唔係掛！原來真係有鬼！－現代捉鬼故事: 第四章－達德行－10

穿過學校牌匾，左面有個陳舊既更亭。
入面既燈一閃一閃，就好似幫緊每個入黎既人引路。

更亭前面有個空礦既操場，大約有平時屋村吹球場咁大。
操場被黃沙碎石所覆蓋，但亦不難見到沙石下久久失修既石屎地。
石屎裂縫中雜草橫生，令呢個地方加添左幾份被遺棄既恐怖怪校感。

由於Hidy 同Yan 部電話都突然壞左，所以依家仲開住電筒既就剩番我同肥榮。
肥榮經過頭先一役後，已經退到隊伍最後位置，而進入學校之後，路亦變得寬闊，所以我,Smoky 同三小花亦可以並排而行。





「汪！！！！」當我地踏入操場只有幾步之後，一隻黑色唐狗突然由出現於我地5個面前。

唐狗張牙舞爪，以行動黎警告我地唔好再向前行。
我地雙方距離大約兩米，老老實實佢向前一撲我地就實有一個人出事。

「拿拿拿...狗仔乖....我地想入去探下險咋。」估唔到除左我同Smoky 以外，
呢團人都有其他奇人異士。

「汪！！！」唐狗吠得更密更大聲。
原來係我諗多左。或者呢個時候我應該另轉身就走，不過除左我之外其他人都冇反應，希望唔係比人嚇到腳軟啦。





「汪！！」唐狗一直吠，但係沒有半點想攻擊我地既意味。

突然黑唐狗另轉頭，彷彿有人叫佢一樣。
唐狗靜左落黎，之後就向佢校舍高速跑過去。

「冇事喇～」
「係喇！幾驚隻狗咬我！」
「係咬都咬你先啦～你咁多肉～哈哈‧」





大家見隻狗走左，終於鬆左一口氣。

「你地黎做乜呀？」一把低沉既男人聲突然於我地附近響起。

「喂，咪玩啦。」Hidy 知我平時為人貪玩，
所以對住我講。

「喂，唔係我呀。」我自己頭先都比隻狗嚇左一跳，
我點會搞屎棍。

「肥榮你係咪玩野呀！」如果肥榮你諗住咁樣可以令到我出醜，
好，你成功左。

我用我既手機電筒照住肥榮，佢既面色比白紙仲白，
相信應該唔係佢扮聲喇。





乃野。

「我問你地黎做乜呀！答我呀！」我同肥榮不約而同將電筒照向同一個方向...