唔係掛！原來真係有鬼！－現代捉鬼故事: 第五章 - 供與求 - 6

「喂！唔好掂呀！」突然有把聲將我大聲喝止。
「一掂分分鐘我地冇命行出呢度架！」師傅一臉驚慌，
彷彿我一掂世界就會即刻有粒核彈爆炸一樣。

「唔係呀師傅，呢支好野黎架！哥哥都係用呢支！」我雖然見到師傅既表情，
但依然難掩我一面興奮。

「唔緊要，咪掂下囉，難得有識貨之人。」房內其中一盞射燈直射落一張原木大排檔式摺檯上面，部邊亦坐住一個睇落同師傅年紀不相上下既男人。

難得主人唔阻止，我當然即時o係槍架上拎起呢支SVI Infinity黎把玩一下。




我雙手持槍，手屬既手把比平時可以接觸到既膠氣槍更有質感，
手指放於Cocking Handle 上，輕輕一拉。

「咔察！」

金屬滑架呢一下清脆既回彈聲，比世界上任何既聲音都要悅耳！
我輕輕將手把上一個不起眼既按鈕按下去。

「吠！」





彈夾由槍身滑出，我以左手輕輕接住。
我細眼望望彈夾，查看我最想睇既一樣野。

「噢，原來都係bb彈槍。」我難免有少少失望。

「雖然係bb彈，係但parts 全部都係真鎗parts黎架！只要執一執，
佢就可以有3,4ｊ（焦耳），拎出黎一d都唔失禮架buddy！」男人繼續坐o係位度進行佢既工作。

我將槍放番埋槍架，望望呢個隱身於黑暗中既男人。





頭戴護目鏡，上半身一件灰色緊身tee，身型半有半點贅肉。下半身著住一條美軍數碼迷彩長褲加一對沙色軍靴。如果唔係佢面尖尖靚靚仔仔咁，我絕對會叫佢做軍事宅，不過眼前呢個金仔，我都會叫佢做一條型棍。果然你的樣子如何，你的命運也必如何。

檯上有一系列唔同既金屬零件，及一支細細支以傳統五金工業用膠樽裝住既液體。唔知係點既樣？就好似你食碗仔翅，阿姐幫你落醋O個個吱吱樽咁。男仔對我同師傅輕輕一笑，隨即將檯上一件件槍械零件重新組裝。

「喂！金仔！」師傅毫不客氣咁坐左o係呢個金仔對面。
金仔抬頭望望我，「坐啦，好似你師傅咁唔客氣就得架喇。」

「嘩！講呢ｄ！」師傅一面不悅。

「無事不登三寶殿，咩事呀今次又？
又有ｄ咩新野要求定係有ｄ咩古怪野想我幫你訂呀？」
聽金仔口吻，睇黎我師傅都係個不受歡迎既客人。