唔係掛！原來真係有鬼！－現代捉鬼故事: 第四章－達德行－1

或者我都應該相信Smoky話佢自己冇乜朋友，
呢幾個星期以黎，我個電話真係幾分鐘就震一野。

以前我覺得電話既電係永遠用唔完架，
（即刻身邊每一位朋友都話iphone 半日會冇曬電。)
之前我唔明，依家我終於明白了。

塔羅牌堂當然教唔到d乜啦，
不過為左可以每星期最起碼有一次見到Smoky，
我依然每個月都硬兜兜咁比學費。





可能你話我戇居，但係為左見到女神，
少少錢又算得d乜。

不過18號佢都算係咁。
唔知係唔係因為班同學鬧佢既關係，中班學費方面，
由6000 改左做3000，再比三小花講多兩講，噪多兩噪，
最後位位1200 成交。有時真係不得不佩服女性既講價能力。

做左都一段時間同學，我幾經辛苦終於記到曬大家既名；




觀音Bella、服緊兵役既肥榮、三小花之中最多野講，最多意見既阿Yan、三小花講價達人Hidy、三小花入面 『算』最少講野既Phoebe，當然唔少得Smoky啦。

呢兩個月入面，Smoky 將我由小毒拎，慢慢帶到現實既世界。
除左大家傾電話，出下街之外，今個冬天佢亦捉左我去買衫，配con。
幾好彩既就係，我之前每晚都打幾場lol先肯訓，
但係我既近視反而同中學畢業既時候一樣，一度都冇深到。
執左一大輪，叫做轉左個形象，(其實我睇唔到有d乜分別。)
 雖然錢係用多左，不過最起碼，我開始有番正常既社交生活。
會同同學傾下計，身邊既同事亦再冇好似以前咁當我怪物咁睇，
返工既時候都會叫埋我一齊去食飯。 或者，係我之前實在太過收埋自己，




又或者係占卜呢樣野，迫住自己去面對唔同既人，慢慢亦令自己談吐方面開始有信心。

我諗每個當過兵既男人都有試過，
每晚都會帶住電話上床，期待女神既一句『早抖』。

我亦唔例外。


每晚熜左燈，訓o係床上面，都會再撳下facebook，上陣高登。
直到手機另一邊發出一個早抖message 比我，我先可以好好咁訓覺。

或者係咁既原因，成日都唔係好夠訓，身體好似冇以前咁好，
明明著夠衫，有時無啦啦會占寒占凍；視力亦好似冇以前咁好。
有時o係某d地方，睇人既時候硬係好似有個白色框框圍住某d人。
算啦~大不了都係再去配過副con既o者。