《男人多情而長情，女人專情而絕情》: 第二十二章
除左kaka之外，我都有同其他女仔聯絡，有個係隔離班既思純，李思純。
我地係一齊俾學校逼住去參加英文補底班識既，之前有打過照面，佢都識康僑既，算係fd咁，所以就傾起上黎。
其實我已經唔再好似以前咁，正係同康僑whatsapp，都有同其他異性whatsapp。
咁樣既生活係我未曾想像過，同未曾擁有過。
其實脫左毒既我比起以前，更加受唔住誘惑。
估唔到話咁快就放暑假，呢半年間，方子龍都搵到佢自己既愛情，低自己一form既妹妹仔。
個女仔睇落幾純品，其實望落花心既人先至專一，望落專一既人其實先花心，我認依家既自己真係花心，得一想二，唔滿足。
但我每次同康僑一齊，都會覺得好安心，好甜蜜，亦唔會去諗其他女仔，個世界只有佢一個。
但離開左佢，姐係自己係屋企，自己出街既時候，就會諗其他女仔。
我都曾經同過其他女仔單獨出街，正係得兩次到，一次仲要係撞到，兩次都係同kaka出去。
同kaka出去既時候，間唔中都會諗起康僑，可能慣左出街都會幫手留意下有無野岩康僑，同埋去到邊都會見到佢既影子。
但我都會享受同kaka出去既刺激感同新鮮感。
我無同康僑講我同其他女仔出去，我怕麻煩。
真係又要淆底又要去做，但正正咁樣先有突破，先刺激！
確實呢種感覺係康僑俾唔到我。
咁我真正想要既係咩...？
「終於都放暑假啦，我地可以出多D黎玩啦。」康僑佢好開心咁。
我地兩個好似平常咁手拖手，佢開心到將我隻手fing到好高。
佢出力咁fing，好似fing得越高，佢既心情就越高，就越開心咁。
今日提早左放，正係返學校聽個校長講一輪野就走得，都唔知返去做咩。
我如常同康僑一齊放學。
我仲同康僑佢一齊執野，佢仲係坐係我隔離。
下年就未必坐係我隨離黎嫁啦。
望多呢兩張枱一眼，瞬間有關呢張枱既回憶湧左入黎，擋都擋唔住。
係喔，原來好多野都唔同左，唔知唔覺咁變緊。
我企左起身，拎起個書包，康僑佢仲執緊D書。
因為之前有好多書都放左係度，最後一日緊係執曬佢走啦。
我前一個禮拜就一D一D咁執好曬，咁樣就可以帶少D野。
我玩陣手機，玩到我就黎見佢執好曬啦。
我就企起身，望一望張凳，望一望張枱。
我見到我自己坐係張凳度，凌亂而不修邊幅既頭髮，面上有分散各處既暗瘡，彎到勁低既腰，頭duckduck咁，沒有自信既自己。
依家睇返先知自己有幾失敗，雖然依家既我唔係成功得去邊，但至少唔會好像以前咁。
面對康僑，有時真係會覺得幾挫敗，我知佢唔係睇唔起我，係我自己睇唔起自己。
佢唔會要求我送佢名牌，但佢用親既野都係名牌。
每次行街都會聽到佢興致勃勃咁同我介紹名牌，而佢所講既名牌，我都係唔識既。
之前我真係完全唔會理名牌，覺得呢D野唔會係屬於我。
我係連outdoor都唔識既毒向左走向右走黎......
係因為康僑我先識名牌，到依家其實都識得唔多。
一諗起依家既自己，都會覺得失敗，我更難想像以前既自己。
更加令我覺得，以前咁樣衰既自己，咁無用既自己......
