香甜味美！)
我：婆婆，你誤會啦！佢唔係我女朋友，我邊度有咁好福份啊！
婆婆：點都好啦，你揸住啦！
我：咁多謝你啦！
我：個婆婆亂咁講嫁渣，你唔介意嗎？
Janice：嗯......我地......都係快啲返去啦！
入屋後，我們闖進廚房，手執木筷子，品嚐麥芽糖夾餅。
Ashley：你地係度做緊咩？
我, Janice：(轉身)
Ashley：哦！你地係度偷食(偷腥)！仲食得咁滋味！
Matthew, Patrick：Bomb Bomb Bomb
小S：......
Katherine：(掩口)
我：麥芽糖夾餅渣嗎！
小S：(鬆口氣)
Janice：(繼續咀嚼)
Ashley：咁獨食嫁！
Katherine：Ashley，你咁大聲做咩啊！大驚小怪！一齊落去燒野食啦！(打了Ashley的頭)
我們逐漸離開，小S的神態有點怪異，我就找她談談......
我：做咩啊？唔開心？
小S：(一言不發)
我：你以為我同阿Jan偷食呀(偷腥)？
小S：咁......阿Jan咁好，又清秀，有邊個唔想食吖！係既話我會祝福你地嫁......
我：傻瓜！冇你咁好氣，見到你就飽晒啦，唔駛偷食啦......
小S：你又攞我黎講笑！都係去燒野食啦......
BBQ完後，到了集體遊戲時間，就是我不太喜歡的Truth or Dare。幸好多次都沒轉中我，只是聽Ashley, Matthew, Patrick等人「自爆」，大致上是十分平淡，即使是Dare，也是唱唱歌等。我中途離場，洗澡去了，盡早睡覺，不夠十分鐘，他們解散，我抹著頭，經過房門，偷看到Janice和Matthew二人。小S從後拍我一下，我們二人面貼面地望進房間。
小S：有咩睇啊，小Den？
我：(指一指)
Matthew：我好鍾意你啊，阿Jan！可唔可以同我一齊啊？(場面十分震撼，感覺到Matthew的勇氣是由心而發！)
我：嘩嘩嘩！好主動！
小S：好勇敢啊！
Janice：對唔住啊！我地只係朋友，我有意中人嫁啦！多謝你既好意！
Matthew：我會等你嫁！
Janice：(轉身離開)
我：快啲走啊！阿Jan黎緊！
小S：嗯嗯！
我：阿Jan原來有意中人嫁？
小S：我唔係太清楚啊！阿Jan眼光應該唔錯！
我：不過Matthew都幾好吖！
小S：都係既！
我：小S，唔知道你眼光又點呢？
小S：我......我......去訓......教啦！(她面紅耳赤地急步走，非常可愛。)
翌日早上，因為不習慣陌生床的我，在日出前剛醒了，靜待了十五分鐘，太陽漸漸嶄露頭角。小S正在甜睡，免得吵醒她了。這時，我望出窗外，看見阿Jan從屋裡走出來，當時晨曦照到遍地金黃，在她的頭髮不留痕且悄悄地略過，我頓時面紅耳赤，因為這一幕很美，我不禁掏出照相機拍下這一幕。
我從一樓走到大廳，繼而踏出屋外，正當我想呼叫阿Jan的時候，她轉身向我莞爾微笑，舉起一根手指放在嘴唇邊，然後閉上眼，放第二隻在耳邊，示意不用說什麼，只需要聽海濤聲，觀賞瞬間的美景。我點點頭，足足享受這遍人間仙境約十五分鐘，她拍拍她的連身裙，就微笑地進了屋內......
第二天總括來說沒發生特別事，就是這樣，我們七人就度過三日兩夜了......