唔係掛！原來真係有鬼！－現代捉鬼故事: 第四章－達德行－17

兩條殘舊既樓梯位於禮堂大門外既左右兩邊，
分別連上唔同既校舍同課室。

我同smoky 盡快跟番上大家既腳步，由禮堂石面既樓梯登上二樓。
樓梯上面既紙皮石已經剝落得八八九九，加上日久失修既關係，
樓梯表面亦凹凸不平得非常嚴重。

我同Smoky 好小心咁一步一步上樓梯，
上到去既時候，亦見番大家。





其餘五人一字排開，企o係同一間房既門外。

「喂～做乜企曬ｏ係度呀～有乜好睇？」我上前拍一拍肥榮，一邊問。

當我行近大家既時候，由大家之間既罅隙之間睇到大家面前既係咩房。
呢度就係傳聞成間學校最猛既地方－二樓女廁。

「傳說呢度就係女校長吊頸既地方喇....」連平時聲大大既阿YAN,今次都冇貨賣。

「傳說？」我好奇咁問。




「頭先我地坐的士上黎ｏ個陣，個的士佬話之前呢度有個校長著住紅衫自殺架...」Hidy補完咁講。

「係呀，我之前都有上網睇過ｄ資料，全學校，最猛係呢度架喇。唔怪得上到黎咁寒啦。」Phoebe繼續講。

「不過上得黎，唔係唔入去掛。」雖然Yan 係咁講，但係唔難見到佢塊面都已經青青地。

我地一個跟住一個咁入到呢間廁所。
廁所有段小小既走廊，盡頭左面既牆放住4塊鏡同洗手盆，
而右面既就係幾個已經完全面目全部既廁格。
廁格入面剩底既就只有石屎同垃圾。




灰黑色既牆更令人不安。

厚厚既塵覆蓋住牆上面既鏡。
不過以我睇咁多年鬼片既經驗，鏡都應該已經裂開曬。

不過好奇心驅使之下，我都行左埋其中一塊鏡前面，
將鏡上既塵抹去。

鏡比我想像中來得完整，
除左角位有少少爛之外，基本上都完好無缺。

我對住鏡整一整番我個飛輪海頭。

我望望鏡入面既自己，發現自己比早幾個月變左好多，
唔知幾時開始，對呢個自己覺得陌生。





「唉....」我倒下頭，不禁諗起老媽子，
唔知佢依家點呢。

我抬頭再望望鏡入面既自己。
鏡入面突然出現左一個紅色衫既女人。
正正住左o係廁格正中。