唔係掛！原來真係有鬼！－現代捉鬼故事: 第三章 －不平凡的開始－19(續)

我企左ｏ係鋪頭門口，挨住左門口既玻璃。 
一邊諗番頭先大家既目光，一邊後悔點解自己會咁白痴。 
廿二年唯一一次同女性約會，所有野就咁燒焦。 
陣「囉」味真係唔係一般人想像到。 

我望住女人街檔口、招牌同唐樓間交織餘下既一線天， 
真係想樓上既招牌依家就dup 落黎dup死我。 

「自家烏冬！」突然我左邊耳邊傳黎高頻尖叫。 





我撳住耳仔，但係已經太遲。 
我直頭差ｄ企都企唔穩。 

「哈哈哈～你唔做男高音真係浪費左你既材華呀！」Smoky 將剛入手既CD放入佢既買餸袋。「喂，我差唔多要走喇。」 

「下....哦....」 

我望一望手機上所顯示既時間， 
唔覺唔覺，都已經9點幾，作為一個毒男，兩個鐘多少少既約會， 
相信已經夠我好好回味一年，又或者一生。 





「我行旺角o個面呀~你呢？」 

「我...o個邊，油麻地...」我仍然被頭先既自家烏冬事件搞到自信心去到新低。 

「好啦~咁下星期六見啦。」 

「嗯.....byebye。」 

「拜～！」Smoky 背住我做一個揮手動作。 




我依然企左o係玻璃前。 

我其實好想送佢，同佢行多一陣， 
可惜，毒男最忌有自信，那怕係絲毫自信都好。 
所以唔好話拎電話，就連即使我只係坐地鐵返屋企， 
我亦唔敢同佢去同一個車站。 

我真係冇用鬼用。 


「The Next station is Mong Kok.」 

油麻地上車，如果我係坐觀塘線當然好， 
話曬都總站，仲有住坐。 
但係如果返荃灣，其實我都唔知坐多個站做乜。 





我望住車門，期待旺角站有個人會彈埋黎，o係我耳邊講句自家烏冬。 
不過呢d只會出現o係愛情故事， 
我地呢度其實都算係鬼故，所以呢個情況係唔會出現既。 

半個鐘多少少既車程，其實一ｄ都唔長， 
但係今日既我黎講，呢程車就好似由香港坐車上西藏咁遠。 
深呼吸一啖，我仲隱約聞到青藏高原既味。 
（唔好問我青藏高原位於邊，我都係貪口爽加落去。） 

「zee...zee...」用smart phone 有樣野唔好， 
就係電腦d app 成鬼日震你，叫你用佢，提你打機。 

「whatsapp: 
Ｓ;) : 自家烏冬！」 





「邊春個Ｓ呀Auntie。」我見到個MESSAGE 忍唔住爆左句粗。 
好日都唔會有人Send message 比我，今日仲要咁好彩有廣告message。 
仲要好衰唔衰仲要黎句自家烏冬。 

打開whatsapp, +852 5唔知乜鬼， 
你老尾你呢ｄ廣告電話，等我鬧爆你先。 

新既ios 有一個全新既聲音輸入法，今次正正係佢大顯身手既時間。 
「Hi 你老尾!」我細細聲咁講， 
廢事嚇親企ｏ係我身邊既小朋友。 

「...........」輸入欄依舊有一條直線閃下閃下。 

「Hi 你老尾...」我試個大少少既音量黎多次。 





「...........」 

「呼....唔通連部電話都恰我？」 

「...........」 

「Hi，你，老，尾。」我一隻一隻字咁慢慢講。 

輸入欄出現左四個字。 

「超齡老美。」 

「我Hi係呀垃圾iphone！」望住iphone出比我既4隻字， 
我終於連同頭先cd 鋪既負面情緒一次過爆左出黎。 





作為毒男，我好榮幸， 
我一日之內成為眾人焦點，仲要有兩次咁多。 

「zee...zee...」電話再次發出有規律既震動。 
我真係想依家就掉爛佢。 

我撳一撳home 制，睇下今次又係邊間公司send 廣告。 

「whatsapp: 
Ｓ;) : 呢個係我電話呀，得閒就wtsapp我啦！」 

呢一刻，我好興幸冇提爛我部iphone！ 
我唔知我算唔算比人收左做兵，但係今次絕對係我有生之年第一次有女仔自己入電話落我部手提。