唔係掛！原來真係有鬼！－現代捉鬼故事: 第五章 - 供與求 - 8

「見你咁識野，等我比ｄ好野過你！」金仔企起身，慢慢走到檯既則邊，
望一望盒入面既野，又望一望我。

「咳咳，為你介紹2013年我最喜歡靈力用品套裝，第！一！位！既金仔精選禮盒，無論送禮定係自用，都係一等一咁正！」金仔雙手拉拉外套衣領，即時好似top sales 上身。

「er...其實...」我望住金仔，一面不解，
正想問佢每一件用品既詳情之時，金仔已經阻斷左我既說話。

「我都知你好心急架喇！」金仔一手拎起支止汗劑。
「知唔知呢支係咩黎先！」金仔問。





我望一望師傳，師資用手托頭，
邊打呵欠，表示對金仔既推銷完全冇興趣，雙目繼續望住金仔身邊既位置發呆，亦唔打算幫我阻止呢個傳銷套餐。

「呢支咪止汗劑囉...」我繼繼續續咁答。

「o岩一半！比你答多次！」金仔一面興奮。

「呀....呢支係Nike大神都用既nike 止汗劑？」





「Nonono！呢支表面上係一支只汗劑，但實際上....」金仔隨即對住身邊噴左一大下，
身邊突然出現左一個麻甩壯漢。


「嘩！」本身只有3個人既空間，突然無啦啦多左一個大隻佬企左o係金仔既身邊，亦即係師傅頭先發呆望住既位置。

「唔駛咁驚，佢係我地呢度既石Ｑ。」金仔笑笑口同身邊既大隻佬搭搭膊頭。

「係地主公OK？」大隻佬一面不悅，望向金仔。





「好既好既，地主公先生，已經冇你既事喇，你可以走先。」金仔毫不客氣地趕走佢身邊既大隻壯漢，師傅同時亦輕輕揮手向地主公告別。大隻佬一步步走向黑暗，繼而再消失於房間之中。

「咁依家你知呢支係乜黎未？」金仔再次問我。

「係現形水？」我諗一諗細個睇既一套戲，入面亦都有類似既野，
所以好自然就以戲入面既道具名回答。

「叮咚！全中！呢支係就現形水喇！你睇黎都有睇過檸檬套戲架啦！同戲一樣，中左呢支野靈體會無法隱身，身體質數亦會重組到可以接觸既密度。到時你就可以接觸、又或者用普通武器去攻擊佢地喇。」

我拎起呢一支止汗劑，點睇佢都同我依家用緊o係萬寧買o個支差無幾。

「不過！呢支野只限對ｄ低級靈體，如果對ｄ修為比較高既，效果亦會相對減弱。」金仔補充道。

「咁點解要用止汗劑做掩飾既？」我大為不解。





「你唔掩飾，一陣你如果唔覺意剪左個MK 頭，行出街比警察叔叔抖，都唔駛下下咁煩啦，如果唔係一個唔該人地捉你去後巷，塞兩包唔知咩落你個袋，到時你就一身蟻喇～你話O岩唔O岩呀雲師傅？」金仔瞇起雙眼望住師傅，師傅做左個鬼臉並迴避左金仔既眼神。

「介紹你就介紹啦！咁多廢話！」師傅道。

我望一望師傅呢一個不屑既眼神同表情，
似乎今時今日外表平實既師傅，都有一段MK既過去。