唔係掛！原來真係有鬼！－現代捉鬼故事: 第五章 - 供與求 - 11

聽到任揀一支，我個心已經跳左出黎。
作為一個男人，見到自己鍾意既野放O係眼前，
你絕對會感受到你個心O係度「撲通、撲通」咁跳，
好似下一秒佢就會破開你既心口彈出黎一樣。

我緩緩地行埋槍架，每一步都重覆考慮邊一支可以成為我既配槍。

外人睇每一支都一樣，咪又係鎗！但鍾意槍既人睇就完全兩回事。
如果你呢一世只可以j蒼井空同吉澤明步兩者其一，你會揀邊個？
我依家面對緊既就係類似既問題。





雖然每一支鎗都有佢吸引之處，
但係除左外型之外，如果計每一支鎗既火力同埋精準度都係一樣，
剩底落黎最重要既，係支鎗既重量。

可能差幾十克，數字上唔會有ｄ咩大分別，但係如果o係實戰入面，
鎗太重的話，只要你有一刻累，需要垂底手，那怕只係半秒鐘，
都絕對夠你輸，甚至係命喪黃泉。

雖然我知道上面既理論，不過人到左某d 時候，都係感情行先。




我拎起左我由入房第一下已經吸引住我既全黑色 SVI Infinity，
我唔知鎗入面有咩餡，中間改左咩，不過由第一眼見到佢開始，
我已經對佢有種特別既感覺。

「我想要呢支。」我拎起左呢支黑色既手鎗。

「我都估到你架喇！呢支都係我最鍾意既鎗，不過冇計啦，鎗如果唔用，佢只係一件藝術品，希望佢到你手之後，可以好好發揮到佢既本性啦。」金仔雖然面帶笑容，但係亦難掩佢面上既失落。

「放心啦，我會好好咁錫住佢！」我將鎗緊緊抱住，就好似抱住初生嬰兒既媽媽。





「你老豆係個出色既守護者，我都希望你可以行呢一條路。你有武器，但係武器除左要黎殺戮之外，仲可以要黎保護人。唔好動不必要既殺意，得饒人處且饒人。你選擇左呢一條路，未來等緊你既野會比你想像中多，萬事小心，有咩唔識唔明就問啦，千期唔好自己亂試，到時真係會出人命架。」

金仔既肺腑之言同師傅既不謀而合。佢地兩個不停提我可以既話就放人地一條生路，背後即係話，有另一班人一直用一種完全相反既態度黎行事。

「嗯，我會睇住架喇，不過有樣野我想問，點解有d靈體可以留o係人間既？」

「呢d唔係應該由你教既咩人地師傅？」金仔望一望師傅，師傅一面愛理不理。

「我呢d粗人講野好難明架，邊似你滿肚墨水既大文豪呀！黎啦，你講啦。」
師傅由一面不屑既語氣變為嘻皮笑臉，就好似一個扭緊買玩具既小朋友。

「唉，真係唔知係唔係前世欠左你地。」金仔一面無奈。

「點會呀！你係一炁玄童托世喎！你依家係打救緊蒼生，亦即係我呀！黎啦～你講啦。」





「你次次都剩係得呢句架啦！」

「咁你係嘛，大師～～～～～～～～～」師傅作狀跪拜。

「一炁玄童？」我一面不解。

「你唔駛理咁多架喇，跟我叫，大師！大師！」師傅每叫一下就舉高手一次，就好似遊行叫緊口號既示威者。「...哦....大師！大師！」我跟住師傅咁叫。

「唔得呀！大聲D！有Ｄ氣勢咁叫！大師！大師！Come on！」　師傅變本加厲。

「大師！大師！」

「yeah！咁叫就o岩喇！」師傅對我做出手指公。

「得喇，好煩呀你兩個！怕左你地喇！」金仔雙手掩耳。終於輸左比我地兩師徒。




我第一次感覺到原來二人合作係可以有咁大威力。

「我既身世你唔駛理架喇，我解答下你既問題，亦即係靈體係點解留ｏ係人世啦。」金仔拎起放o係櫃入面既水杯，大大啖飲左一啖。