《男人多情而長情，女人專情而絕情》: 第二十三章
KaKa：好呀，咁你想食咩？
康僑：後日啦，後日同你食，聽晚我約左家姐食飯呀。
家姐：聽日lunch啦好無？
我係真係有諗過度過，KaKa唔係成日見，就緊係同佢食左先啦，但康僑同家姐成日都見，遲少少食無傷大雅既。
返到屋企我就去扣家姐房門，因為我見佢仲未熄燈呀間房。
「入黎啦。」佢應該估到係我。
「咩事呀細佬？」我輕輕閂埋房門。
「你收唔收到個wtsapp呀？」我明知突問。
「收到啦，我未覆住，岩岩想覆你就返黎啦。」佢係度睇緊劇，韓劇黎。
心諗都唔知有咩咁吸引，吸引成班女為之瘋狂。
同樣地D女都唔明我地男仔點解為左AV女優瘋狂一樣道理。
「咁你想食咩呀家姐？」
「我無所謂呀，睇你囉。」佢目不轉睛咁盯住個螢幕，望都無望過我一眼。
「其實我約你食飯，主要係有野想同你講。」佢突然個語氣好認真。
跑完步返黎成身汗，所以我就走去沖涼。
係沖涼既時候會好鐘意諗野，諗好多野，好享受呢一個正係得自己既空間。
我係度諗究竟家姐有咩同我講？因為佢未試過會咁認真，話有野同我講，佢唔串我已經謝天謝地。
諗諗下就無諗，順其自然算。
反而我諗緊聽日著咩去見kaka好呢？
唔洗一陣我就諗好左，咁就沖完出返去。
覆下康僑，KaKa咁呀，就?左。
第二朝，我同家姐是但係樓下搵左間餐廳，然後就等開飯。
咁一邊食既同時，家姐就問啦：「你呢排變左好多你知唔知？」
「下？有咩？」其實自己覺嫁，但唔想承認。
「我正係感覺到外表變得好左，呢半年黎識打扮左好多。」
「但係變得無以前咁開心，咁單純，姐係開始感覺到你份人變得複雜。」
「我唔係話咁樣係衰，但你既複雜並不係成熟。」家姐既眼神好似望穿我咁，我既內心一步一步俾佢睇穿咁。
佢眼神淩利，似把針咁，一針就見血，不其然地覺得到有股寒氣係背後湧上黎。
第一次感受到家姐果種氣勢。
「咁...係時候將你發生過既野話俾家姐知啦。」佢由淩利既眼神轉變成溫柔，我都軟化左落黎，覺得搵到個依靠咁。
我將成件事同埋我既感覺都話曬俾家姐知。
「咁...你覺得點好。」我真係唔知點樣先好。
「仲有...你又感覺到我既野？真係姊弟就咁靈？」
「平時留意下就得啦，你家姐都青春過既，就感覺到你無以前咁開心同細心，明眼人都會知你有事啦。」
「最緊要係，我覺得你女朋友都會感覺到...」
真係一言驚醒洛克人，我完全無理過康僑感受。
家姐講得岩，可能康僑佢真係覺得到，咁佢唔講係因為......
佢真係好愛我。
我真係幾內疚，但我控制唔到自己個心。
「你岩喔家姐，咁我應該點做好呀？」我講得好輕鬆咁，但其實內心好徬徨。
「如果你真係鐘意康僑，你就唔會諗第二個，當你有咁既念頭，就已經返唔到轉頭。」
「呢個念頭就好似d病毒咁，慢慢慢慢咁擴散全身，而唔會一閃而過。」
「就好似網上d人講，當你愛上第二個，就唔好搵第一個啦，因為你真係愛第一個，就唔會愛第二個。」
「我遇過既男仔好多，沈澱華，我唔想你由一個好男仔淪落為賤男。」
我默默咁，一邊食飯，一邊聽家姐講完佢想講既野。
我係度諗，我係咪唔再鐘意康僑？
究竟點樣好？
當我係度思索緊既時候，家姐又再出聲：
「人類主要既敵人有兩個，一係時間，二係金錢。」
「呢兩樣野可以俾你認清一個人，亦會俾人認清楚人性係咩一回事。」
的確，時間係一個考驗。
一段真正既感情，應該經歷過時間既考驗。
就等時間去考驗下我地，但點樣考驗？我唔知。
要考驗幾耐？我唔知。
但我知，就好似真正既朋友咁，過幾多年都好，感情都唔會變。
但愛情呢......？
我帶住呢D疑惑咁食完呢餐飯，我相信之後仲會同家姐傾。
其實我無諗過會同家姐講呢件事，唔知點解就係唔會同親人講，可能怕佢地擔心掛。
