唔係掛！原來真係有鬼！－現代捉鬼故事: 第五章 - 供與求 - 7
「點呀？快ｄ講喇，我約左人睇9點半。」金仔將剛剛組裝完既銀色marui Hicapa 5.1 放上槍架，回頭收拾檯上面既用具。
「拿～今次唔係我買野！係呢位小兄弟買呀！」師傅雙手搭在我身上，
我一面茫然。「呢個人係李老味個仔黎架。」師傅細細聲補充。
「佢個仔咁大個架喇？都係既，老豆做邊行，個仔就好易做邊行架喇！」金仔冷冷回應，仿佛看通人生百態。「細路，你想買ｄ咩呀？」
「下？買咩呀？」我掙大雙眼,一面不解地望住師傅。
「比佢 『新手套裝』 佢啦！」師傅將手交叉搭於胸前。
「咩Type 呀？」金仔向身後一個貨架行過去，
回頭望望我地。
「同我一樣呀！高手！」師傳一面戚眉一面講。
「如果同你一樣，咁即係要 『懦夫套裝』啦！」金仔冷笑幾聲。
「收皮啦你！」師傅激到成個人彈起，
冇錯，佢真係彈左起身。
「喂！細路！」金仔頂多大我幾年，
比佢叫細路真係有ｄ唔慣。
「係！」對住前輩，我亦以應有既敬意立即反應。
「見你頭先望住支鎗流曬口水咁，你應該都有睇過鎗王架啦，
問你丫，鎗王好睇ｄ定鎗王之王好睇ｄ？」
做乜鬼今日個個都問我選擇題？
不過呢個問題我有絕對既答案，因為我已經o係各大討論區答過不下一百次。
「緊係鎗王！」我差唔多以反射既反應回答。
「何解呢？」
「鎗王無論故事，資料搜集，演員都完勝！」我激動地說，其他野我唔敢亂講，不過呢個問題如果有PHD, 我一定攞硬...唔係，我分分鐘可以做教O個個！
「鎗王故事線排列可能你話佢係平鋪直述，但係對比起續集既回憶線同事實線就好得多，再者呀，鎗王就講鎗架嘛！你講乜Ｑ打官司！都算喇！講乜Ｑ野打劫介款車先！」
金仔點點頭，輕輕一笑。
「我未講完呀！仲有阿項少龍同埋DANIEL WU，兩個係靚仔，但係Ｄ戲比起方中SIR 同哥哥就點都差少少喇！最重要！乜差野TripleTAP！？神仙呀？第3集又加多個TAP上去！第4集就變4粒呀？咁你講曬啦！根本條友都唔識鎗！」
「哈哈哈哈！」金仔聽完之後大笑起黎。
「好！講得好！哈哈，一舊雲，我鍾意呢個細路！」金仔O係面前既架入面，
拎左一個有電腦機箱咁大既鎗盒形箱出黎。
「踫！」保護箱被金仔放置於檯面，
聽頭先既聲音，呢個箱起碼有十磅以上。
「細路，見你對鎗都有Ｄ認識，加上你又係新仔，
我幫你選擇左呢個。」
金仔解開盒上兩個安全鎖，將箱180度旋轉，
盒既開合位置正正位於我同師傅面前。
「又唔見你咁好死幫我揀？」師傅認唔住揶揄金仔一番。
「你O個時大哥咁款，邊敢幫你揀野呀！」金仔即時反擊師傅既說話。
「打開佢睇下咩料～」師傅輕輕對我一撞。
我雙手放於盒上。
吸收左上次老豆既教訓，我已經做好心理準備，
就算今次彈個周秀娜出黎我都唔驚架喇。
我輕輕打開面前既鎗盒，望望入面既野。
「下？」我望住盒入面既止汗劑、粗框眼鏡、一對大眼仔con、四包唔同色既BB彈、
一件軍綠色hoodie同埋一副bicycle 啤牌。