唔係掛！原來真係有鬼！－現代捉鬼故事: 第四章－達德行－31(續)

「我問，你係乜野丫，又或者，你係咩野。」我望住Smoky。

「我？」Smoky 笑左一下，
呢一下我內心感到無比心寒。
我強行吞一吞口水。

「咁你又唔駛驚。」Smoky 回復番平時既笑容。
「我要害你既，我頭先就唔救你啦傻佬。」

我未有解開警戒。




「我點知你係唔係想趕走佢，之後獨占我ｄ陽氣架！！」我作狀拎起朱古力。

「你咪睇咁多鬼故啦。每個靈魂留o係人間，都一定有佢既原因，有佢既執念。
好似頭先校長，佢要照顧小朋友。」

「咁你呢？」我追問。

「我等緊一個人，一個我地約左60年前既人。」

「唔係咁老土係我掛？！」





Smoky 笑左一下，「我冇眼睇你呀聰明仔！」
之後行左出走廊，望住初升既旭日。

「喂～出黎陪我睇丫！」Smoky向我大叫。

「唔睇！唔想同你個老虔婆睇！」咀巴說不，
身體卻很誠實。

我走出走廊，同呢個外表20歲，但係實情已經6~70歲既女人望住呢個o岩o岩出黎既太陽。





「咁你呢？你又有咩想做？」Smoky 望住廣闊既天空，對住一面茫然既我問。

「無呀，我未諗到。可能去下旅行，四圍去掛。我想去法國，D人話法國好Hea。」

「係呀！D人話可以食餐飯食3～4個鐘！」

我地挨住走廊既矮牆，如常咁有講有笑。
雖然我知道Smoky 同我係有分別，不過，我諗都唔會影響到我地做朋友既，
最起碼依家呢一刻唔會。

「呀！！！！！！！！！！！唔好埋黎呀！！！！！！」
一把男性既聲音以高八度既音調大聲叫喊，
睇黎大家都開始醒。





「鬼呢？！」
「我地係咪死左喇！」
「我仲有好多野未做架！」
「嗚呀！！！！」

當我地行到入班房之時，見到房入面既4女一男大叫大喊，
其實都真係幾失禮。

「咩事呀？」我同Smoky 慢慢走入班房，
行埋教師檯，睇下大家既情況。

「阿俊！！我地係唔係死左喇？隻女鬼呢！」
肥榮雙手搭住我搏頭，緊張咁問。

「冷靜ｄ，咩鬼呀？」我回答。





「琴晚o個隻囉！」

「你地琴晚成班行上天台呀！肥榮差錯腳連埋你地四個成班碌左落樓梯！
搞到我同Smoky 要一個一個抬你地入黎呀！」
我向Smoky 打一打眼色，佢報以一個微笑,睇黎我作既故仔都可以比MIB入面既WILL SMITH 有得比。

「下...係咩...」

「係呀！呃你做乜鬼！」

「嘩！天光喇！」Yan 望一望班房外，
o岩o岩升起既太陽。

「死喇！7點幾，廿幾個miss call！返屋企比人斬死都似喇！」Phoebe 大叫。





「好喇！走喇！」

「Let's GO!」我地一行人沿正門離開，
門口既更亭亦唔見老伯既身影。

我地一行七人慢慢沿山路行番落山。
陽光底下，一絲絲陽光經由樹葉間既罅隙中透落黎。
我回望一下達德，發現恐懼既另一面，原來係希望。