但隱唔到佢就唯有坦白從寬。
到夜晚，我打扮得好睇?去同kaka食飯。
著件白色點點既深藍色襯衫，加條藍色牛仔褲配nike白色波鞋，gel少少頭髮咁，就出門口。
講真出門口既時候係幾期待，幻想第一句應該講d咩好。
係搭緊地鐵既時候，我收到一個wtsapp。
我一拎起部手機，我以為係KaKa啦，點知原來係康僑。
康僑：今晚同家姐食飯食得開心d啦。
睇到呢個msg，唔知點解有d恐懼。
我好怕康僑就出現係附近，或者一陣食飯撞到佢，咁就大鑊啦。
我即刻問佢，「我會呀，你今晚有咩搞呀？」
「無呀，咁我約左個fd食飯呀嘛。」
唔係掛？咁玩我？真係驚驚地，雖然同KaKa食飯係無咩野。
但我深明係人都憎俾人呃，我連打字既手都係度震緊。
「你係邊度食呀？」
「可能出銅鑼灣食呀，不過未知呀，睇下我fd點囉，佢又有d想食旺角果邊。」
唔好出銅鑼灣呀，千其唔好出呀大佬。
我諗緊點樣兜，叫佢去旺角食。
「你成日出銅鑼灣，今次咪去下旺角食囉。」我扮作輕描淡寫咁講。
「再睇下點先啦。」見到佢仲typing，「你係邊度食呀？」
哇頂，我要點答好呀？老實答又唔係，講大話既話佢都有可能會黎銅鑼灣。
「我係銅鑼灣食呀。」我都係老實咁答佢，因為我唔想再呃佢。
「咁好啦，我睇下點先。」
點好呢？定轉地方食？
「我到啦，遲下搵你。」
「好啦，食得開心d呀。」
我落左車就即刻打俾KaKa。
「喂，KaKa，你係邊呀？我到左啦。」
「我仲搭緊車啦，仲有兩個站就到，咁快既你？」
「我慣左早到嫁嘛。」
唔知係咪講開大話，依家講大話都可以衝口而出，諗都唔洗諗。
講得一個，就會有第二個。
講慣左，就會繼續講落去。
我同康僑出去既時候都唔會早到，反而係佢早到，成日等我。
「唔緊要啦，我係SOGO門口等你啦。」
「好啦。」
收左線之後，就有d緊張，唔係話好緊張咁，就係有少少緊張咁囉。
我低頭玩下手機，碌下ig，facebook咁。
突然間有人係我左邊膊頭拍左一下，我都估到係KaKa嫁啦。
咁我自然就向左邊睇啦，點知一睇無人既。
「喂！咁你咁豬嫁？咁都俾人呃嫁？」KaKa佢好調皮咁跳出黎嚇我。
咁當然我係無俾佢嚇到啦。
但佢岩先既行為真係幾可愛。
佢同康僑唔同既係，一個行為好可愛，一個係長得好可愛。
KaKa係果種化淡妝出街既女仔，雖然及唔上康僑咁有氣質，但勝在有身材。
你睇下佢，今日著到咁鬼索出黎，完全表現出佢玲瓏浮凸既身形。
牛仔短裙，將件白色背心放入短裙入面，配對黑色Roshe，完全展現出佢瘦長既美腿。
「你想食咩呀？銅鑼灣有咩好食呀？」佢問我。
「我都唔知有咩好食...um...不如去北角食呀？」我地要去其他地方先得，廢是俾康僑搵到我地啦，「食完可以行下海旁。」
佢聽到海旁兩隻字，隻眼好似發曬光咁。
「好呀好呀，去啦，但係食咩呀？」佢好似好急不及待咁。
「食薩利亞？」又平又好食，算唔錯嫁啦。
我仲諗佢會嫌cheap添，點知真係。
「下？食D咁平既野？」佢知自己好似講錯野即刻兜，「我係話又食？因為前排成日食。」佢吐一吐舌頭。
的確女仔扮下得意呀，可憐咁樣，男人就招架唔住。
「咁好食呀嘛，走啦。」
佢諗住行去搭地鐵，但我拉住佢，「去搭叮叮啦。」
我未等佢反應同拒絕，就拉走左佢。
拉佢走既時候，我無留意佢係後面既表情。
但我感覺到佢捉我隻手捉得好實。
我拉左佢行一陣就鬆開左佢，再轉身睇下佢點啦。
我見到佢個表情好明顯係失落既。
但無辦法啦，我都唔想嫁。
上左叮叮，我行係前面，但我仍然有風度咁讓佢坐入面。
過程入面我地無出過聲。
佢係度望緊風景，我睇唔到佢既表情。
咁我就低頭玩手機，係呢D咁無聊既氣氛底下。
玩玩下既時候，我感覺到佢個頭挨落黎我度。