唔係掛！原來真係有鬼！－現代捉鬼故事: 第四章－達德行－2

「喂！不如今日放學去食放題囉！」又一個星期六既下午，
大家亦坐o係班房入面。

18號唔知係dum波鐘定係借尿遁 ，
又一次o係課堂途中走左出班房。

Yan 冇放過18號離開既短短幾分鐘，突然企左o係班房叫左出黎。

「點點點！有冇人唔去？」





「去唔去呀？」我拎出iphone ，send 左個message 比Smoky。
雖然大家係同學，但係我同Smoky o係大家面前仍然好似唔多熟咁。

「都好丫！我好少食放題。」Smoky o係收到我message 後都唔知有冇5秒就已經回左我。女仔回message 真係特別快。

「唔好話放題啦，你好似除左煙就乜都唔駛食咁！次次叫你去食飯最後都係得我食。」

「哈哈～咁人地唔餓嘛！肥左搵鬼要咩！」

「最多咪我要」打完呢5個字，手指公懸空o係藍色『傳送』制上面。





「喂，咪咁噪啦！噪到其他人喇！」18號早唔返，遲唔返，
就正正係呢個moment 先返。

算啦，都係有機會先再send。
我撳實backspace，將呢5個字『毀屍滅跡』 。

「咁我當大家都去架喇！我去book位先！」
話口未完阿Yan 已經 一支箭咁走左出班房。 其實自從中班之後，d 所謂既高級班呀，深造班都係講下唔同牌既配搭有乜特色，亦講下唔同牌有咩故事，甚至係傳說。





「拿！有傳說只要將死神、皇后同是旦4張牌排成一個六芒星形，即係六角形啦，就可以封印到地縛靈架喇，而地縛靈就會被封入皇后同死神入面。咁當然係傳說啦！你地當故仔聽左就算。」

我諗除左我之後大家個心都已經飛左去放題到，
唔好話當故仔，我諗18號既教學都已經變曬耳邊風。

以前好多野我都會只當係傳說，但係自從有次老豆帶埋我去做野之後，
我就開始信傳說，因為好老實咁講，如果件事係假既，根本就唔會有人傳；
有人傳，就代表佢有一部份係真。

「咁封左既靈可以點處理？」我聽完18號講之後不禁有個小小既疑問。

「你可以用泥埋左兩隻牌，又或者放入黑色信封，一邊諗住佢個名，一面燒左佢。咁呢位靈體就會由你所用架喇！」

嘩，咁巴閉？咁咪即係可以有個多啦ａ夢，呀唔係，係一隊多啦ａ夢跟身？





「但係好多鬼都會吸收人既陽氣，呢方面一般人最好就唔好搞喇！」

又塔羅，又陽氣，又地縛靈，都唔知18號係中、日定西。

「好喇！今日到呢度喇！各位下星期見！記住交學費呀！」

「我book左8點呀！仲有個幾鐘，不如去starbuck 坐下囉？」

「好呀！」我諗三朵小花圍內已經傾好曬，Bella同肥榮又冇反對，
連埋我同Smoky，一行七人就行左去家樂ｏ個邊既starbuck 打算hea到8點，
之後再轉陣食好野。