唔係掛！原來真係有鬼！－現代捉鬼故事: 第五章 - 供與求 - 1

自從達德事件之後，我同Smoky 唔多唔少都留左一點點距離，
可能自己對靈體有戒心，因為反起面上黎，我真係隨時GG。

不過，whatsapp 一樣照響，
街我地一樣照去。

唔同既就係每個星期六我地由占卜班，
改左做出去行街睇戲。
始終每個月比6000蚊去學D上網都睇到既課程，
問起我，我都會有Ｄ肉痛。





生活上既改變，除左每星期同Smoky 出去之外，
好多時放工都會去搵我師傅。

師傅原名叫Cloud，其實係我老豆其中一個弟子。
唔駛問佢都知一定係FF既fan，佢既FF能力亦都唔野少。
單憑佢既念力打丁就知佢好野。

聽師傅講，有部份幻術係老豆收佢做徒弟既時候教佢，
初級既幻術師主要功用係o係其他人做緊野既時候，




以幻術引開其他街外人既注意，又或者係令外人睇唔到當中既情況，
如常生活。簡單D 咁講即係一個封路既散仔。

幻術師呢個後援崗位大部份都係比新入行既後輩做。
可以話係公司入面，每個人既必經階段。
不過亦有人熱愛幻術，將佢提升到更一個層次。
但實情係點，師傅就半句都冇提過。
 又一個如常既下午，我放工後上左老豆既Office 搵師傅。
師傅雙腳放於檯上，坐在油壓椅，左扭右扭。
右手控制住mouse，於高登上左click 右click。





我將達德之行既經歷一五一十咁同師傳全盤道出
(咁當然唔包Snoky 既部份)。
我只係同佢講起我朋友有包可以令鬼魂現形既煙仔。

「你咁都唔死得，你真係執番一身彩呀！」師傅聽完之後，冷笑左一下。「紅色既靈體大部份有濃厚既怨念，佢要整死你，就好似鍊死隻蟻咁易。」

「係咩．．．」我呆呆咁望住師傅，傻傻笑左兩下。

「你仲笑呀？我係你就喊喇！」師傅既金句病又發作。
「喂其實...你到底係唔係真係想學架？我唔想浪費精神同心機呀。」師傳輕輕咁打量我。

「緊係啦！一陣我又唔覺意又野多隻紅衫鬼，到時我瓜左，我又變埋紅衫鬼，我返黎搵你你就死喇！」我作狀嚇我師傅。

師傅聽到我既說話後，冷冷望住我，打左個呵欠。




雙腳由檯上收番落黎，用雙眼恨恨咁望住我。

「你咪黎囉，我肯定可以令你後悔點解死左唔即刻去投胎。」

我心不禁寒左一寒。
師傅回個頭已經上緊高登，眼神亦由我身上轉到電腦螢幕之上。