究竟有咩咁值得康僑鐘意？咁值得佢死心塌地？
「喂！又諗野呀大聖人？行得啦。」康僑佢幾開心咁樣潤我。
「無呀，諗返起我地以前D野姐。」我好老實咁望一望張枱。
「諗起我地D野？」佢望一望我地位，跟住佢都無出聲，我知佢都係度回想緊我地既野。
咁我都唔打擾佢，因為我都繼續係度回想我地既往事。
諗得都夠耐嫁啦，而康僑佢好似無想行既意欲。
我望一望佢，想叫佢走啦。
點知一轉頭，就見到個淚人。
我當堂嚇親呀真係，第一時間想諗下咩事，搞咩呀？但我諗唔到。
「咩.....咩事呀康僑，做咩無啦啦喊既？」我不知所措咁講。
佢笑左一笑，「無呀，諗起我地以前D野姐。」
自從聖誕節果日，呢半年康僑都無再喊過，日日本都見到開心既佢，開朗既佢。
突如其來既一喊，時間彷彿返去半年前咁。
「只係覺得此刻既幸福好似唔係屬於我既咁。」我忍唔住，用手輕輕拭走佢面上既眼淚。
「好似發左一場夢咁。」佢轉頭望一望我，變左個樣。
認真咁問我，「唔好離開我好無呀？」
以前既我一定唔會猶豫，實會話好。
但依家，我卻停左一停，即便一秒都好，都呃唔到自己。
但我卻反應過黎，同康僑講，「我實唔會離開你。」
我攬住佢，但佢見唔到背後既我係咩表情......
如果佢見到實會好失望。
「真係既？」佢唔係咁相信。
「真係嫁，我正係想要你。」為左令佢安心，我講左D自己都唔敢肯定既野。
究竟我想要咩？
但佢終於識笑返，終於大大力攬住我。
仲好興奮咁同我講，「走！我地去食好野。」
跟住佢就恢復原本開朗既佢。
我地手拖手去食飯，佢話食好野，原來係話食KFC。
仲以為以佢口中既「好野」係好高級野，原來「好野」真係「好野」黎。
「你講既好野就係KFC？」真係俾佢激鬼死。
「唔得既咩？」佢個樣好天真，睇黎佢都係真心膠。
「我想食好耐嫁啦！屋企人平時又唔俾食，放左學就要去補習返屋企，邊有機會食呢D野呀？」
「死啦，食呢D野會唔會肥嫁？」佢用好奇既眼神望住我。
我知道女仔講呢D，都係想個男仔講「唔會」。
「唔會肥就奇。」我衝口而出咁樣講。
咁樣佢就嬲左我......
我份人比較直，想講乜就講乜，似我呢D咁麻煩既性格，可能唔係咁岩拍拖......
但我都有盡力去哄返佢，我都知佢想我哄佢。
但每次都咁樣哄其實會好累。
其實一開始既我，會覺得呢d係情趣，亦樂此不疲。
但依家卻會覺得?。
究竟係時間令我懶惰，定係因為我個心而變得懶惰？
平平無奇咁過左呢次約會，送佢返屋企。
行緊呢半年黎熟悉既道路。
其實拍拖都真係幾?，未拍過就對佢一直有憧憬。
但拍過之後，好多幻想中既美好都被一一打破。
係愛情呢條道路上面，無人教你應該要點做。
因為每對情侶既相處方式唔一樣，可以幫到你既只係得自己。
----------------------
夜晚，有好多野諗既我選擇去跑下步，難得有時間可以靜落黎。
係呢一條路，都有康僑既影子，其實康僑已經係我既一部分，我唔敢想像無左佢既日子。
但感覺無以前咁愛，d人話愛情耐左會變感情，但咁平淡既感情，我無咩動力去維繫......
我跑到??地，坐係隔離既石凳度休息下。
拎部電話出黎睇。如無意外，有康僑既msg。
康僑：聽日出唔出黎行下街街呀？
除左呢個msg之外，仲有兩個。
家姐：喂細佬，聽晚得唔得閒同家姐食餐飯呀？
KaKa：我知你聽日放暑假啦，聽晚一唔一齊食個飯呀？
三個人同時約我去食飯，我都唔知點揀好。
所以我睇到都未覆住，我無開到手機，俾自己係車上面靜一靜諗一諗。
到落車既時候，我終於思考到答案。
我一落車就拎起手機覆人。